ဢိင်ၼိူဝ်တိုဝ်ႉတၢင်း ပၢင်ပွႆးယုၵ်ႉယွင်ႈၸဝ်ႈၶူးမေႃလိၵ်ႈတႆး ပွၵ်ႈၵမ်း 42 တီႈဝၢၼ်ႈမႂ်ႇမွၵ်ႇၸၢမ်ၼႆႉသေ ၽူႈပွင် ၵၢၼ်ပၢင်ပွႆး ၸတ်းႁဵတ်း ပႃးပၢင်ႁူပ်ႉထူပ်းပီႈၼွင်ႉတႆးၵူႈၾၢႆႇၾၢႆႇ၊ ၼင်ႇႁိုဝ် ပီႈၼွင်ႉတႆး ၸိူဝ်းယူႇသဝ်း ၼႂ်းမိူင်း ထႆးလႄႈ မိူင်းတႆး ပေႃးတေၶဝ်ႈ ဢွၵ်ႇႁႃၵၼ်ငၢႆႈလႄႈ ၶဝ်ႈဢွၵ်ႇႁႃၵၼ်ယူႇတႃႇသေႇ ဝႃႈၼႆ။

ဝၼ်းတီႈ 18/02/2018 ယၢမ်းၵၢင်ၼႂ် 9 မူင်း ထိုင် 12 မူင်း ၵၢင်ဝၼ်း ပီႈၼွင်ႉတႆး မႄႈႁွင်ႈသွၼ်၊ မႄႈသွတ်ႇ၊ ၵဵင်းမႆႇ၊ ၵုင်းထဵပ်ႈ၊ မႄႈဢၢႆး၊ ၶျႆးပၵၢၼ်း၊ မိူင်းၾၢင်၊ ဝၢၼ်ႈမႂ်ႇမွၵ်ႇၸၢမ်၊ ၵဵင်းႁၢႆးလႄႈ လုၵ်ႈႁဵၼ်းၸၼ်ႉၸွမ် ၵဵင်းတုင် လႄႈ ၸုမ်းမွၵ်ႇၵွၼ်ၼုမ်ႇၵဵင်းတုင် ႁူပ်ႉထူပ်းၵၼ် တီႈဝတ်ႉဝိႁၢရ်လူင် ဝၢၼ်ႈမႂ်ႇမွၵ်ႇၸၢမ် ဢိူင်ႇတႃႈတွၼ်း ၸႄႈ ဝဵင်းမႄႈဢၢႆး ၸႄႈတွၼ်ႈၵဵင်းမႆႇ ၸိုင်ႈထႆး မီးၽူႈၶဝ်ႈႁူမ်ႈတင်းမူတ်း ႁိမ်း 100 ပၢႆ ဝႃႈၼႆ။

ၸၢႆးသႅင်ယ ၵေႃၵမ်ၵၢၼ်ပွင်ပဵၼ်ပၢင်ပွႆးယုၵ်ႉယွင်ႈၸဝ်ႈၶူးမေႃလိၵ်ႈတႆး/ ႁူဝ်ပဝ်ႈ ၵေႃလိၵ်ႈလၢႆးလႄႈၾိင်ႈငႄႈတႆး ၵဵင်းမႆႇ လၢတ်ႈတီႈၸုမ်း ၶၢဝ်ႇၽူႈတွႆႇႁွၵ်ႈဝႃႈ “ ဢၼ်ႁဝ်းၸတ်းႁဵတ်းပၢင်ႁူပ်ႉထူပ်းၵၼ်တီႈဝၢၼ်ႈမႂ်ႇမွၵ်ႇၸၢမ်ၼႆႉ မိူဝ်ႈပူၼ်ႉမႃး 20 ပီပၢႆၼၼ်ႉ ႁဝ်းယၢမ်ႈၸတ်းႁဵတ်းမႃး မိူဝ်ႈတေၽၢတ်ႇၵၼ်ၼၼ်ႉ ႁဝ်းၶႃႈ သူင်ႇသင်ႇၵၼ် ယႃႇႁႂ်ႈလိုမ်းၵၼ် ၼႂ်းသုၼ်ႇတူဝ် လႄႈသင်၊ ၼႂ်းၾိင်ႈငႄႈလိၵ်ႈလၢႆးၸိူဝ်ႉၸၢတ်ႈႁဝ်းလႄႈသင် ႁဝ်းတေမီးပၢင်ႁူပ်ႉထူပ်းသူင်ႇသင်ႇၵၼ် ၵူႈပီ မိူဝ်ႈ ပူၼ်ႉမႃး 20 ပီပၢႆၼၼ်ႉ ႁဝ်းယၢမ်ႈမီးမႃး။ ၵူၺ်းၵႃႈ ဝၢႆးလင်လိုၼ်းၼႆႉမႃး ႁဝ်းၶႃႈလႆႈၶၢတ်ႇႁၢႆၵႂႃႇ ၵွပ်ႈပိူဝ်ႈဝႃႈ ၵူၼ်းၼုမ်ႇလၢႆတီႈလၢႆတၢင်းၵေႃႈ ဢမ်ႇလႆႈၶဝ်ႈႁူမ်ႈၸွမ်း၊ ပၢင်ႁူပ်ႉထူပ်းၼႆႉ တိုၵ်ႉမီးမႃးၶိုၼ်းလႆႈသၢမ်ပီ ပႃး ပီၼႆႉၶိုၼ်းၵူၺ်း။ ၵွပ်ႈဝႃႈ ၵူၼ်းၼုမ်ႇတီႈၵဵင်းတုင်ၵေႃႈ မႃးၶဝ်ႈႁူမ်ႈၼမ်သေ ႁဝ်းၵေႃႈ ၶိုၼ်းၶုၵ်းၶူၼ်ႉသွၵ်ႈဢဝ် ၽဵင်းၵႂၢမ်းသူင်ႇသင်ႇၵၼ် ဢၼ်ဝႃႈ ဝူင်းဝၼ်းတႆး ဢၼ်ယၢမ်ႈၸတ်းႁဵတ်းမႃး 30 ပီပၢႆၼၼ်ႉ သူင်ႇသင်ႇၵၼ်” ဝႃႈၼႆ။

ပၢင်ႁူပ်ႉထူပ်းၼႆႉ မီးၽႅၼ်ၵၢၼ်တေၸတ်းႁဵတ်းၵႂႃႇၵူႈပီပီ တွၼ်ႈတႃႇပီႈၼွင်ႉတႆး ၸိူဝ်းယူႇသဝ်းၼႂ်းမိူင်းထႆး လႄႈ မိူင်းတႆး ပေႃးတေမီးလွင်ႈမိုတ်ႈၵိုဝ်းၸမ်ၸႂ်ၵၼ်သေဢမ်ႇၵႃး။ ၼင်ႇႁိုဝ် တေၵွင်ႉႁႃၵၼ်လႆႈငၢႆႈမႃး လိူဝ်ၵဝ်ႇ ၸိူဝ်းၼၼ်ႉ ဝႃႈၼႆ။

လုၵ်ႈႁဵၼ်းၸၼ်ႉၸွမ် ၵဵင်းတုင် ၵေႃႉၼိုင်ႈ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ တေလႆႈဝႃႈ ပဵၼ်ဢၼ်လၢၵ်ႇ လၢႆးတႃႇႁဝ်းၵူၼ်းၼုမ်ႇၶႃႈယဝ်ႉ။ ယွၼ်ႉဝႃႈ ပီႈၼွင်ႉတႆး ၸိူဝ်းယူႇၼႂ်းမိူင်းထႆးလႄႈ ၼႂ်းမိူင်းတႆးလႆႈႁူပ်ႉၵၼ်ၸိူင်ႉၼႆ မၼ်းသၢင်ႈပၼ်ႁဝ်းၶႃႈ ၵူၼ်းမိူင်းတႆး ၼွၵ်ႈမိူင်း/ ၼႂ်းမိူင်း မီးသုၼ်ႇတိုဝ်ႉတၢင်းႁူပ်ႉထူပ်းၵၼ် တီႈပၢင်ပွႆးယုၵ်ႉယွင်ႈ ၸဝ်ႈၶူးမေႃလိၵ်ႈတႆး တီႈဝၢၼ်ႈမႂ်ႇမွၵ်ႇၸၢမ်ၼႆႉ ၼင်ႇႁိုဝ် ပေႃးတေၸမ်ၸႂ် မိုတ်ႈၵိုဝ်း ၵွင်ႉႁႃၵၼ်ယူႇတႃႇသေႇ” ဝႃႈၼႆ။