တီႈႁူင်းတွတ်ႈၶႅပ်းမၢႆ 1 ဢိူင်ႇလွႆဢွၵ်ႇ လွႆလႅမ်ၼၼ်ႉ ၵူၼ်းမိူင်းမၢင်ၸိူဝ်း ဢမ်ႇႁူႉဝႃႈ တေလႆႈတွတ်ႈၶႅပ်း 3 ဢၼ်၊ ဢွၵ်ႇႁူင်းတွတ်ႈၶႅပ်းမႃးယဝ်ႉ လႆႈၶိုၼ်းၵႂႃႇယွၼ်းတွတ်ႈထႅင်ႈ။
ဝၼ်းတွတ်ႈၶႅပ်းၵၢင်ၸႂ် မိူင်းႁူမ်ႈတုမ်ပတ်းပိုၼ်ႉ 08/11/2020 မိူဝ်ႈၼႆႉ ၼႂ်းမိူင်းတႆး မၢင်ပိုၼ်ႉတီႈ မၢင်ၸႄႈဝဵင်း ၵူၼ်းဝၢၼ်ႈၵူၼ်းမိူင်း ယင်းပႆႇႁူႉလၢႆးၵၢၼ်တွတ်ႈၶႅပ်း။ ၵမ်ႈၽွင်ႈၶဝ်ႈၵႂႃႇၼႂ်းႁူင်းတွတ်ႈၶႅပ်း ယဝ်ႉ ၵႂႃႇတွတ်ႈသႂ်ႇၼိုင်ႈဝႂ်သေဢွၵ်ႇမႃးၵေႃႈမီး။ ႁူင်းတွတ်ႈၶႅပ်းၵၢင်ၸႂ် မၢႆ 1 တီႈၸၼ်ႉၸွမ်ပၢႆးၸၢၵ်ႈ ဢိူင်ႇလွႆဢွၵ်ႇ ဝဵင်းလွႆလႅမ်ၼၼ်ႉ ၵူၼ်းမိူင်း ၽူႈမီးသုၼ်ႇတွတ်ႈၶႅပ်းမၢင်ၸိူဝ်း တွတ်ႈၶႅပ်းၼိုင်ႈဝႂ်ၵူၺ်းသေ ဢွၵ်ႇမႃးၵေႃႈမီး ၼႆယဝ်ႉ။
ၽူႈႁၢပ်ႇၵၢၼ် ၸုမ်းၶၢဝ်ႇၽူႈတွႆႇႁွၵ်ႈ ၸၢႆးယေႈၵွၼ်တႆး ဢၼ်လႆႈႁွတ်ႈၽႅဝ်ဝႆႉတီႈၼၼ်ႈ လၢတ်ႈဝႃႈ- “ႁူင်းတွတ်ႈၶႅပ်းတီႈၼႆႈၼႆႉ ၵူၼ်းမိူင်းမၢင်ၵေႃႉ မႃးတွတ်ႈၶႅပ်းၵၢင်ၸႂ်ၼိုင်ႈၶႅပ်းၵူၺ်းသေ ဢဝ်မိုဝ်းၸုပ်ႉၼမ်ႉမိုၵ်ႉယဝ်ႉဢွၵ်ႇမႃး မီးယူႇ 2-3 ၵေႃႉ၊ ၵဵဝ်ႇၵပ်းလွင်ႈၼႆႉ လႆႈၶိုၼ်းဢုပ်ႇဢူဝ်းတင်း ၽူႈၵွၼ်းႁူင်းတွတ်ႈၶႅပ်းသေယဝ်ႉ လႆႈၶိုၼ်းၶဝ်ႈၵႂႃႇတွတ်ႈၶႅပ်းၵၢင်ၸႂ်ထႅင်ႈၵေႃႈမီး” ဝႃႈၼႆ။
ၵူၼ်းမီးသုၼ်ႇတွတ်ႈၶႅပ်းၼိုင်ႈၵေႃႉၼႆႉ လႆႈတွတ်ႈၶႅပ်း 3 ဝႂ်ထိုင် 4 ဝႂ်။ မိူၼ်ၼင်ႇ ပၢင်လိူၵ်ႈတင်ႈ ၼႂ်းမိူင်းတႆး ၸၢဝ်းၶိူဝ်းတႆး မီးသုၼ်ႇတွတ်ႈၶႅပ်း 3 ဝႂ်၊ တွတ်ႈပၼ်ၼေႃႈၽူႈတႅၼ်းၵူၼ်းမိူင်းဝႂ်ၼိုင်ႈ ၼေႃႇၽူႈတႅၼ်းၸႄႈမိူင်းဝႂ်ၼိုင်ႈ တင်း ၼေႃႇၽူႈတႅၼ်းၸိူဝ်ႉၸၢတ်ႈ ဝႂ်ၼိုင်ႈ။
ၵူၺ်းၵႃႈ ပေႃးပဵၼ်တၢင်ႇၶိူဝ်း (ၸၢဝ်းမၢၼ်ႈ) ၶိုၼ်ႈမႃးယူႇမိူင်းတႆး ပိုၼ်ႉတီႈၼၼ်ႉ သမ်ႉမီးၼေႃႇတႅၼ်း ၽွင်းၸၢဝ်းၶိူဝ်းၸိုင် တေလႆႈတွတ်ႈပၼ် ၼေႃႇၽွင်းတႅၼ်းၸၢဝ်းၶိူဝ်းထႅင်ႈဝႂ်ၼိုင်ႈ ႁူမ်ႈပဵၼ် 4 ဝႂ် ၼႆယဝ်ႉ။
