မိူဝ်ႈၼႆႉဝၼ်းတီႈ 9/3/2021 သိုၵ်းလႄႈပလိၵ်ႈ ဢဝ်ဢဵၼ်ႁႅင်း ယႃႉၾုင် ၵူၼ်းၼႄၵၢင်ၸႂ်ယၢႆႈ တီႉၺွပ်းၵူၼ်းၼႄၵၢင်ၸႂ်ၵႂႃႇ 10 ပၢႆပႃးတင်း ၽူႈယိင်းၵေႃႉၼိုင်ႈ။
မိူဝ်ႈၼႆႉယၢမ်းၵၢင်ၼႂ် ၵၢင်ဝဵင်းလူင်တူၼ်ႈတီး ၸိုင်ႈတႆးပွတ်းၸၢၼ်းၼၼ်ႉ ဢမ်ႇမီး ပၢင်ၼႄၵၢင်ၸႂ်သင်သေတႃႉ သိုၵ်းလႄႈပလိၵ်ႈ ဢဝ်ႁႅင်းၵူၼ်း ရူတ်ႉလၢႆလၢႆလမ်းပၼ်ႇလဵပ်ႈဝဵင်း။ၸွမ်းသဵၼ်ႈတႃႈသၢႆတၢင်း ဝဵင်းတူၼ်ႈတီး မၢင်တီႈမီး ပလိၵ်ႈပႂ်ႉဝႆႉသေ ယွၼ်းတူၺ်း ၾူၼ်း မိုဝ်း ထိုဝ်ၵူၼ်းမိူင်း။
ပေႃးႁၼ်ဢၼ်ထၢႆႇဝႆႉ၊ တၢင်ႇဝႆႉႁၢင်ႈၵဵဝ်ႇၵပ်းလွင်ႈသၢၼ်ၶတ်း သိုၵ်းယိုတ်းဢႃႇၼႃႇၼႆ တီႉၺွပ်းထဵတ်ႈထၢမ်။ ႁဵတ်းႁႂ်ႈၵူၼ်းမိူင်းၵႂႃႇ မႃးႁဵတ်းၵၢၼ်ယၢပ်ႇၽိုတ်ႇ ။ဢၼ်ပလိၵ်ႈဢဝ်ႁႅင်းသေၶဝ်ႈပိုတ်းယိုဝ်းတီႉၺွပ်းၵူၼ်းၼႆႉပဵၼ်တီႈပၢင်ၼႄၵၢင်ၸႂ်ပွၵ်ႉ ၶျၢၼ်းတႃႇ ႁိမ်းၵူႇၺီႇၵူင်း ။
ၵူၼ်းၼုမ်ႇတူၼ်ႈတီးၵေႃႉၼိုင်ႈလၢတ်ႈဝႃႈ – “ပလိၵ်ႈပွႆႇမၢၵ်ႇၵႅတ်ႉသ် ၼမ်ႉတႃ ပိုတ်းယိုဝ်းၵူၼ်းၼႄၵၢင်ၸႂ်။ ၽွင်းၵူၼ်းၼုမ်ႇလႅၼ်ႈပၢႆႈၼၼ်ႉ ပလိၵ်ႈလမ်းၸွမ်းသေ ၶဝ်ႈတီႉၺွပ်းၵူၼ်းထိုင်ၼႂ်းႁိူၼ်းၵူၼ်းဝၢၼ်ႈ။ တီႉၺွပ်းၵူၼ်းၼႄၵၢင်ၵႂႃႇ 10 ၵေႃႉပၢႆ။ ၼၢင်းယိင်းဢွၼ်ႇၵေႃႉၼိုင်ႈ ၺႃးမၢၵ်ႇၵွင်ႈရႃႊပႃႊ တီႈလင်လႄႈမၢတ်ႇၸဵပ်းၵႂႃႇဢိတ်းဢွတ်း။ ၵေႃႉၼိုင်ႈသမ်ႉမဝ်းလူမ်ႉၽွင်းပၢႆႈၼီသိုၵ်းမၢၼ်ႈလိုပ်ႈလမ်း ”– ဝႃႈၼႆ။
တီႈပွၵ်ႉၶျၢၼ်းတႃႇၼႆႉ ယၢမ်းလဵဝ်တႄႉ ၵူၼ်းၼႄ ၵၢင်ၸႂ်ယၢႆႈၵၼ်ၵႂႃႇယဝ်ႉသေတႃႉ ၵူၼ်းၼုမ်ႇတႄႉဝႃႈ တိုၼ်းတေတႄႇၶိုၼ်း ပၢင်ၼႄၵၢင်ၸႂ်ထႅင်ႈၵမ်းၼိုင်ႈ ဝႃႈၼႆ။မိူဝ်ႈၼႆႉတီႈႁူင်းယႃ ၸဝ်ႈၸၢမ်ႇထုၼ်းၵေႃႈ သိုၵ်းလႄႈပလိၵ်ႈ ၵႂႃႇပၵ်းသဝ်းဢဝ်ႁူမ်ႇလူမ်ႈၼႅၼ်ႈၼႃဝႆႉ ။
မိူဝ်ႈၼႆႉ ယၢမ်းဝၢႆးဝၼ်းတႄႉ ၵူၼ်းၼုမ်ႇၵူၼ်းမိူင်း တေႁူမ်ႈၵၼ်ၶီႇရူတ်ႉ ၶိူင်ႈ ၶိုၼ်ႈလွႆၶဵဝ် (မျႃႉၸဵင်းတွင်ႇ) ဝႃႈၼႆၶႃႈဢေႃႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ