ဢွၼ်ႇၸၢႆးတႆး ၸိူဝ်းၶဝ်ႈၵႂႃႇႁဵတ်းၵၢၼ် ၼႂ်းၸိုင်ႈထႆး ယွၼ်ႉဢမ်ႇႁၢၼ်ႉၸႂ် ၼိူဝ်ပေႃႈလဵင်ႉ ၵေႃႉၵဝ်ႇ တီႈၶဝ် ႁဵတ်းၵၢၼ်ၸွမ်းၼၼ်ႉ ၶဝ်ႈထုပ်ႉပေႃႉလႅဝ် ႁွင်ႈသဝ်းၵူၼ်းႁဵတ်းၵၢၼ် ပေႃႈလဵင်ႉၵဝ်ႇၶဝ်ၶိုၼ်း မီးလွင်ႈလူႉသုမ်း တင်းၼမ်လၢႆ ဝႃႈၼႆ။

မိူဝ်ႈၼႆႉ ဝၼ်းတီႈ 15/02/2018 ယၢမ်းၵၢင်ဝၼ်း ဢွၼ်ႇၸၢႆးတႆး ဢဵၼ်ႁႅင်း မွၵ်ႈ 10 ၵေႃႉ ၶဝ်ႈထုပ်ႉပေႃႉ ၶႅမ်ႉပၢင် သဝ်းၵူၼ်းႁဵတ်းၵၢၼ်ယူႇသဝ်း တီႈမူႇဝၢၼ်ႈဝႅင်းမိူင်း ၸႄႈဝဵင်းသႃရႃးၾီး ၸႄႈတွၼ်ႈၵဵင်းမႆႇ ၸိုင်ႈထႆး ယွၼ်ႉဢမ်ႇ ႁၢၼ်ႉၸႂ်ၼိူဝ်ပေႃႈလဵင်ႉ ၵေႃႉၵဝ်ႇ ဝႃႈၼႆ။

ၸၢႆးဝိ ၸဝ်ႈၶွင်ၶႅမ်ႉပၢင်သဝ်း လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ လွင်ႈတၢင်းမၼ်းပဵၼ်ၼႆ ၶႅမ်ႉပၢင်သဝ်း ဢၼ် ဢွၼ်ႇၸၢႆးတႆးႁဝ်းမႃးပေႃႉထုပ်ႉၼႆႉ ပဵၼ်ၶႅမ်ႉၶႃႈႁဝ်း ၶၢတ်ႈတီႈလိၼ်ပိူၼ်ႈသေ ႁဵတ်းႁွင်ႈသဝ်း ပၼ်ၵူၼ်းႁဵတ်း ၵၢၼ်ၶႃႈယူႇသဝ်း။ မိူဝ်ႈဢွၼ်တၢင်းၼၼ်ႉ လုၵ်ႈဢွၼ်ႇၸိူဝ်းၼႆႉ ၶဝ်ႁဵတ်းၵၢၼ်ၸွမ်းၶႃႈသေ ယူႇၸွမ်းၶႃႈတီႈ ၼႂ်းၶႅမ်ႉ ပၢင်သဝ်းၼႆႉ ယွၼ်ႉဝႃႈ မိူဝ်ႈပီမႂ်ႇလူၵ်ႈ/လုမ်ႈၾႃႉပူၼ်ႉမႃးၼၼ်ႉ ၶဝ်သမ်ႉၶႂ်ႈၵိၼ်လဝ်ႈ ႁပ်ႉပီမႂ်ႇၼႆသေ ၶႃႈ ၵေႃႈ ပၼ်ၶႂၢင်ႉၶဝ်ၸတ်းပၢင်ၵိၼ်လဝ်ႈ။ ဝၢႆးလင်ၼၼ်ႉ ၶဝ်သမ်ႉဢွၼ်ၵၼ်လၵ်ႉၵိၼ်လဝ်ႈ တီႈႁွင်ႈသဝ်း ဢၼ်ၶဝ် ယူႇ ၶႃႈၵေႃႈၵႂႃႇပၼ်ၾၢင်ႉၶဝ်သေ ႁၢမ်ႈၶဝ် ယႃႇပေၵိၼ် တီႈၼႂ်းၶႅမ်ႉၼႆႉ။ ပေႃးသူၶဝ်ၵိၼ်လဝ်ႈမဝ်းၵေႃႈ သမ်ႉ ၽိတ်း ၵၼ် ၶႃႈၵေႃႈၵႂႃႇဝႃႈၶဝ်ယဝ်ႉၵမ်းၼိုင်ႈ။ လင်ၼၼ်ႉၵေႃႈ သမ်ႉလၵ်ႉၵိၼ်ထႅင်ႈ ၶႃႈၵေႃႈသမ်ႉၵႂႃႇပွင်ႉလႃႇၶဝ်။ ထိုင်မႃး ဝၼ်းတီႈ 18/01/2018 သမ်ႉ ၶဝ်ဢွၼ်ၵၼ် ဢွၵ်ႇၵၢၼ်ၵႂႃႇ။ ထိုင်မႃးမိူဝ်ႈၼႆႉ ၶဝ်ၸင်ႇႁွင်ႉၵၼ် သေ မႃးထုပ်ႉပေႃႉၶႅမ်ႉပၢင်သဝ်း/ ႁွင်ႈသဝ်း(ႁိူၼ်းၸူဝ်ႈၶၢဝ်း) ၶႃႈ၊ ၶဝ်တေဢမ်ႇႁၢၼ်ႉၸႂ်ၼိူဝ်ၶႃႈႁိုဝ်” ဝႃႈၼႆ။

ဢွၼ်ႇၸၢႆးတႆး ဢၼ်ၶဝ်ႈၵႂႃႇပေႃႉထုပ်ႉ တီႈၼႂ်းၶႅမ်ႉပၢင်သဝ်းၼၼ်ႉ ထုပ်ႉပေႃႉတူႈယဵၼ်၊ ထီႊဝီႊ၊ ၶိူင်ႈသဵင်၊ ၶူဝ်းၶွင်ႁိူၼ်းယေး ၸိူဝ်းၼႆႉ လႆႈလူႉသုမ်းတင်းၼမ်လၢႆ ဝႃႈၼႆ။

ၸၢႆးဝိ လၢတ်ႈဝႃႈ “ လွင်ႈလူႉသုမ်းတႄႉ တေလူႉသုမ်းၵႃႈၶၼ်တင်းၼမ် ၵူၺ်းၵႃႈ တေတူၵ်းမႅၼ်ႈၵႃႈႁိုဝ် ဢၼ် ဝႃႈၼၼ်ႉ ၶႃႈပႆႇၼပ်ႉသွၼ်ႇတူၺ်းၶႃႈ။ တေႃႈလဵဝ် လႆႈၸႅင်ႈၾၢႆႇၸဝ်ႈၼႃႈတီႈပလိၵ်ႈထႆး မႃးၵဵပ်းလၵ်းထၢၼ် လွင်ႈ ပၼ်ႁႃၵိူတ်ႇၶိုၼ်ႈၼႆႉသေ ႁႂ်ႈၸဝ်ႈၼႃႈတီႈၵုမ်းၶင်တူဝ်ၶဝ်သေ ပၼ်တူတ်ႈတၢမ်ႇၸွမ်းၼင်ႇပၵ်း ပိူင်မၢႆမီႈ ဝၢၼ်ႈ မိူင်းမီး။ ထႅင်ႈလွင်ႈၼိုင်ႈၵေႃႈ ဢွၼ်ႇၸၢႆးတႆးၸိူဝ်းၼႆႉ ၶဝ်ႁဵတ်းဝတ်းဝႂ်ဝႆႉတီႈၶႃႈ တင်းမူတ်း။ ဢၼ်ၶဝ်ၶဝ်ႈ မႃးႁဵတ်း ၵၢၼ်ၸွမ်းၶႃႈၼႆႉ တိုၵ်ႉမီး 1-2 ပီၼႆႉၵူၺ်းၶႃႈ” ဝႃႈၼႆ။

ၸၢႆးဝိၼႆႉ ပဵၼ်ၵူၼ်းၸႃတိ ၸႄႈဝဵင်းမိူင်းၵိုင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ပဵၼ်ၽူႈႁပ်ႉမဝ်ၵေႃႇသၢင်ႈ ၼႂ်းၸႄႈဝဵင်းၵဵင်းမႆႇ ၸိုင်ႈထႆး ၵေႃႉၼိုင်ႈ ဝႃႈၼႆ။