ဝၼ်းတီႈ 15/2/2021 မိူဝ်ႈၼႆႉယၢမ်းဝၢႆးဝၼ်းမွၵ်ႈ 4 မူင်း သိုၵ်းလႄႈပလိၵ်ႈမၢၼ်ႈ ဢဝ်ဢဵၼ်ႁႅင်းလႄႈရူတ်ႉၵႃးသိုၵ်း လၢႆလၢႆလမ်းၶဝ်ႈႁူင်းယႃၸဝ်ႈၸၢမ်ႇထုၼ်း ဝဵင်းတူၼ်ႈတီး။
သိုၵ်းလႄႈပလိၵ်ႈဝႃႈ ဢၢၼ်းမႃးတီႉမေႃယႃလူင်လႄႈၵူၼ်းႁဵတ်းၵၢၼ်လမ်ႇလွင်ႈ 4-5 ၵေႃႉ။ ၵူၼ်းမိူင်းတၼ်းမႃးၶိုတ်းသေၼႄၵၢင်ၸႂ်လႄႈ သိုၵ်းလႆႈပွႆႇပၼ်မေႃယႃၶိုၼ်း။
ၵူၼ်းၼႂ်းဝၢင်းႁူင်းယႃလၢတ်ႈဝႃႈ – “ၶဝ်ၵေႃႈပွႆႇပၼ်မေႃယႃၶိုၼ်းလႄႈ မေႃယႃလူင်ၶဝ်တၼ်းငိူင်ႉဝႄႈလွတ်ႈမူတ်းၶႃႈဢေႃႈ။ၵူၼ်းႁဵတ်းၵၢၼ်ၼႂ်းႁူင်း ယႃ တွႆႇမေႃႈတွႆႇပုင်း။ သိုၵ်းသမ်ႉဢဝ်မၢၵ်ႇၵၢင်ႇၵွၼ်ၼ်ပိုတ်းၵူၼ်းၼႂ်းႁူင်းယႃ။ ယႃႉသေႃးႁွင်ႈလိုဝ်ႈသဝ်းမေႃယႃသေၶဝ်ႈသွၵ်ႈလူးၵွၼ်ႇ”- ဝႃႈၼႆ။
ၸဝ်ႈၼႃႈတီႈၼႂ်းဝၢင်းႁူင်းယႃ ႁႄႉႁၢမ်ႈလႄႈ ပလိၵ်ႈၸႂ်ႉမၢၵ်ႇတႅၵ်ႇ (ၸဵင်ႇယွင်ႇၶျီႇ ) ဢၼ်ႁူင်းမၢၵ်ႈမိုဝ်ႈၸိုၼ်းယၢမ်းသိုၵ်း ႁဵတ်းဢွၵ်ႇၸႂ်ႉၼၼ်ႉထိုမ်ႈသႂ်ႇ ၵူၼ်း ႁဵတ်းၵၢၼ်။ ႁဵတ်းႁႂ်ႈၵူၼ်းပဵၼ်ၸိူဝ်းၵိုတ်းၼႂ်းႁူင်းယႃ တူၵ်းၸႂ်။
“ၶဝ်ဢဝ်မၢၵ်ႇတႅၵ်ႇၸိူင်ႉပိူၼ်ႈလဵၼ်ႈလိူၼ်သိပ်းဢဵတ်းၼၼ်ႉထိုမ်ႈသႂ်ႇႁဝ်းဢေႃႈ ။ ထိုမ်ႈပဵၼ် 4-5 လုၵ်ႈၸိူဝ်းၼႆႉၶႃႈယူဝ်ႉ။ဢၼ်ဢမ်ႇတႅၵ်ႇၵေႃႈ မီးဢေႃႈ။ ၵူၼ်းတႄႉဢမ်ႇတိူဝ်ႉမၢတ်ႇၶႃႈ ”- ၽူႈႁၢပ်ႇၵၢၼ်ၼႂ်းႁူင်းယႃၸဝ်ႈၸၢမ်ႇထုၼ်း ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈၼင်ႇၼႆ။
ၽွင်းၼၼ်ႉ ပလိၵ်ႈလႄ သိုၵ်းထႅင်ႈၸုမ်းၼိုင်ႈသမ်ႉ မီးၼိူဝ်တၢင်းလူင် ၼႃႈႁူင်းယႃ ။ပိၵ်ႉဝႆႉၽၵ်းတူ တၢင်းၶဝ်ႈႁူင်းယႃတင်းသွင်ၾၢႆႇ။ ၵူၼ်းမိူင်း ၵႂႃႇၼေၵၢင်ၸႂ် ၵတ်းၵတ်းယဵၼ်ယဵၼ် ။
ၵူၼ်းမိူင်းဢၼ်ၶဝ်ႈပႃးၼႂ်းၼႄၵၢင်ၸႂ်ၵေႃႉၼိုင်ႈလၢတ်ႈဝႃႈ – “ၶဝ်ၵေႃႈဢဝ်ရူတ်ႉၵႃးၶွၵ်ႈၼၼ်ႉ မႃးတီႈၼႃႈၵူၼ်းမိူင်းသေ ၸႂ်ႉၶိုၼ်ႈတူၺ်းၼိူဝ်ရူတ်ႉ ။
ဢမ်ႇႁၼ်မီးမေႃယႃသေၵေႃႉလႄႈ ၶဝ်ၵေႃႈၸႂ်ႉၵူၼ်းမိူင်းပွၵ်ႈမိူဝ်း ။ ၵူၼ်းမိူင်းၵေႃႈပွၵ်ႈမိူဝ်းႁင်းၽႂ်မၼ်း။ ငိၼ်းၶၢဝ်ႇဝႃႈ ယၢမ်းၵၢင်ၶမ်ႈၼႆႉ ၶဝ်ၵႂႃႇထႅင်ႈတီႈႁူင်းယႃ။
ၵူၺ်းၵႃႈ ဢမ်ႇတီႉလႆႈ မေႃယႃ ”- ဝႃႈၼႆ။
ၽွင်းပလိၵ်ႈၶဝ်သွၵ်ႈႁူင်းယႃၼၼ်ႉ ၵိုတ်းမေႃယႃဢွၼ်ႇ 2 ၵေႃႉဢၼ်တူၵ်းပုၼ်ႈၽွၼ်းမႃးတူၺ်း ၵူၼ်းပဵၼ်ဢၼ်ႁၢဝ်ႈႁႅင်းလႄႈ ၵူၼ်းပဵၼ်ဢၼ်လႅၵ်ႈတႂ် ဝႆႉ ၼၼ်ႉၵူၺ်းယဝ်ႉ လႆႈႁူႉၼင်ႇၼႆ။
