ပၢင်တိုၵ်းသိုပ်ႇပဵၼ်ထႅင်ႈၼႂ်းၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ၼႂ်းၶၢဝ်းတၢင်း 3-4 ဝၼ်းယဝ်ႉလႄႈ ၵူၼ်းဝၢၼ်ႈပၢႆႈၽေးသိုၵ်း ဢမ်ႇယွမ်း 500 ၵေႃႉ ဝႃႈၼႆ။
ဝၼ်းတီႈ 16/2/2021 ၼႆႉ သဵင်ၵွင်ႈတႅၵ်ႇထႅင်ႈလႄႈ ၵူၼ်းမိူင်း ဢိူင်ႇတေႃႉသၢင်ႇ ဢွၼ်ၵၼ်ပၢႆႈ ၽေးသိုၵ်း ႁွတ်ႈထိုင်ဝႆႉတီႈဝတ်ႉ ပၢင်ၸၢမ် တင်း ၵၢင်ႉၵၢင် ၼႂ်းၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ႁူဝ်ၵူၼ်း မီး 500 ပၢႆ ။
ၽူႈၸွႆႈထႅမ်ၼႂ်းတူင်ႇဝူင်းတႆး တီႈၵျွၵ်ႉမႄး လၢတ်ႈဝႃႈ – “ၵူၼ်းပၢႆႈၽေး တီႈပၢင်ၸၢမ် တႄႉ တေမီး ႁူဝ်ၵူၼ်း 400 ပၢႆ တီႈ ၵၢင်ႉၵၢင်သမ်ႉ တေမီး 100 ပၢႆ သွင်တီႈႁူမ်ႈၵၼ် တေမီး 500 ပၢႆ တေႃႇထိုင်ယၢမ်းလဵဝ် တိုၵ်ႉႁွတ်ႈမႃးယူႇတိၵ်းတိၵ်း။ ”- ဝႃႈၼႆ။
ၵူၼ်းပၢႆႈၽေးသိုၵ်းၼႆႉ ပဵၼ်ၵူၼ်းၼႂ်းဢိူင်ႇတေႃႉသၢင်ႇ ဝၢၼ်ႈၵွင်းလွင်းဝွင်း၊ တွင်ႇပလူဝ်ႉ၊ မၢၼ်ႈမႂ်ႇလႄႈ ဝၢၼ်ႈတႃႇပူဝ်ႉ ၸိူဝ်းၼႆႉ။ ၵမ်ႈၼမ်ပဵၼ်ၵူၼ်းထဝ်ႈလႄႈ လုၵ်ႈဢွၼ်ႇ။ မီးၸုမ်းၸွႆႈထႅမ် ၵူၼ်းၼႂ်းပိုၼ်ႉတီႈ လႄႈ ၸုမ်းUNHCR ၶဝ် ဢဝ်ၶူဝ်းၶွင်ၵိၼ်ယႅမ်ႉ ၶူဝ်းၼုင်ႈတၢင်းဝႆမႃးၵမ်ႉၸွႆႈ။ ယၢမ်းလဵဝ်ဢၼ်ၵူၼ်းပၢႆႈၽေးလူဝ်ႇ ပဵၼ်ယႃႈယႃ ၶတ်းၶိုၼ်ႈ၊ ယႃႈႁူဝ်ၶႆႈႁူဝ်မဝ်း ၸိူဝ်းၼႆႉဝႃႈၼႆ။
“ၵူၼ်းဝၢၼ်ႈတွင်ႇပလူဝ်ႇ၊ မၢၼ်ႈမႂ်ႇ လႄႈ ၵွင်းလွင်းဝွင်း ၸိူဝ်းၼႆႉသမ်ႉ ပၢႆႈမႃး မိူဝ်ႈဝႃး တီႈဝတ်ႉပၢင်ၸၢမ် ႁူဝ်ၵူၼ်း 400 ပၢႆ၊ တီႈဝတ်ႉၵၢင်ႉၵၢင် ႁူဝ်ၵူၼ်း 100 ပၢႆၼၼ်ႉသမ်ႉ ပၢႆႈမႃးမိူဝ်ႈသိုၼ်း တေပဵၼ်ၵူၼ်းဝၢၼ်ႈတႃႇပူဝ်ႉၶႃႈ ”- ၽူႈၸွႆႈထႅမ်ၼႂ်းတူင်ႇဝူင်းတႆး တီႈၵျွၵ်ႉမႄး လၢတ်ႈၼႄၼင်ႇၼႆ။
တႄႇဢဝ်ဝၼ်းတီႈ 13/2/2021 ၼႆႉမႃး သိုၵ်း RCSS တင်း ၸုမ်းဢူၺ်းလီပွတ်းႁွင်ႇ TNLA, SSPP လႆႈပဵၼ်ပၢင်တိုၵ်းၵၼ် တၢင်းပွတ်းဢိူင်ႇတေႃႉသၢင်ႇၵၼ် မႃးႁၢဝ်ႈႁႅင်း တေႃႇထိုင်ယၢမ်းလဵဝ် တင်းသွင်ၾၢႆႇ တိုၵ်ႉၶဵင်ႈၶႅင်ၵၢၼ်သိုၵ်းတေႃႇၵၼ်ဝႆႉ ယူႇ ဝႃႈၼႆ။
ၵူၼ်းထဝ်ႈၸိူဝ်းႁွတ်ႈထိုင်ဝတ်ႉၵျွင်း ပၢင်ၸၢမ် လၢတ်ႈတီႈၽူႈတွႆႇႁွၵ်ႈဝႃႈ – “လုၵ်ႉတီႈဝၢၼ်ႈႁဝ်းပႆမႃးမွၵ်ႈ 1 ၸူဝ်ႈမူင်းပၢႆပၢႆၼင်ႇၵဝ်ႇဢေႃႈ။ ဢမ်ႇမီးရူတ်ႉမႃးၵႃးၶႃႈလူး ပႆမႃးဢဝ်ဢေႃႈ ။ ၵမ်ႈၽွင်ႈၵေႃႈ တၢႆၽၢၵ်ႇ ဢမ်ႇၸၢင်ႈပႆ ။ ၵူၼ်းၸၢႆးၶဝ်လႆႈၸေးမႃးဢဝ်ဢေႃႈ။ ပၢင်တိုၵ်းလႆႈဝႃႈပဵၼ်ႁႅင်းဝႆႉဢေႃႈ ။ ဢမ်ႇႁတ်းယူႇလႄႈႁဝ်းၶႃႈၸင်ႇပၢႆႈမႃးဢေႃႈ”- ဝႃႈၼႆ။
လိူဝ်ၼၼ်ႉ မိူဝ်ႈဝၼ်းတီႈ 15/2/2021 ယၢမ်းဝၢႆးဝၼ်း မၢၵ်ႇလူင် တူၵ်းသႂ်ႇႁိူၼ်းယေး ၵူၼ်းဝၢၼ်ႈၵွင်းလွင်းဝွင်းလုၵ်ႈၼိုင်ႈ ၵူၼ်းဝၢၼ်ႈတိူဝ်ႉၺႃးၸၢၵ်ႇမၢၵ်ႇ လူႉတၢႆ ထင်တီႈ 2 ၵေႃႉ မၢတ်ႇၸဵပ်း 4 ၵေႃႉ။ တၢႆၵူမ်လေႃးလုၵ်ႈၼႂ်းတွင်ႉၵေႃႉၼိုင်ႈ ။
လိူဝ်ၼၼ်ႉ တီႈၸႄႈဝဵင်းၼမ်ႉတူႈၵေႃႈ မီးၵူၼ်းပၢႆႈၽေးသိုၵ်း ဢမ်ႇယွမ်း 400 ၵေႃႉ ။ တီႈသီႇပေႃႉၵေႃႈ မီးၵူၼ်းပၢႆႈၽေး သိုၵ်း 200 ပၢႆ တီႈ ၵျွၵ်ႉမႄးမီး 500 ပၢႆ ။
ဝၼ်းတီႈ1/2/2021 ၶွင်ႇသီႇသိုၵ်းမၢၼ်ႈယိုတ်းဢႃႇၼႃႇဝၢၼ်ႈမိူင်း လႄႈ ၵူၼ်းမိူင်းဝဵင်းယႂ်ႇဝဵင်းလူင်တင်းမူတ်းပတ်းပိုၼ်ႉ ႁူမ်ႈၵၼ်ၼႄၵၢင်ၸႂ်တေႃႇသိုၵ်းလူၺ်ႈလၢႆးၵတ်းယဵၼ်ၵူႈဝၼ်း။ ဝဵင်းဢွၼ်ႇလၢႆလၢႆဝဵင်းၼႂ်းၸိုင်ႈတႆးသမ်ႉ သိုၵ်းမၢၼ်ႈပိုၼ်ၽၢဝ်ႇလမ်းတီႈ ၵူၼ်းၼုမ်ႇၸိူဝ်းဢွၵ်ႇၼႄၵၢင်ၸႂ်လႄႈ ၵူၼ်းၼုမ်ႇၵမ်ႈၽွင်ႈမၢင်ဝဵင်းၺႃးတီႉ မၢင်ဝဵင်း လႆႈပၢႆႈယၢၼ်ႁိူၼ်းယေးတီႈယူႇဝႆႉၼင်ႇၵဝ်ႇ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ