ၵူၼ်းၼုမ်ႇပၢင်လူင်ၼႄၵၢင်ၸႂ်သၢၼ်ၶတ်းသိုၵ်းယိုတ်းဢႃႇၼႃႇ ဝၼ်းထူၼ်ႈသွင် ယိူင်းဢၢၼ်း တႃႇႁႂ်ႈၵူၼ်းၼုမ်ႇမိူဝ်းၼႃႈ လႆႈလိူၵ်ႈသဵၼ်ႈတၢင်းၸဝ်ႈၵဝ်ႇလွတ်ႈလႅဝ်းဝႃႈၼႆ။

ဝၼ်းတီႈ 9 /2/2021 ၵူၼ်းၼုမ်ႇပၢင်လူင် လွႆလႅမ် ဢိၵ်ႇပႃးၵူၼ်းမိူင်းႁူမ်ႈၵၼ် တင်းမူတ်းမွၵ်ႈ 5000 ဢွၵ်ႇၼေၵၢင်ၸႂ် သၢၼ်ၶတ်းသိုၵ်းယိုတ်းဢႃႇၼႃႇၸိုင်ႈမိူင်း။

ယၢမ်းၵၢင်ၼႂ်မွၵ်ႈ 9 မူင်း ၵူၼ်းၼုမ်ႇပၢင်လူင်  ၸုမ်းလုၵ်ႈႁဵၼ်း  ၶွၼ်ႈတုမ်ၵၼ်ၼႃႈၵျွင်းၵၢင်ဝဵင်းပၢင်လူင် တီႈၼိုင်ႈ လႄႈၵူၼ်းမိူင်းပၢင်လူင်လွႆလႅမ်သမ်ႉ ၶွၼ်ႈၵၼ်တီႈၼႃႈၵျွင်း ၼတလ  ။ ဢၢၼ်းႁူမ်ႈၵၼ်ပၼ်ႇ လဵပ်ႈဝဵင်းၼႄၵၢင်ၸႂ် သၢၼ်ၶတ်းသိုၵ်းယိုတ်းဢႃႇၼႃႇၼႆသေတႃႉ ရူတ်ႉသိုၵ်း 2 လမ်းလႄႈ ပလိၵ်ႈ 1 လမ်း ဢဝ်ဢဵၼ်ႁႅင်းမႃးလွၵ်ႇငိုတ်ႈပႂ်ႉဝႆႉၼႃႈသဝ်ႁိၼ်လႄႈ ဢမ်ႇတၼ်းလႆႈပၼ်ႇလဵပ်ႈ ဝဵင်းၼင်ႇ ၵၢင်ၸႂ်ယိူင်းဢၢၼ်း။

ၸၢႆးမၢဝ်ႇ ၵေႃႉဢၼ်ၶဝ်ႈပႃးၼႂ်းပၢင်ၼႄၵၢင်ၸႂ်ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ -“ မိူဝ်ႈတႄႇတႄႉ ႁဝ်းၶႃႈဢၢၼ်းႁူမ်ႈၵၼ် ၼႃႈသဝ်ႁိၼ်သေ ၼႄၵၢင်ၸႂ်၊ ဢၢၼ်းတေပႆပၼ်ႇလဵပ်ႈဝဵင်းသေ ၵႂႃႇထိုင်လွႆလႅမ် ၸိူဝ်းၼႆႉၼႆ။ ၵူၺ်းၵႃႈငဝ်းလၢႆးဢမ်ႇပၼ်မႃးလႄႈ ၸင်ႇလႆႈပိၼ်ႇၽႅၼ်ဢွၼ်ၵၼ်ၵႂႃႇလွႆလႅမ်။ တီႈလွႆလႅမ်သမ်ႉ ရူတ်ႉၵႃးသိုၵ်းပႂ်ႉဝႆႉထႅင်ႈ 3-4 တီႈ ႁဝ်းၶႃႈၵေႃႈ ပၼ်ႇလဵပ်ႈလွႆလႅမ်သေ ၶိုၼ်းပၼ်ႇမႃးပၢင်လူင် ။ ဢဵၼ်ႁႅင်းၵေႃႈ ၵူၼ်းမိူင်းၶိုၼ်းၶဝ်ႈမႃးႁွမ်းထႅင်ႈလႄႈ ပဵၼ်ၵႂႃႇမွၵ်ႈ 5000-6000 ၼႆႉ”- ဝႃႈၼႆ။

ယိူင်းဢၢၼ်းၵူၼ်းပၢင်လူင်ၼႄၵၢင်ၸႂ်မိူဝ်ႈၼႆႉ ၼွၵ်ႈလိူဝ်သေ ႁႂ်ႈသိုၵ်းၸဵဝ်းဝၢင်းၽႃႈပွႆႇဢႃႇၼႃႇပၼ် လူင်ပွင်ၸိုင်ႈၵူၼ်းမိူင်းသေဢမ်ႇၵႃး ယိူင်းဢၢၼ်းတႃႇမိူဝ်းၼႃႈၵူၼ်းၼုမ်ႇ ႁႂ်ႈလႆႈႁႃတၢင်းၶိုၼ်ႈယႂ်ႇႁင်းၵဝ်ႇလွတ်ႈလွတ်ႈလႅဝ်းလႅဝ်းဝႃႈၼႆ။

ၸၢႆမၢဝ်ႇၽူႈဢွၼ်ႁူဝ် ၵူၼ်းပၢင်လူင်ၼၼ်ႉ သိုပ်ႇလၢတ်ႈထႅင်ႈဝႃႈ – “ပိူင်လူင်မၼ်းတႄႉ တႃႇၵူၼ်းၼုမ်ႇ ႁဝ်းမိူဝ်းၼႃႈ လႆႈလိူၵ်ႈသဵၼ်ႈတၢင်းပႆ လႄႈ ႁႃတၢင်းၶိုၼ်ႈယႂ်ႇၸဝ်ႈၵဝ်ႇ လႆႈလွတ်ႈလွတ်ႈလႅဝ်းလႅဝ်း ။ သင်ဝႃႈႁဝ်းယွမ်းႁပ်ႉလွင်ႈၸုမ်းၶဝ်ႁဵတ်းတေႃႇၵူၼ်းမိူင်းယူႇယၢမ်းလဵဝ်ၼႆႉၼႆၸိုင် မိူဝ်းၼႃႈမႃး ပေႃးၸုမ်း ၶဝ်ဢဵၼ်ႁႅင်းယႂ်ႇမႃးတိၵ်းတိၵ်း ၵူၼ်းမိူင်းႁဝ်းၸွင်ႇတေၸၢင်ႈဢဝ်ၶူႈလင်ၸဝ်ႈၵဝ်ႇထူၺ်ႈၸႂ်ၼႆ ၶႅၼ်းတေႃႈဝူၼ်ႉတူၺ်းႁင်းၽႂ်မၼ်း ”- ဝႃႈ ၼႆ။

ၵူၼ်းၼုမ်ႇၵူၼ်းမိူင်းပၢင်လူင်ၼႆႉ မိူဝ်ႈဝႃးၵေႃႈ ႁူမ်ႈၵၼ်ပႆတၢင်းၼႄၵၢင်ၸႂ် ၵၢင်ဝဵင်းပၢင်လူင်ယဝ်ႉၵမ်းၼိုင်ႈ။ မိူဝ်ႈဝႃးတႄႉဢဵၼ်ႁႅင်းၵူၼ်းဢမ်ႇၼမ်ပဵင်းၼႆႉ၊ သိုၵ်းလႄႈ ပလိၵ်ႈၵေႃႈဢမ်ႇဢဝ်ဢဵၼ်ႁႅင်းယႂ်ႇၼမ်မႃးပႂ်ႉဝႆႉၸိူင်ႉၼႆ။