ၽူႈတႅၼ်းသၽႃးၸိူဝ်ႉၸၢတ်ႈလႄႈ သၽႃးၸႄႈမိူင်း ႁူမ်ႈၵၼ်လူင်းပိုၼ်ႉတီႈသူႇၸႂ်း ၵူၼ်းပၢႆႈၽေးသိုၵ်း ဢၼ်လုၵ်ႉတၢင်း ၸႄႈဝဵင်းၵူတ်ႉၶၢႆသေ ပၢႆႈမႃးတၢင်းသႅၼ်ဝီၼၼ်ႉ တေႃႈလဵဝ် ၵူၼ်းပၢႆႈၽေးသိုၵ်း မီးၵႂႃႇ 174 ၵေႃႉ ဝႃႈၼႆ။
ဝၼ်းတီႈ 11/02/2018 ယၢမ်းၵၢင်ၼႂ် 9 မူင်း ၽူႈတႅၼ်းသၽႃးၸိူဝ်ႉၸၢတ်ႈ ၸၢႆးဝၼ်းလႅင်းၶမ်း၊ ၽူႈတႅၼ်းသၽႃး ၸႄႈမိူင်း ၶဵတ်ႇလိူၵ်ႈတင်ႈမၢႆ (2) ၸႄႈဝဵင်းတၢင်ႉယၢၼ်း ၸၢႆးၶမ်းမျၢတ်ႈလႄႈ ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈ မၢႆ(1) ၸႄႈဝဵင်းသႅၼ်ဝီ ၼၢင်းၶိၼ်ႇထႃးယီႇ ႁူမ်ႈၵၼ်သေ ၵႂႃႇသူႇၸႂ်း ၵူၼ်းပၢႆႈၽေး သိုၵ်း ဢၼ်လုၵ်ႉတၢင်းဝၢၼ်ႈတႃႈၶၢႆႇလႄႈ ဝၢၼ်ႈသၢႆးၶၢဝ် ၼႂ်းၸႄႈဝဵင်းၵူတ်ႉၶၢႆသေ ဢွၼ်ၵၼ်ပၢႆႈမႃးသွၼ်ႈသဝ်း ဝႆႉတီႈ ဝတ်ႉဝိႁၢရ်လူင်ၵွင်းဢၢႆႇ ဢိူင်ႇၵွင်းဢၢႆႇ ၸႄႈဝဵင်းသႅၼ်ဝီ ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ ယွၼ်ႉသိုၵ်းလူင်ပွင်ၸိုင်ႈမၢၼ်ႈတင်း တပ်ႉသိုၵ်းတဢၢင်း သွင်ၾၢႆႇပဵၼ်ပၢင်တိုၵ်းၵၼ်ႁၢဝ်ႈႁႅင်း တႄႇမိူဝ်ႈႁၢင် လိူၼ်ၵျႅၼ်ႊၼိဝ်ႊရီႊမႃးၼၼ်ႉ ဝႃႈၼႆ။
ၼၢင်းၶိၼ်ႇထႃးယီႇ ၽူႈတႅၼ်းသၽႃးၸႄႈမိူင်းၶဵတ်ႇလိူၵ်ႈတင်ႈ မၢႆ(1) လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ မိူဝ်ႈဝႃး ႁဝ်းၶႃႈ ၽူႈတႅၼ်း 3 ၵေႃႉ၊ ၵႂႃႇႁူပ်ႉထူပ်းၵူၼ်းပၢႆႈၽေး တီႈဢိူင်ႇၵွင်းဢၢႆႇ၊ တေႃႈလဵဝ် ၵူၼ်းပၢႆႈ ၽေးႁဝ်းၽိူမ်ႉမႃးထႅင်ႈ မိူဝ်ႈဢွၼ်တၢင်း ပီႈၼွင်ႉႁဝ်း ဢွၼ်ၵၼ်ပၢႆႈမႃး မီးႁူဝ်ၵူၼ်း 158 ၵေႃႉ ၵမ်းၼႆႉသမ်ႉ ၽိူမ်ႉမႃး ထႅင်ႈ 16 ၵေႃႉ တေႃႈလဵဝ် မီးဝႆႉ 174 ၵေႃႉ။ လိူဝ်ၼၼ်ႉ တၢင်းဝၢၼ်ႈၶွၵ်ႈၵႂၢႆး ၼႂ်းၸႄႈဝဵင်းၵူတ်ႉၶၢႆၵေႃႈ ပီႈၼွင်ႉႁဝ်း တၢင်းဝၢၼ်ႈတႃႈၶၢႆႇလႄႈ သၢႆးၶၢဝ် သွင်ဝၢၼ်ႈၼႆႉၵူၺ်းၼင်ႇၵဝ်ႇ ပၢႆႈမႃးသွၼ်ႈဝႆႉတီႈၼၼ်ႈတေႃႈလဵဝ် မီး 13 ၼႃႈႁိူၼ်း ႁူဝ်ၵူၼ်းမီး 51 ၵေႃႉ ပေႃးၼပ်ႉႁူမ်ႈၵၼ် တင်းသွင်တီႈၼႆႉ မီး 226 ၵေႃႉ။ ဢၼ်ၶၢဝ်ႇတၢင်ႇဢၼ် ဢွၵ်ႇဝႆႉဝႃႈ ၵူၼ်းပၢႆႈၽေးသိုၵ်းမီး 500 ၵေႃႉၼႆၼၼ်ႉ မၼ်းဢမ်ႇၸႂ်ႈ” ဝႃႈၼႆ။
ယၢမ်းလဵဝ် ၵူၼ်းပၢႆႈၽေးသိုၵ်း ထူပ်းတၢင်းယၢပ်ႇၽိုတ်ႇဝႆႉ လွင်ႈၽၵ်းယိူဝ်ႈၼၢင်းၶဵဝ် တႃႇႁုင် လဵင်ႉၵၼ် ၶဝ်ႈသၢၼ် ၼမ်ႉမၼ်းၽၵ်းႁႅင်ႈတႄႉ ဢမ်ႇလႆႈမႆႈၸႂ်။ သင်ဝႃႈ ပီႈၼွင်ႉၸိူဝ်းယူႇႁိမ်းႁွမ်းၼၼ်ႉ မီးၽၢၵ်းယိူဝ်ႈၼၢင်းၶဵဝ် ၼိူဝ်ႉပႃၸိုင် ၶႅၼ်းတေႃႈဢဝ်မိူဝ်းၸွႆႈပၼ်သေၵမ်း” ဝႃႈၼႆ။
မိူဝ်ႈဝၼ်းတီႈ 5/2/2018 ၼၼ်ႉ ၵူၼ်းမိူင်း ဢၼ်ပၢႆႈၽေးသိုၵ်း မႃးသွၼ်ႈသဝ်းဝႆႉတီႈ ၼႂ်းဢိူင်ႇ ၵွင်းဢၢႆႇၼႆႉ ၽူႈၸၢႆး 76 ၵေႃႉ၊ ၽူႈ ယိင်း 82 ၵေႃႉ ႁူမ်ႈၵၼ် 158 ၵေႃႉ ဝႃႈၼႆ။
ၼႂ်းမိူင်းတႆး ပွတ်းၼမ်ႉၶမ်း၊ ၼမ်ႉတူႈ၊ ၵျွၵ်ႉမႄး၊ ၼမ်ႉသၼ်ႇ ၸိူဝ်းၼႆႉၵေႃႈ တပ်ႉသိုၵ်းတဢၢင်းတင်း တပ်ႉသိုၵ်း လူင်ပွင်ၸိုင်ႈမၢၼ်ႈ ပဵၼ်ပၢင်တိုၵ်းၵၼ်သေဢမ်ႇၵႃး ထႅင်ႈၾၢႆႇၼိုင်ႈၵေႃႈ တပ်ႉသိုၵ်းတဢၢင်းတင်း တပ်ႉသိုၵ်း RCSS/SSA ၵေႃႈ ပဵၼ်ပၢင်တိုၵ်းၵၼ် ဝႆႉယူႇ။
