ၶဵတ်ႇလိူၵ်ႈတင်ႈမၢႆ 1 သၽႃးၸိူဝ်ႉၸၢတ်ႈ ဢၼ်မီးပိုၼ်ႉတီႈ ၸႄႈတွၼ်ႈ ၵျွၵ်ႉမႄး တင်း မိူင်းမိတ်ႈၼၼ်ႉ ပႃႇတီႇႁူဝ်သိူဝ် ထတ်းႁၼ်ဝႃႈ ဢမ်ႇမီးလွင်ႈပူင်ႇသႂ် ၽဵင်ႇပဵင်းၸွမ်းထမ်းၼႆသေ တေဢမ်ႇလူင်းလၢႆးမိုဝ်း ယွမ်းႁပ်ႉၽူၼ်ၵၢၼ်ၶႅပ်းၵၢင်ၸႂ်ဢၼ်ၵူႈပႃႇတီႇ ၸိူဝ်းၶဝ်ႈၶႅင်ႇ လႆႈမႃးဝႃႈၼႆ။
ပၢင်လိူၵ်ႈတင်ႈလူင် ဢၼ်ၸတ်းႁဵတ်း ဝၼ်းတီႈ 8/11/2020 ယဝ်ႉမႃး မီး 3 ဝၼ်းပၢႆ ၊ ၶဵတ်ႇသဵင်လိူၵ်ႈတင်ႈ မၢႆ 1 သၽႃးၸိူဝ်ႉၸၢတ်ႈ ၸႄႈတွၼ်ႈၵျွၵ်ႉမႄး တင်း မိူင်းမိတ်ႈ မိူင်းတႆး ပွတ်းႁွင်ႇ ၼၼ်ႉ ပႃႇတီႇ ႁူဝ်သိူဝ် ထတ်းႁၼ်ဝႃႈ ဢမ်ႇပူင်ႇသႂ်၊ ဢမ်ႇမီးလွင်ႈၽဵင်ႇ ပဵင်းပဵၼ်ထမ်း၊ ၶႅပ်းၵၢင်ၸႂ်ဢမ်ႇႁူႉတီႈၵႂႃႇတီႈမႃးၵေႃႈပႃး၊ ဢဝ်ပႃႇတီႇ ႁူဝ်သိူဝ် ဢေႇလိူဝ် ပႃႇတီႇၼူၵ်ႉယုင်း ၵႂႃႇ 54 ၶႅပ်း လႄႈ တေဢမ်ႇယွမ်းလူင်းလၢႆးမိုဝ်း ဝႅမ်ႇၾွမ်ႊပိူင် 19 ဝႃႈၼႆ။
ၸၢႆးမျႃႉထုၼ်းသွႆႈႁိူင်း ၼေႃႇၽူႈတႅၼ်းသၽႃးၸိူဝ်ႉၸၢတ်ႈ မၢႆ 1 လၢတ်ႈဝႃႈ – “မိူဝ်ႈ လဵဝ်ၼႆႉ ၶႅပ်းၵၢင်ၸႂ်ႁဝ်းၶႃႈ သုမ်း ၵၢၼ်ႉဝႆႉ ပႃႇတီႇၼူၵ်ႉယုင်း 54 ၶႅပ်း။ ဢၼ်ႁဝ်းၶႃႈ ထၢင်ႇထိူမ်ပႆႇၸၢင်ႈၵူတ်ႇထတ်း ၶႅပ်းၵၢင်ၸႂ်ၼႆႉသမ်ႉ တီႈၶွမ်ႊမသျိၼ်ႊ ၸႄႈတွၼ်ႈၶဝ် တီႈၸႄႈဝဵင်းမိူင်းမိတ်ႈတင်း မၢၼ်ႈပဵင်းၼႆႉၶႃႈဢေႃႈ။ ဢၼ်ႁဝ်းၶႃႈ ထၢင်ႇထိူမ်ဝႆႉတႄႉ မီးသွင်တီႈၼႆႉၶႃႈ။ ပၼ်ႁႃ ဢၼ်ၵိူတ်ႇၶိုၼ်ႈၼႆႉၵေႃႈ ပဵၼ်တီႈမိူင်းမိတ်ႈတင်း မၢၼ်ႈပဵင်းၼႆႉၵူၺ်းၶႃႈဢေႃႈ”- ဝႃႈၼႆ။
ၶဵတ်ႇလိူၵ်ႈတင်ႈမၢႆ 1 သၽႃးၸိူဝ်ႉၸၢတ်ႈ မိူင်းတႆးၼၼ်ႉ – ၼႂ်းၸႄႈတွၼ်ႈၵျွၵ်ႉမႄး မီးၸႄႈဝဵင်းၵျွၵ်ႉမႄး၊ ၸႄႈဝဵင်းၼွင်ၶဵဝ်၊ သီႇပေႃႉ၊ ၼမ်ႉတူႈ၊ ၼႂ်းၸႄႈတွၼ်ႈမိူင်းမိတ်ႈၵေႃႈ ၶဝ်ႈပႃးၸႄႈဝဵင်းမိူင်းမိတ်ႈတင်း မၢၼ်ႈပဵင်း။ ဢၼ်ၵူတ်ႇထတ်းဢမ်ႇပႆႇတူဝ်ႈထိုင်လႆႈၵေႃႈ ပဵၼ် ၸႄႈတွၼ်ႈမိူင်းမိတ်ႈၼႆႉယဝ်ႉဝႃႈၼႆ။
ၼႂ်းပိုၼ်ႉတီႈ ၶဵတ်ႇလိူၵ်ႈတင်ႈ သၽႃးၸိူဝ်ႉၸၢတ်ႈ မၢႆ 1 ၼႆႉ မိူဝ်ႈ ႁူဝ်လိူၼ်ဢွၵ်ႊထူဝ်ႊပိူဝ်ႊ သိုၵ်းလူင်ပွင်ၸိုင်ႈမၢၼ်ႈ ႁႅၼ်းသိုၵ်းလေႃႇတိုၵ်း တပ်ႉသိုၵ်းၸိုင်ႈတႆး RCSS/SSA ၊ ယွၼ်ႉပၢင်တိုၵ်းသေ ၶွမ်ႊမသျိၼ်ၵမ်ၵၢၼ်လိူၵ်ႈတင်ႈ ဝႃႈ တေဢမ်ႇမီးလွင်ႈၽဵင်ႇပဵၼ်း ပဵၼ်ထမ်း ၼႆသေ ယုၵ်ႉလိူၵ်ႈပၢင်လိူၵ်ႈတင်ႈပႅတ်ႈ တႃႇ 12 ဢိူင်ႇ ၼႂ်းၸႄႈဝဵင်းၵျွၵ်ႉမႄး၊ ႁူဝ်ၵူၼ်းမိုၼ်ႇပၢႆ ဢမ်ႇလႆႈလိူၵ်ႈတင်ႈ၊ ပိုၼ်ႉတီႈ တင်း 12 ဢိူင်ႇၼႆႉ ပဵၼ်ပိုၼ်ႉတီႈ ဢၼ်ၵူၼ်းမိူင်းၵမ်ႉထႅမ်ပႃႇတီႇႁူဝ်သိူဝ်ဝႆႉလွၼ်ႉလွၼ်ႉ။
ၸိူင်ႉၼၼ် ၼင်ႇၵဝ်ႇ ၶဵတ်ႇလိူၵ်ႈတင်ႈ သၽႃးၸိူဝ်ႉၸၢတ်ႈ မၢႆ 5 ၸႄႈတွၼ်ႈမူႇၸေႊ ဢၼ်မီး ဝဵင်းမူႇၸေႊ၊ ၼမ်ႉၶမ်း တင်း ၵူတ်ႉၶၢႆ ၼၼ်ႉၵေႃႈ ဢမ်ႇမီးလွင်ႈၽဵင်ႇပဵင်းလၢႆလွင်ႈ၊ လုၵ်ႈဢွၼ်ႇဢႃယု ဢမ်ႇတဵမ်မႃးတွတ်ႈၶႅပ်းၵၢင်ၸႂ်တႅၼ်း ပီႈဢၢႆႈ ပီႈၼၢင်း၊ လိူဝ်ၼၼ်ႉ ၼိုင်ႈၵေႃႉ သႂ်ႇၶႅပ်းၵၢင်ၸႂ် လၢႆၵမ်းၸိူဝ်းၼႆႉ ႁူပ်ႉႁၼ်သိုဝ်ႈၼႃႈတၼ်းတႃလႄႈ ၼေႃႇၽူႈတႅၼ်း ပႃႇတီႇႁူဝ်သိူဝ် (ၸၢႆး) မေႃႇထုၼ်းဢွင်ႇ ပိုတ်ႇလၢတ်ႈဝႃႈ တေဢမ်ႇလူင်းလၢႆးမိုဝ်း ဝႅပ်ႇၾွမ်ႊပိူင် 19 ဝႃႈၼႆ။
