ၵူၼ်းသိုၵ်း RCSS/SSA သွင်ၵေႃႉ ဢၼ်ၺႃးသိုၵ်းမၢၼ်ႈ တီႉၺွပ်း ၼႂ်းၸႄႈဝဵင်းမိူင်းပဵင်း ၸႄႈတွၼ်ႈ မိူင်းသၢတ်ႇ ၼၼ်ႉ ထုၵ်ႇၵုမ်းၶင်တူဝ် ဝႆႉၼႂ်းၶွၵ်ႈ ၸႄႈဝဵင်းၵဵင်းတုင် တဵမ် 7 လိူၼ် ၼႂ်းလိူၼ်ၾႅပ်ႊၿိဝ်ႊရီႊၼႆႉ ဝႃႈၼႆ။

ၵူၼ်းသိုၵ်း ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA သွင်ၵေႃႉ ၸၢႆးသိူဝ်လူင် တင်း ၸၢႆးလူင် ဢၼ်တူင်ႉၼိုင်တၢင်းပွတ်းတွၼ်ႈဢိူင်ႇမိူင်းပူးလူင် ၸႄႈဝဵင်းမိူင်းပဵင်း ၸႄႈတွၼ်ႈမိူင်းသၢတ်ႇ ၸိုင်ႈတႆးပွတ်းဢွၵ်ႇ။ သိုၵ်းလူင်ပွင်ၸိုင်ႈမၢၼ်ႈ ၸီႉၼႄးဝႃႈ ၵူၼ်းသိုၵ်း 2 ၵေႃႉၼႆႉ ပႃးၶိူင်ႈၵွင်ႈၵၢင်ႇ၊ ၸၢၵ်ႈလၢတ်ႈလႄႈ ၵဵပ်းၶွၼ်ႇ ၵူၼ်းမိူင်း ၸိူဝ်းၼႆႉသေ တီႉၺွပ်းၵုမ်းၶင်ဝႆႉ ၼႂ်းၶွၵ်ႈၵဵင်းတုင်။

ၽူႈမီးပုၼ်ႈၽွၼ်း လုမ်းၵပ်းသၢၼ် RCSS/SSA ၸႄႈဝဵင်းၵဵင်းတုင် လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ ႁဝ်းၶႃႈ ၵေႃႈ ဢမ်ႇလႆႈႁူႉၸႅင်ႈလႅင်းလီ၊ ယူႇတီႈလုမ်းတြႃးၶဝ် တႅပ်းတတ်းဝႃႈ 7 လိူၼ်ၼႆ လႆႈငိၼ်းၶၢဝ်ႇဝႆႉၼင်ႇၼႆ။ လွင်ႈၼႆႉ ၶဝ်တတ်းသိၼ် 7 လိူၼ်ၼၼ်ႉ တႄႇဢဝ်မိူဝ်ႈဝၼ်းၶဝ်ၺွပ်းၼၼ်ႉႁႃႉ၊ ဢမ်ႇၼၼ် တႄႇဢဝ်ဝၼ်းၵုမ်းၶင် ၶွၵ်ႈဝႆႉ တီႈၵဵင်းတုင်ႁႃႉ။ လွင်ႈၼႆႉ ႁဝ်းၶႃႈထၢမ်ၵႂႃႇတီႈၽူႈတၢင်ၼႃႈ( ရှေ့နေ) ၵေႃႈ ၶဝ်ဢမ်ႇႁူႉ။ တၢင်းၾၢႆႇႁဝ်းၶႃႈတႄႉ ပႂ်ႉတီႈၾၢႆႇၶဝ်ၸႅင်ႈမႃး ဝႃႈတေပွႆႇဢွၵ်ႇဝၼ်းလႂ် သင်ဝႃႈ ၶဝ်ၸႅင်ႈမႃးၼႆ ႁဝ်းၶႃႈတေၵႂႃႇႁပ်ႉဢဝ်ဢွၵ်ႇမႃး” ဝႃႈၼႆ။

ၵူၼ်းသိုၵ်း RCSS/SSA သွင်ၵေႃႉၼႆႉ ထုၵ်ႇသိုၵ်းမၢၼ်ႈတီႉၺွပ်း မိူဝ်းဝၼ်းတီႈ 25/07/2017 သေ သူင်ႇတူဝ် ၵုမ်း ၶင်ဝႆႉတီႈ ၶွၵ်ႈၸႄႈဝဵင်းၵဵင်းတုင်။

ၼွၵ်ႈလိူဝ်ၼၼ်ႉ ၵူၼ်းမိူင်းၸႄႈဝဵင်းႁူဝ်ပူင်း 9 ၵေႃႉ ၵေႃႈၺႃးသိုၵ်းမၢၼ်ႈၸီႉၼႄးဝႃႈ ၶွင်ႉၵဵဝ်ႇတင်း RCSS/SSA ၼႆသေ ၺႃးတီႉၺွပ်းၵုမ်းၶင်မိူဝ်ႈလိူၼ်ၵျႃႊလၢႆႊ ပီ 2017 ၼၼ်ႉ တေႃႇ ထိုင် ယၢမ်းလဵဝ် ပႆႇပွႆႇသေဢမ်ႇၵႃး လုမ်းတြႃး ၼႂ်းၸႄႈဝဵင်းႁူဝ်ပူင်းၵေႃႈ ဢမ်ႇတႅပ်းတတ်းသင်၊ ၼႂ်းၼၼ်ႉ ယင်းပႃးလုၵ်ႈဢွၼ်ႇဢႃယု 12 ၶူပ်ႇ ၵေႃႉၼိုင်ႈ လူးၵွၼ်ႇဝႃႈၼႆ။