ၵူၼ်းမိူင်းပၢႆႈၽေးသိုၵ်း ၸိူဝ်းႁွတ်ႈၽႅဝ်သွၼ်ႈသဝ်းဝႆႉတီႈ ၼႂ်းဢိူင်ႇၵွင်းၵေႃႇ ၸႄႈဝဵင်းသႅၼ်ဝီၼၼ်ႉ တေႃႈလဵဝ် ဢွၼ်ၵၼ်ႁၢင်ႈႁႅၼ်းတႃႇပွၵ်ႈၶိုၼ်းႁိူၼ်းယေးၽႂ်မၼ်းယဝ်ႉ ယွၼ်ႉဝႃႈ ငဝ်းလၢႆးပၢင်တိုၵ်းသိုၵ်းသိူဝ် ၼိမ်သဝ်းယဝ်ႉ ဝႃႈၼႆ။
ဝၼ်းတီႈ 19/02/2018 ယၢမ်းဝၢႆးဝၼ်း 4 မူင်း ၵူၼ်းပၢႆႈၽေးသိုၵ်း မွၵ်ႈ 3-4 ၵေႃႉ ႁူမ်ႈၵၼ် ဢွၼ်ၵၼ်ပွၵ်ႈမိူဝ်း တူၺ်းငဝ်းလၢႆး တၢင်းဝၢၼ်ႈဝႃႈ ၸွင်ႇတေပွၵ်ႈမိူဝ်းလႆႈ ဢမ်ႇပွၵ်ႈမိူဝ်းလႆႈဢၼ်ဝႃႈၼၼ်ႉ။ ယွၼ်ႉဝႃႈ သိုၵ်းလူင် ပွင်ၸိုင်ႈတင်း ၸုမ်းဢူၺ်းလီပွတ်းႁွင်ႇ ၽႃႇၺႃးၵၼ် တၢင်းဝၢၼ်ႈႁူဝ်မွၼ်း ၼႂ်းဢိူင်ႇၵွင်းၵေႃႇသေ ႁဵတ်းႁႂ်ႈ ၵူၼ်း ဝၢၼ်ႈပၢႆႈဢွၵ်ႇမႃး သွၼ်ႈသဝ်းဝႆႉတီႈ ဝတ်ႉဝိႁၢရ်လူင် ဢိူင်ႇၵွင်းၵေႃႇ ၸႄႈဝဵင်းသႅၼ်ဝီ ၸႄႈတွၼ်ႈလႃႈသဵဝ်ႈ ၸိုင်ႈတႆး ပွတ်းႁွင်ႇ ဝႃႈၼႆ။
ၸၢႆးၸိင်ႇလူႇ ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈမၢႆ 2 ၸႄႈဝဵင်းသႅၼ်ဝီ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ မိူဝ်ႈဝႃးတႄႉ လႆႈသူင်ႇၵူၼ်းၼုမ်ႇ 3-4 ၵေႃႉသေ မိူဝ်းတူၺ်းငဝ်းလၢႆးတၢင်းဝၢၼ်ႈၶဝ်၊ သင်ဝႃႈ မၼ်းၼိမ်သဝ်း ဢမ်ႇမီးလွင်ႈသုၵ်ႉယုင်ႈယဝ်ႉ တေဢွၼ်ၵၼ်ပွၵ်ႈမိူဝ်းၶိုၼ်း မိူဝ်ႈၼႆႉ။ ၵူၺ်းၵႃႈ တေႃႈလဵဝ်ၶဝ် သမ်ႉဢွၵ်ႇ တၢင်းဝႆႉလႄႈ လႆႈပွၵ်ႈမိူဝ်းႁိုဝ် ဢမ်ႇလႆႈပွၵ်ႈမိူဝ်းၼႆၼၼ်ႉ ပႆႇလႆႈႁူႉ။ ၾၢႆႇသိုၵ်းမၢၼ်ႈတႄႉ လၢတ်ႈဝႃႈ ဢွၼ်ၵၼ်ပွၵ်ႈမႃးလႃႈ ႁဝ်းဢမ်ႇၵဝ်းသင် ၶဝ်ပၼ်ၵႂၢမ်းမၼ်ႈႁဵတ်းၼၼ်သေ ၸင်ႇလႆႈၸႂ်ႉလုၵ်ႈဢွၼ်ႇၸၢႆးၼုမ်ႇ ၸိူဝ်းၼႆႉ မိူဝ်းတူၺ်းငဝ်းလၢႆး” ဝႃႈၼႆ။
ၵဵဝ်ႇၵပ်းလွင်ႈၼႆႉ ၵူၼ်းမိူင်း ဝၢၼ်ႈႁူဝ်မွၼ်း ဢိူင်ႇၵွင်းၵေႃႇ ဢွၼ်ၵၼ်ပၢႆႈမႃး တင်းမူတ်း 43 လင်ႁိူၼ်း၊ ႁူဝ်ၵူၼ်း 227 ၵေႃႉ ၵမ်ႈၼမ် ပဵၼ်ၸၢဝ်းၶိူဝ်း ပီႈၼွင်ႉၶႄႇမႅဝ်ႉ၊ ၶႄႇၵူဝ်းၵၢင်ႉ။ ယွၼ်ႉသိုၵ်းလူင်ပွင်ၸိုင်ႈမၢၼ်ႈတင်း တပ်ႉသိုၵ်းၵဝ်ႈၵၢင်ႉ(ၵူဝ်းၵၢင်ႉ) ၽႃႇၺႃးၵၢၼ် ႁိမ်းဝၢၼ်ႈႁူဝ်မွၼ်းသေ သွင်ၾၢႆႇလႆႈပဵၼ်ပၢင်တိုၵ်းၵၼ် ၼႂ်းဝၼ်းတီႈ 14/02/2018။ ထိုင်မႃး ဝၼ်းတီႈ 15/02/2018 သမ်ႉ ၵူၼ်းမိူင်း 200 ပၢႆၸင်ႇဢွၼ်ၵၼ်ပၢႆႈဢွၵ်ႇမႃး ဝႃႈၼႆ။
ဝၢၼ်ႈႁူဝ်မွၼ်းၼႆႉ ယူႇၼႂ်းဢိူင်ႇၵွင်းၵေႃႇ လုၵ်ႉတီႈဢိူင်ႇၵွင်းၵေႃႇ ၵႂႃႇၸူးတီႈဝၢၼ်ႈႁူဝ်မွၼ်းၸိုင် တေမီးယူႇ 17 လၵ်း၊ သင်ဝႃႈ လုၵ်ႉၼႂ်းၸႄႈဝဵင်းသႅၼ်ဝီ ၵႂႃႇၸူးဢိူင်ႇၵွင်းၵေႃႇၸိုင် တေမီးယူႇ 4 လၵ်း။ သင်ဝႃႈ လုၵ်ႉတီႈ ဝၢၼ်ႈႁူဝ်မွၼ်း- ၵႂႃႇဝဵင်းသႅၼ်ဝီၸိုင် တေမီး 20 လၵ်းပၢႆ ဝႃႈၼႆ။
