ၵူၼ်းဝၢၼ်ႈၵေႃႉၼိုင်ႈၼႂ်းၸႄႈဝဵင်းလႃႈသဵဝ်ႈ – ၽဝ်ႁိူၼ်းမၼ်းၶိုၼ်း

ႁိူၼ်းၵူၼ်းဝၢၼ်ႈ ႁူးမူၼ်ႈလင်ၼိုင်ႈ ၺႃးၾႆးမႆႈပႅတ်ႈမူတ်းလိူဝ်ၽဝ်ႇ လူႉသုမ်းၼပ်ႉငိုၼ်း မၢၼ်ႈ20သႅၼ်ပၢႆ။

တဵင်ၶိုၼ်းၸၢႆႉဝၼ်းတီႈ 14 ၼႂ် ဝၼ်းတီႈ 15/02/2018 ၶၢဝ်းယၢမ်း မွၵ်ႈ 1 မူင်း ၾႆးမႆႈႁိူၼ်း ၵူၼ်းဝၢၼ်ႈလင်ၼိုင်ႈ ဝၢၼ်ႈႁူးမူၼ်ႈ ဢိူင်ႇဝၢၼ်ႈၼႃး ၸႄႈဝဵင်းလႃႈသဵဝ်ႈ ႁိူၼ်းၽႃသၢၼ်သွင်ၸၼ်ႉ လူႉသုမ်းတင်းလင် ႁိူၼ်းလင်ၼႆႉၾႆးမႆႈယွၼ်ႉ ၵေႃႉပဵၼ်ၸဝ်ႈႁိူၼ်းၸုတ်ႇၶိုၼ်းႁိူၼ်းမၼ်း – ၼႆယဝ်ႉ။

လုင်းသၢင်ႇမွင်ႇ ပူႇထဝ်ႈဝၢၼ်ႈ လၢတ်ႈဝႃႈ – “ မၼ်းလုၵ်ႉၵိဝ်ႇတၢင်းၼိူဝ်ၼၼ်ႉမႃးသေ ဢူၼ်ဢူၼ် မေႃးမေႃးလူင်းမႃးၸွမ်းၵိဝ်ႇ ၽိူဝ်ႇၽႅဝ်ႁိူၼ်းသမ်ႉၽိတ်းမေႃးၵၼ်တင်းမေးမၼ်း၊ သဵင်ၼမ်ႉပေႃး ဢူၼ်ပၼ်းလူင်ဝႆႉ မၼ်းလႅပ်ႈတေၸုတ်ႇၾႆးၽဝ်ႁိူၼ်းမၼ်းမိူဝ်ႈၽွင်း 12:00 ၵၢင်ၶိုၼ်းပၢႆ ၾၢႆႇၶႄ ၾႆး ၵူၼ်းဝၢၼ်ႈၸွႆႈၵၼ်ႁူတ်းၾႆးသေ ၾႆးမွတ်ႇၵႂႃႇမွၵ်ႈၵၢင်ၼႂ် 4 မူင်းၼၼ်ႉၵႂႃႈ ” ဝႃႈၼႆ။

ၵူၼ်းဝၢၼ်ႈၵေႃႉၼိုင်ႈလၢတ်ႈဝႃႈ – “ မၼ်းၸၢႆးၼႆႉၵႆႉၵႆႉၽိတ်းမေႃး မေးမၼ်း၊ ဢူၼ် ဢၢၼ် မေႃးပၼ်းဝႃႈပိူၼ်ႈတေမႃးႁဵတ်းႁင်းမၼ်းၸိူင်ႉၼၼ်ၸိူင်ႉၼႆ မၢင်ပွၵ်ႈဢဝ်မၢၵ်ႇ ႁိၼ်မၢၵ်ႇသၢႆးသိုင်း သႂ်ႇႁိူၼ်းႁိမ်းႁွမ်းၸိူဝ်းၼႆႉ၊ ႁွင်ႉဢူၼ်ဢၢၼ်ၵၢင်ၶမ်ႈၵၢင်ၶိုၼ်း မၢင်ပွၵ်ႈၵူဝ်မၼ်း ႁဵတ်းတီႈလုၵ်ႈမေး ၼႃႇ၊ မၼ်းၸၢႆးၼႆႉလႅပ်ႈယွင်ႇယႃႈမႃႉလူဝ်လူဝ်ဝႆႉ” ဝႃႈၼႆ။

ႁိူၼ်းလင်ၼႆႉပဵၼ်ႁိူၼ်းၸဝ်ႈသိုၵ်းလၢဝ်းမႃး (ႁိုဝ်) ၸဝ်ႈသိုၵ်းၸၢမ်ႇမိူင်း ႁူဝ်ၼႃႈတပ်ႉသိုၵ်းၵူၼ်းမိူင်း မိူင်းႁႃႉ မိူင်းႁႅင်း သိုဝ်ႉဝႆႉသေ ပၼ်ၶဝ်ပေႃႈမႄႈလုၵ်ႈယူႇ မႃးၶၢဝ်းတၢင်းမွၵ်ႈ 9 ပီ။

ဝၢၼ်ႈႁူးမူၼ်ႈၼႆႉ မိူဝ်ႈဢွၼ်တၢင်းၵေႃႈယၢမ်ႈမီးၵူၼ်းယွင်ႇယႃႈမႃႉၵေႃႉၼိုင်ႈ ယိုၼ်တူဝ်ၵဝ်ႇ ဝႃႈပဵၼ် ၽူႈတၢင်တူဝ်ၸဝ်ႈမိူင်း (ၵူဝ်ႇၸရႄႇၸဝ်ႈမိူင်း)ၼႆသေ ဢဝ်ၾႆးၸုတ်ႇၶိုၼ်းႁိူၼ်းမၼ်း ၵူၺ်းၵႃႈၵူၼ်း ႁိမ်းႁွမ်းၸွႆႈႁူတ်းၾႆးတၼ်းလႄႈ ဢမ်ႇတၼ်းမႆႈၼမ်ၼႆယဝ်ႉ။

ႁၢင်ႈ – သႅင်သွမ်ႇ