ၵူၼ်းမိူင်းၼႂ်းၸႄႈဝဵင်းတူၼ်ႈတီး သိုပ်ႇသၢၼ်ၶတ်းၼႄၵၢင်ၸႂ် တေႃႇသိုၵ်းယိုတ်းဢႃႇၼႃႇ ထႅင်ႈဢဵၼ်ႁႅင်းၵူၼ်းမိူင်းၼမ်လိူဝ်ၵဝ်ႇ ႁွင်ႈၵၢၼ်လူင်ပွင်ၸိုင်ႈ ၶဝ်ႈႁူမ်ႈၸွမ်းတင်းၼမ် ။
မိူဝ်ႈၼႆႉ ဝၼ်းတီႈ 9/2/2021 ယၢမ်းၵၢင်ၼႂ် 8 မူင်း ၸဵမ်ၵူၼ်းမိူင်း ၵူၼ်းၼုမ်ႇ ပႃးၸဵမ် ႁွင်ႈၵၢၼ်လူင်ပွင်ၸိုင်ႈ ဢဵၼ်ႁႅင်း မိုၼ်ႇပၢႆ ႁူမ်ႈၵၼ် ပႆတၢင်းသိုပ်ႇၼႄၵၢင်ၸႂ် တေႃႇသိုၵ်းမၢၼ်ႈယိုတ်းဢႃႇၼႃႇ တႄႇဢဝ်မိၼ်းၵျွင်း ပႆတၢင်းထိုင်ၼႃႈလုမ်း သၽႃးၸႄႈမိူင်းတႆး ၼႂ်းၸႄႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း ။
“မိူဝ်ႈၼႆႉ တီႈပၢင်ၼႄၵၢင်ၸႂ်ၼႆႉ ပႃးမႃးႁွင်ႈၵၢၼ်ပၢႆးပၺ်ၺႃလႄႈ ၾၢႆႇပၢႆးယူႇလီ ဢဵၼ်ႁႅင်းၵူၼ်းမိူင်းၼႆႉတႄႉ ႁၢၼ်ႉၸႂ် လီတႄႉၶႃႈ။ မိူဝ်ႈတႄႇမၼ်း ပလိၵ်ႈ/ ယေး ဢမ်ႇၶႂ်ႈပၼ်ဢွၵ်ႇၼႄၵၢင်ၸႂ် ယူႇတီႈၵူၼ်းမိူင်းၵေႃႈဢမ်ႇယွမ်း ၵူၺ်းၵႃႈဝၢႆးမႃးၶဝ်ပိုတ်ႇပၼ်ၵူၼ်းမိူင်းၼႄၵၢင်ၸႂ်ၵႂႃႇၶႃႈ”- ၵူၼ်းဢွၵ်ႇၼႄၵၢင်ၸႂ် တီႈတူၼ်ႈတီး ၵေႃႉၼိုင်ႈ လၢတ်ႈၼႄၼင်ႇၼႆ။
ပၢင်ၼႄၵၢင်ၸႂ် တီႈဝဵင်းတူၼ်ႈတီး မိူဝ်ႈၼႆႉ ယူႇတီႈၾၢႆႇပလိၵ်ႈ/ ယေး ဢဝ်လွင်ႈႁူမ်ႇလူမ်ႈ ၼမ်မႃးလိူဝ်ၵဝ်ႇ။ ၸွမ်း သဵၼ်ႈတၢင်းလူင် ၸွမ်းၵိဝ်ႇ ၸိူဝ်းၼႆႉၵေႃႈ ထႅမ်ႁႅင်းၵူၼ်း မႃးထႅင်ႈလိူဝ်ၵဝ်ႇ ဝႃႈၼႆ။
“မိူဝ်ႈဝႃး ၸွမ်းသဵၼ်ႈတၢင်းလူင် ၸိူဝ်းၼႆႉတႄႉ ဢမ်ႇႁၼ်ပလိၵ်ႈ ၶဝ်မႃးပႂ်ႉၶႃႈ မိူဝ်ႈၼႆႉ ပလိၵ်ႈၶဝ်မႃးပႂ်ႉဢဝ်ႁူမ်ႇလူမ်ႈၼမ် လိူဝ်မိူဝ်ႈဝႃးၶႃႈဢေႃႈ၊ ၸုၵ်းပႂ်ႉၸွမ်း ၶၢင်ႈတၢင်းၸိူဝ်းၼႆႉၵေႃႈ ၼမ်ၼႃႇၶႃႈ။ ယဝ်ႉၵေႃႈ ပႂ်ႉၸွမ်းဢွင်ႈတီႈၵူၼ်းမိူင်းၶွၼ်ႈ တုမ်ၵၼ် ၸိူဝ်းၼႆႉၵေႃႈၼမ်”- ၽူႈၼႄၵၢင်ၸႂ် သိုပ်ႇလၢတ်ႈၼႄၼင်ႇၼႆ။
ပၢင်ၼႄၵၢင်ၸႂ် တီႈဝဵင်းတူၼ်ႈတီးၼႆႉ တႄႇ မႃးမိူဝ်ႈဝၼ်းတီႈ 7/2/2021 ယၢမ်းဝၢႆးဝၼ်း တေႃႇထိုင်ဝၼ်းမိူဝ်ႈၼႆႉ တိုၵ်ႉ သိုပ်ႇၼႄၵၢင်ၸႂ်ယူႇ ၵူၼ်းမိူင်းတိူဝ်းလိူဝ်ၼမ်မႃးထႅင်ႈ။ၼႂ်းမိူင်းတႆး လၢႆၸႄႈဝဵင်းၵေႃႈ ၵူၼ်းမိူင်းႁူမ်ႈၵၼ် ဢွၵ်ႇၼႄၵၢင်ၸႂ်သၢၼ်ၶတ်းတေႃႇသိုၵ်းမၢၼ်ႈယိုတ်း ဢႃႇၼႃႇမႃး ႁၢဝ်ႈႁႅင်း ။
ၵဵဝ်ႇၵပ်းလွင်ႈၼႆႉ ၸၢႆးဢွင်ႇမျိၼ်ႉဢူး ၵူၼ်းၼုမ်ႇ ၽူႈလူင်ႉလႅၼ်ႇၾၢႆႇပၢႆးမၢႆႈမီႈ လၢတ်ႈတီႈၽူႈတွႆႇႁွၵ်ႈဝႃႈ – ပေႃးႁဝ်းမႃးတူၺ်း ပၢင်ၼႄၵၢင်ၸႂ်မိူဝ်ႈပၢၼ် 1988 လႄႈ ပၢင်ၼႄၵၢင်ၸႂ် ဝၼ်းမိူဝ်ႈၼႆႉ 2021 ၼႆႉ မၼ်းပိူင်ႈၵၼ်ၸိူင်ႉႁိုဝ်လႃႇၼႆ ဝၼ်းမိူဝ်ႈၼႆႉ မၼ်းၶိုတ်းၵၢပ်ႈၶိုတ်းပၢၼ်လိူဝ်။ ဢိၼ်ႊထိူဝ်ႊၼႅတ်ႉ – သိုဝ်ႇၼႅင်ႈသၢၼ် ၸိူဝ်းၼႆႉ မၼ်းၸႂ်ႉလႆႈၵူႈၶၢဝ်းယၢမ်းလႄႈ လုမ်ႈၾႃႉၵေႃႈလႆႈႁူႉၸွမ်းၶိုတ်းတၼ်း။ လုမ်ႈၾႃႉပၵ်းတႃပႂ်ႉတူၺ်းဝႆႉလႄႈ ပၢင်ၼႄၵၢင်ၸႂ်ဝၼ်းမိူဝ်ႈၼႆႉ သိုၵ်းတေဢမ်ႇၸၢင်ႈႁဵတ်းႁၢဝ်ႈႁႅင်းလႆႈမိူၼ်မိူဝ်ႈၵွၼ်ႇ ။ ၵွပ်ႈၼႆ ၵူၼ်းၼုမ်ႇၶဝ်ၵေႃႈ မီးတၢင်းႁတ်းႁၢၼ်လိူဝ်ၵဝ်ႇတႃႇတေႃႇသူႈ တႃႇလႆႈလွင်ႈမၢၼ်ႇမႅၼ်ႈပဵၼ်ထမ်းၼႆႉ- ဝႃႈၼႆ။
မိူဝ်ႈဝၼ်းတီႈ 1/2/2021 ယၢမ်းၵၢင်ၼႂ်ၸဝ်ႉ ယူႇတီႈသိုၵ်းမၢၼ်ႈ ၶဝ်ႈယိုတ်းဢမ်းၼၢတ်ႈလူင်ပွင်ၸိုင်ႈ ဢၼ်ယူႇတီႈၵူၼ်း မိူင်းယုၵ်ႉတၢင်ႇဝႆႉၼၼ်ႉသေ ယၢမ်းလဵဝ် ယူႇတီႈၵူၼ်းမိူင်း ၼႂ်းမိူင်းႁူမ်ႈတုမ် ႁူမ်ႈၵၼ် ဢွၵ်ႇၼႄၵၢင်ၸႂ်သၢၼ်ၶတ်း တေႃႇ သိုၵ်းမၢၼ်ႈယိုတ်းဢမ်းၼၢတ်ႈမႃး ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ