သဵင်ၵွင်ႈတႅၵ်ႇ ၸႄႈဝဵင်းမူႇၸေႊ ၽွင်းၵူၼ်းမိူင်းၼႄၵၢင်ၸႂ်သၢၼ်ၶတ်း သိုၵ်းယိုတ်းဢႃႇၼႃႇလႄႈၽွင်းသိုၵ်းလႄႈပလိၵ်ႈလမ်းတီႈၵူၼ်းၼႄၵၢင်ၸႂ်။

မိူဝ်ႈဝႃး ဝၼ်းတီႈ 7/3/2021 ယၢမ်းႁူဝ်ၶမ်ႈ မွၵ်ႈ 6 မူင်းပၢႆ သဵင်ၵွင်ႈလူင် တႅၵ်ႇႁိမ်း ဝၢၼ်ႈၼမ်ႉဢုမ် ၸႄႈဝဵင်းမူႇၸေႊ ၸိုင်ႈ တႆးပွတ်းႁွင်ႇ ဢမ်ႇယွမ်း 4 လုၵ်ႈ ။

ၵူၼ်းပိုၼ်ႉတီႈ မူႇၸေႊ ၵေႃႉၼိုင်ႈ လၢတ်ႈဝႃႈ – “ႁဝ်းၶႃႈ လႆႈငိၼ်းသဵင်ၵွင်ႈတႅၵ်ႇ တေဢမ်ႇယွမ်း မွၵ်ႈ 4 ၵမ်းၼႆႉၶႃႈ မိူဝ်ႈ ဝႃးၼႆႉ။ တၢင်းၸုမ်းလႂ် ယိုဝ်းတႄႉ ဢမ်ႇႁူႉ တႅၵ်ႇၾၢႆႇလဵဝ်ၵူၺ်းၶႃႈ။ မိူဝ်ႈၼႆႉ ယၢမ်းၵၢင်ၼႂ် မွၵ်ႈ 9 မူင်းၼႆႉ လႆႈငိၼ်းတႅၵ်ႇ ထႅင်ႈၶႃႈဢေႃႈ”- ဝႃႈၼႆ။

သဵင်ၵွင်ႈတႅၵ်ႇ မိူဝ်ႈဝႃး တီႈႁိမ်းၼမ်ႉဢုမ်ၼၼ်ႉ ယၢမ်းႁူဝ်ၶမ်ႈ 6:20 မူင်း ၵမ်းၼိုင်ႈ၊ 6:30 မူင်း ၵမ်းၼိုင်ႈ၊ 6:40 မူင်း ၵမ်း ၼိုင်ႈ လႄႈ 6:47 ၵမ်းၼိုင်ႈ ၼႆယဝ်ႉ။

ဝၢၼ်ႈၼမ်ႉဢုမ်၊ မေႃႈတွင်း၊ မၢၼ်ႈႁွင်းၼႆႉမီးၼိူဝ်သဵၼ်ႈတၢင်းလူင် မူႇ ၸေႊ – လႃႈသဵဝ်ႈ ၊မိူဝ်ႈဝၼ်းတီႈ 1/3/2021 ယၢမ်းၵၢင်ၼႂ် မွၵ်ႈ 10 မူင်းၶိုင်ႈၵေႃႈ တီႈႁိမ်း ဝၢၼ်ႈၼမ်ႉဢုမ်ၼႆႉ သဵင်ၵွင်ႈလူင်တႅၵ်ႇ ပဵၼ်လၢႆၵမ်းၼင်ႇၵဝ်ႇဝႃႈၼႆ။

ဢွင်ႈတီႈ သဵင်ၵွင်ႈတႅၵ်ႇၸိူဝ်းၼၼ်ႉ ၵမ်ႈၼမ် ပဵၼ်ၸုမ်းယိပ်းၵွင်ႈၵၢင်ႇ ယူႇသဝ်းတူင်ႉၼိုင်ဝႆႉ မိူၼ်ၼင်ႇ တပ်ႉသိုၵ်း KIA သိုၵ်း TNLA ၸုမ်းဢူၺ်းလီ ပွတ်းႁွင်ႇၸိူဝ်းၼႆႉ။   ဢွင်ႈတီႈၸိူဝ်းၼႆႉ ၸုမ်းဢူၺ်းလီ ပွတ်းႁွင်ႇ တင်း သိုၵ်း မၢၼ်ႈၵေႃႈ ၵႆႉပဵၼ်ပၢင်တိုၵ်းၵၼ်တႃႇသေႇ  ။

ၼႂ်းႁၢင်လိူၼ်ၾႅပ်ႊၿိဝ်ႊရီႊ 2021 ၼႆႉမႃး သိုၵ်းမၢၼ်ႈ ၶိုၼ်းတိုၵ်း ၸုမ်းသိုၵ်းၶၢင် KIA မႃးႁၢဝ်ႈႁႅင်း လၢႆဝၼ်းထပ်းၵၼ် တီႈ ႁိမ်းဝၢၼ်ႈတီးမႃႉ မၢၵ်ႇလူင်တူၵ်းသႂ်ႇ ႁိူၼ်းၵူၼ်းဝၢၼ်ႈ လႆႈမၢတ်ႇၸဵပ်း လူႉတၢႆ ၸွမ်းၵေႃႉၼိုင်ႈ ၼႆယဝ်ႉ။