ၵူၼ်းမိူင်းပွတ်းဢိူင်ႇမႄႈႁၢၼ်ႇ လႃႈသဵဝ်ႈဢမ်ႇႁတ်းပိုတ်ႇႁၢၼ်ႉၶၢႆၶူဝ်း ဢမ်ႇဢွၵ်ႇႁိူၼ်းယေး ၽွင်းၶၢဝ်းၵူၼ်းမိူင်း ၼႄၵၢင်ၸႂ်သၢၼ်ၶတ်းသိုၵ်းယိုတ်းဢႃႇၼႃႇ သိုၵ်း TNLA သမ်ႉႁွတ်ႈထိုင်တူင်ႉၼိုင်မႃးၼႂ်းမႄႈႁၢၼ်ႇတင်းၼမ်  ။

မိူဝ်ႈၼႆႉ 5/3/2021 ယၢမ်းၵၢင်ၼႂ်ၸဝ်ႉ ၵူၼ်းမိူင်းၼႂ်းဢိူင်ႇမႄႈႁၢၼ်ႇႁၼ်သိုၵ်း  TNLA ႁွတ်ႈၽႅဝ်ဝႆႉတင်းၼမ်ၼႆသေ       ဢမ်ႇႁတ်း ပိုတ်ႇႁၢၼ်ႉ ၶၢႆၶူဝ်းၶွင်ၵိၼ်ယႅမ်ႉ ဢမ်ႇဢွၵ်ႇႁိူၼ်းယေး  ဝႃႈၼႆ။

ၵူၼ်းၼႂ်းဢိူင်ႇမႄႈႁၢၼ်ႇ ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “ၶဝ်  ၽႅဝ်မႃးတီႈမႄႈႁၢၼ်ႇ  ၸဵမ်မိူဝ်ႈဝႃးၵၢင်ၶိုၼ်းၼႆႉၶႃႈ။ ၽိူဝ်ႇမိူဝ်ႈၼႆႉ ၵၢင်ၼႂ်ၸဝ်ႉၽႂ်ၵေႃႈဢမ်ႇႁတ်းပိုတ်ႇႁၢၼ်ႉ ပိုတ်ႇႁိူၼ်း ။   ဢမ်ႇႁတ်းဢွၵ်ႇႁိူၼ်း ယေးၵၼ်ၶႃႈဢေႃႈၼႆႉ။ လိူဝ်သေၵူၼ်းဢွၵ်ႇၼႄၵၢင်ၸႂ်ၵႂႃႈၼေႃႈ”- ဝႃႈၼႆ။

ၵူၼ်းပိုၼ်ႉတီႈလၢတ်ႈဝႃႈ သိုၵ်း TNLA ဢၼ်မႃးမီးပွတ်းဢိူင်ႇမႄႈႁၢၼ်ႇၼႆႉ ဢဵၼ်ႁႅင်း တေမီး မွၵ်ႈ 300 ၵေႃႉ။ ဢိူင်ႇမႄႈႁၢၼ်ႇၼႆႉ မီး ၾၢႆႇၸၢၼ်းဝဵင်းလႃႈသဵဝ်ႈ မီးၼႂ်းၵႄႈ  လႃႈသဵဝ်ႈ – သီႇပေႃႉ  ။

“ ၶဝ်မႃးတူင်ႉၼိုင်တၢင်းမႄႈႁၢၼ်ႇ  ၶဝ်မႃးထင်ယူႇတီႈဝၢၼ်ႈၵွင်းၶႃးၼၼ်ႉၵမ်းၼိုင်ႈ ။ ယဝ်ႉၵေႃႈ လူင်းၵႂႃႇ တၢင်းၾၢႆႇတူၵ်းတၢင်းၵႃးယဝ်ႉၶႃႈ”- ၵူၼ်းၼႂ်းဢိူင်ႇမႄႈႁၢၼ်ႇ ၵေႃႉၼိုင်ႈ သိုပ်ႇလၢတ်ႈၼႄၼင်ႇၼႆ။

 ထိုင်ယၢမ်းဝၢႆးဝၼ်းမိူဝ်ႈၼႆႉ  သိုၵ်းမၢၼ်ႈ ထႅမ်ႁႅင်းသိုၵ်းၶဝ်ႈမႃး  တၢင်းမႄႈႁၢၼ်ႇၼႆႉ တင်းၼမ်ၼႆ  သိုဝ်ႇၶၢဝ်ႇ သူၺ်ႇၽီႇမျေႇ ဢွၵ်ႇဝႆႉၼင်ႇၼႆ။

“ၼႂ်းမိူင်းႁဝ်းၶႃႈၼႆႉ   ၵၢၼ်မိူင်း ၵေႃႈသုၵ်ႉသၵ်ႉ ၊ သိုၵ်းၸၢဝ်းၶိူဝ်း သိုၵ်းမၢၼ်ႈၵေႃႈသမ်ႉ တူင်ႉၼိုင်ႁၢဝ်ႈႁႅင်းမႃး ။ ႁဝ်းၶႃႈတႄႉ ၵူဝ်ပဵၼ်ပၢင်တိုၵ်း ၵူၺ်းၶႃႈဢေႃႈ”- ၵူၼ်းၼႂ်းဢိူင်ႇမႄႈႁၢၼ်ႇ သိုပ်ႇလၢတ်ႈၼႄၼင်ႇၼႆ။

ၸုမ်းသိုၵ်းမၢၼ်ႈတႅမ်ႈဝႆႉၼႂ်းပိူင်ငဝ်ႈပိုၼ်းမိူင်း 2008  သေပၼ်ၼႃႈလိၼ်ၽွင်းငမ်းတူဝ်ၵဝ်ႇ တဢၢင်းဝႆႉပွတ်းမၢၼ်ႈတူင်ႈလႄႈ ၼမ်ႉသၼ်ႇ ။  ၵူၺ်းၵႃႈ  သိုၵ်း TNLA တႄႉ တူင်ႉၼိုင် ထိုင်ပွတ်း  လႃႈသဵဝ်ႈ ထိုင်တၢင်းၵျွၵ်ႉမႄး သီႇပေႃႉ ၊ ပွတ်းႁွင်ႇသမ်ႉထိုင် မူႇၸေႊ၊ ၼမ်ႉၶမ်း။