ပလိၵ်ႈ/ သိုၵ်းထႆး ၶဵင်ႈၶႅင်လွင်ႈႁူမ်ႇလူမ်ႈ ၵူတ်ႇထတ်း တီႉလႆႈ ၵူၼ်းမိူင်းႁူမ်ႈတုမ် လၵ်ႉၶဝ်ႈ မိူင်းထႆး 17 ၵေႃႉ တီႈလႅၼ် လိၼ်တႆး – ထႆး ။
မိူဝ်ႈၼႆႉ ဝၼ်းတီႈ 15/3/2021 ယူႇတီႈၽူႈမီးပုၼ်ႈၽွၼ်းပလိၵ်ႈ/ သိုၵ်းထႆး ၵူတ်ႇထတ်း တီႈလႆႈ ၵူၼ်းမိူင်းႁူမ်ႈတုမ် ဢၼ်လုၵ်ႉတၢင်း ၼႃးၵွင်းမူး ၸႄႈဝဵင်းမိူင်းတူၼ် ၸႄႈတွၼ်ႈမိူင်းသၢတ်ႇ ၸိုင်ႈတႆး ပွတ်းဢွၵ်ႇၶူင်းသေ လၵ်ႉၶၢမ်ႈၶဝ်ႈၵႂႃႇ တၢင်းဢိူင်ႇမိူင်းၼႃႉ ၸႄႈဝဵင်းၵဵင်းလၢဝ် ၸႄႈတွၼ်ႈၵဵင်းမႆႇ ၸိုင်ႈထႆး ။ တင်းမူတ်း တီႉလႆႈ 17 ၵေႃႉ ။
သိုဝ်ႇၶၢဝ်ႇ Chiang Mai News (CMN) ဢွၵ်ႇဝႆႉဝႃႈ ဢၼ်တီႉလႆႈၼၼ်ႉပဵၼ်ၸၢႆး 7 ၵေႃႉ ယိင်း 10 ၵေႃႉ။ ဢမ်ႇမီးဝတ်းဝႂ်သင်။ ၽွင်းၸဝ်ႈၼႃႈတီႈထႆး ထဵတ်ႈထၢမ်ၼၼ်ႉ ၵူၼ်းၸိူဝ်းလၵ်ႉၶဝ်ႈမိူင်း လၢတ်ႈဝႃႈ တေ ၵႂႃႇႁဵတ်းၵၢၼ် ၼႂ်းၵုင်းထဵပ်ႈ/ မိူင်းၵွၵ်ႇ ဝႃႈၼႆ။
ဢိင်ၼိူဝ်လွင်ႈၼႆႉသေ ယူႇတီႈၽူႈမီးပုၼ်ႈၽွၼ်း ပလိၵ်ႈသိုၵ်းထႆး လႆႈၵူတ်ႇထတ်း တၢင်းပဵၼ် ၶူဝ်ႊဝိတ်ႉ 19 သေ ၶိုၼ်းပွႆႇၸိူဝ်းၶဝ်ၶဝ်ႈမိူဝ်းၶိုၼ်း ၼႂ်းမိူင်းတႆး ပွတ်းၼႃးၵွင်းမူး ၸႄႈဝဵင်းမိူင်းတူၼ်ၶိုၼ်း ယဝ်ႉဝႃႈၼႆ။
ၼွၵ်ႈလိူဝ်ၼၼ်ႉ မိူဝ်ႈဝႃး ဝၼ်းတီႈ 14/3/2021 ၼၼ်ႉၵေႃႈ ပလိၵ်ႈသိုၵ်းထႆး တီႉလႆႈ ၵူၼ်းမိူင်းႁူမ်ႈတုမ် 6 ၵေႃႉ တီႈလၢၼ်ႇ သဵၼ်ႈတၢင်းၽႄ လွႆဢၢင်ၶၢင် ဢိူင်ႇမေႈငွၼ်း ၸႄႈဝဵင်းမိူင်းၾၢင် ၸႄႈတွၼ်ႈၵဵင်းမႆႇ ၼၼ်ႉၵေႃႈ ဢမ်ႇမီးဝတ်းဝႂ် ပဵၼ် ၵူၼ်းလၵ်ႉၶဝ်ႈမိူင်းၽိတ်းမၢႆမီႈ ၸဝ်ႈၼႃႈတီႈၸႅတ်ႈထၢမ် လႆႈႁူႉဝႃႈ တေၶဝ်ႈၵႂႃႇ ႁဵတ်းၵၢၼ် ၼႂ်းၵုင်းထဵပ်ႈ/ မိူင်းၵွၵ်ႇ ၼႆ ယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ