ၵူၼ်းမိူင်းတႆး ၸိူဝ်းဢွၵ်ႇၼႄၵၢင်ၸႂ် သၢၼ်ၶတ်းတေႃႇသိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်းမႃးၼႆႉ ထုၵ်ႇပလိၵ်ႈ/ သိုၵ်း မၢၼ်ႈ တီႉၺွပ်းၵုမ်းတူဝ်ဝႆႉ ဢမ်ႇယွမ်း 200 ၵေႃႉၼႆ ၵူၼ်းၼုမ်ႇၽူႈလူင်ႉလႅၼ်ႇၾၢႆႇပၢႆးမၢႆမီႈၵေႃႉၼိုင်ႈ ၸိုင်ႈတႆး ပွတ်းၸၢၼ်းလၢတ်ႈ။
တႄႇဢဝ်သိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်း ႁူမ်ႈတုမ် မႃး ဝၼ်းတီႈ 1/2/2021 တေႃႇထိုင် 12/3/2021 ၼႆႉ ၵူၼ်းမိူင်းတႆး/ ၵူၼ်းၼုမ်ႇ ဢွၵ်ႇၼႄၵၢင်ၸႂ် သၢၼ်ၶတ်း တေႃႇသိုၵ်းမၢၼ်ႈ ႁၢဝ်ႈႁႅင်း ထုၵ်ႇပလိၵ်ႈ/ သိုၵ်းမၢၼ်ႈ တီႉၺွပ်းၵုမ်းတူဝ် ယဵတ်ႈၶွၵ်ႈဝႆႉ တင်းမူတ်းမီးၵႂႃႇ 212 ၵေႃႉ ယဝ်ႉဝႃႈၼႆ။
ၽူႈလူင်ႉလႅၼ်ႇၾၢႆႇပၢႆးမၢႆမီႈ/ ၵူၼ်းၼုမ်ႇ ၽူႈၶဝ်ႈတူင်ႉၼိုင် ၼႂ်းပၢင်ၼႄၵၢင်ၸႂ် ပွတ်းၸၢၼ်း ၵေႃႉၼိုင်ႈ ၵေႃႈၸႂ်ႈ လၢတ်ႈတီႈၽူႈတွႆႇႁွၵ်ႈဝႃႈ – “တင်ႈတႄႇ ၵူၼ်းမိူင်းႁဝ်း ၵူၼ်းၼုမ်ႇႁဝ်း ဢွၼ်ၵၼ်ဢွၵ်ႇၼႄၵၢင်ၸႂ် သၢၼ်ၶတ်းတေႃႇသိုၵ်းမၢၼ်ႈယိုတ်း ဢႃႇၼႃႇမႃးၼႆႉ ထုၵ်ႇယေးသိုၵ်းမၢၼ်ႈ တီႉၺွပ်းၵႂႃႇၼႆႉ ၸွမ်းၼင်ႇ ႁဝ်းၶႃႈ လႆႈၵဵပ်းသဵၼ်ႈမၢႆမၼ်းဝႆႉ တင်းမူတ်း မီးၵႂႃႇ 212 ၵေႃႉယဝ်ႉ။ ဢၼ်ႁဝ်းၶႃႈ ပႆႇယိုၼ်းမိုဝ်းလႆႈၵေႃႈ တေမီးထႅင်ႈတင်းၼမ် ”- ဝႃႈၼႆ။
ၵူၼ်း 200 ပၢႆဢၼ်ၺႃးတီႉၼႆႉ ပႃးၸဵမ် ၵူၼ်းၸၢႆး ၵူၼ်းယိင်း ၵမ်ႈၼမ် ပဵၼ်ၵူၼ်းၼုမ်ႇ လုၵ်ႈႁဵၼ်းၸၼ်ႉၸွမ် ၸိူဝ်းၼႆႉ ဝႃႈၼႆ။
“သဵၼ်ႈမၢႆ ဢၼ်ႁဝ်းၶႃႈ ၵဵပ်းလႆႈ 212 ၵေႃႉၼႆႉ ပဵၼ်ၵူၼ်းဢၼ်ထုၵ်ႇတီႉၺွပ်း ၵူၺ်းၶႃႈ၊ ၼႂ်းၼၼ်ႉ ဢၼ်ၶဝ်ပွႆႇတူဝ်ၶိုၼ်း ၵေႃႈမီးယူႇ ၵူၺ်းၵႃႈ မီးၵႃႈႁိုဝ်တႄႉ ႁဝ်းၶႃႈ ဢမ်ႇလႆႈသဵၼ်ႈမၢႆမၼ်းၶႃႈ။ ၵူၼ်းၸိူဝ်းမၢတ်ႇၸဵပ်း ၸိူဝ်းၼႆႉၵေႃႈ မီးဢေႃႈ။ ၵူၺ်းၵႃႈ ႁဝ်းၶႃႈ ဢမ်ႇလႆႈသဵၼ်ႈမၢႆမၼ်းဝႆႉၶႃႈ တင်းမူတ်းလႆႈမၢတ်ႇၸဵပ်းမီးဝႆႉၵႃႈႁိုဝ် ဢၼ်ဝႃႈၼၼ်ႉ။ ၼႂ်း 212 ၵေႃႉ ပဵၼ်တွၼ်ႈတႃႇ ၼႂ်းမိူင်းတႆး ပတ်းပိုၼ်ႉၶႃႈဢေႃႈ”- ၵူၼ်းၼုမ်ႇၾၢႆႇမၢႆမီႈ ၽူႈၶဝ်ႈႁူမ်ႈၼႄၵၢင်ၸႂ် သိုပ်ႇလၢတ်ႈၼႄၼင်ႇၼႆ။
တႄႇဢဝ် ဝၼ်းတီႈ 28/2/2021 ၼႆႉမႃး ယူႇတီႈပလိၵ်ႈ/ သိုၵ်းမၢၼ်ႈ ၸႂ်ႉလၢႆးႁုၵ်းႁၢႆႉသေ ပွႆႇမၢၵ်ႇၵႅတ်ႉသ်ၼမ်ႉတႃ သႂ်ႇၼႂ်း ၾုင်ၵူၼ်းၼႄၵၢင်ၸႂ်၊ ယိုဝ်းၵူၼ်းမိူင်း၊ ၸႂ်ႉၼမ်ႉသိတ်ႇလႄႈ လမ်းတီႉၵူၼ်းမိူင်း ၵၢင်ဝၼ်း/ ၵၢင်ၶိုၼ်း ၸိူဝ်းၼႆႉမႃး ႁၢဝ်ႈ ႁႅင်း ။
ၵူၼ်းမိူင်းတႆး ဢၼ်ထုၵ်ႇပလိၵ်ႈသိုၵ်းမၢၼ်ႈ လမ်းတီႉၺွပ်းၵူၼ်းမိူင်း ၼႄၵၢင်ၸႂ် မႃးႁၢဝ်ႈႁႅင်း မိူၼ်ၼင်ႇ ၸႄႈဝဵင်းႁၢႆး ဝူဝ်း 36 ၵေႃႉ၊ ဢွင်ႇပၢၼ်း 13 ၵေႃႉ၊ ၵျွၵ်ႉမႄး 2 ၵေႃႉ၊ လႃႈသဵဝ်ႈ 37 ၵေႃႉ၊ မူႇၸေႊ 21 ၵေႃႉ၊ ၵဵင်းတုင် ႁိမ်း 20 ၵေႃႉ ဢိၵ်ႇ လူၺ်ႇထႅင်ႈလၢႆၸႄႈဝဵင်း ၵူၼ်းပိုၼ်ႉတီႈ ၵူၼ်းၼုမ်ႇ ၸိူဝ်းတူင်ႉၼိုင် ၼႂ်းပၢင်ၼႄၵၢင်ၸႂ် ဢွၼ်ၵၼ် လၢတ်ႈၼႄဝႆႉၼင်ႇ ၼႆ။
သိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်းမႃး ၶွပ်ႈတဵမ် 40 ဝၼ်း ပႃးမိူဝ်ႈၼႆႉယဝ်ႉ ဝႃႈၼႆ။
