တီႈဝဵင်းပၢင်လူင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း၊ ပီ 2018 ၼႆႉ ၸတ်းႁဵတ်းပၢင်ပွႆး ဝၼ်းမိူင်းႁူမ်ႈတုမ် ၶွပ်ႈၶူပ်ႇ 71 ပီ 2 ပၢင်။ ပၢင်ၼိုင်ႈလူင်ပွင်ၸိုင်ႈမိူင်းတႆး ၸတ်း၊ ထႅင်ႈပၢင်ၼိုင်ႈ ယူႇတီႈပႃႇတီႇၼူၵ်ႉယုင်းၸတ်း။
ၽူႈၶၢၼ်ပၢၵ်ႇၸုမ်းၵူၼ်းၼုမ်ႇတႆး (TYN) ၸၢႆးသူႉ လၢတ်ႈဝႃႈ- “ဝၼ်းမိူဝ်ႈၼႆႉ ဢၼ်ၸတ်းႁဵတ်းပၢင်ပွႆးၼႆႉ ပဵၼ်သွင်ပၢင်။ ယူႇတီႈလူင်ပွင်ၸိုင်ႈမိူင်းတႆး တင်းၾၢႆႇၽွင်းငမ်းၶဝ်ႁဵတ်းပၢင်ၼိုင်ႈ တီႈလၵ်းသဝ်ႁိၼ်၊ ႁဵတ်းမိူၼ်ၼင်ႇၵူႈပီ၊ မီးၵၢၼ်ဢၢၼ်ႇၽိုၼ်လိၵ်ႈ၊ မီးတၢင်းၵႃႈၸၢဝ်းၶိူဝ်း၊ မီးၵၢၼ်တွၼ်ႈသူး/ရၢင်းဝၼ်း လုၵ်ႈႁဵၼ်းၵတ်ႉၶႅၼ်ႇလိၵ်ႈၸိူဝ်းၼႆႉ”- ဝႃႈၼႆ။
ပၢင်ပွႆးဝၼ်းမိူင်းႁူမ်ႈတုမ် ဝၼ်းတီႈ 12 မိူဝ်ႈၼႆႉ ဢၼ်လူင်ပွင်ၸိုင်ႈမိူင်းတႆး ဢွၼ်ႁူဝ်ၼမ်းၼႃႈၸတ်းႁဵတ်း တီႈလၵ်းသဝ်ႁိၼ်ဝဵင်းပၢင်လူင်ၼႆႉ တႄႇပၢင်ၵႅဝ်ႈယၢမ်း 8 မူင်း။ ၸဝ်ႈၼႃႈတီႈႁွင်ႈၵၢၼ်ၾၢႆႇၵဵဝ်ႇၶွင်ႈ၊ ၶႃႈႁၢပ်ႇၵၢၼ်ၶုၼ်ၸိူဝ်းၼႆႉ ၶပ်းၶိုင်ႁၢင်ႈႁႅၼ်း။ လူင်ပွင်ၸိုင်ႈမိူင်းတႆး မီးၽွင်းလူင်ၾၢႆႇငိုၼ်းတွင်း မႃးၶဝ်ႈႁူမ်ႈ။ ႁွင်ႉမွၵ်ႇထိုင်ပႃႇတီႇၵၢၼ်မိူင်းၶဝ်ႈႁူမ်ႈ ၼိုင်ႈပႃႇတီႇလႂ် 5 ၵေႃႉ၊ ၸုမ်းၾိင်ႈငႄႈၸၢဝ်းၶိူဝ်းၵေႃႈၶဝ်ႈႁူမ်ႈ၊ တင်းမူတ်းမီးမွၵ်ႈ 800 ပၢႆ-ၼႆယဝ်ႉ။
ၸၢႆးသူႉ လၢတ်ႈၼႄဝႃႈ- “ဢၼ် NLD ၶဝ်ႁဵတ်းၼႆႉ လုၵ်ႉတီႈတိူင်း/ၸၼ်ႉၸႄႈမိူင်းသေၸတ်းႁဵတ်း၊ ၸတ်းႁဵတ်းတီႈဝၢင်းသဝ်ႁိၼ် ပၢင်လူင် ၼင်ႇၵဝ်ႇ။ ဢၼ်မႃးၶဝ်ႈပၢင်ပွႆးၵေႃႈ ပဵၼ်ၽူႈၶဝ်ႈၸုမ်း NLD လၢႆလၢႆ။ ၶဝ်ႁဵတ်းပဵၼ်ပၢင်ၶႅင်ႇၾိင်ႈႁိတ်ႈႁွႆးတႆးပႃးၸွမ်း။ မိူဝ်ႈၼႆႉဝၼ်းတီႈ 12 ၵၢင်ၶမ်ႈ တင်းဝၼ်းတီႈ 13 ၵၢင်ၶမ်ႈၶဝ်တေမီး ပၢင်ၶႅင်ႇတၢင်းၵႃႈၸၢဝ်းၶိူဝ်း NLD ၊ မိူဝ်ႈၽုၵ်ႈဝၼ်းတီႈ 13 တေႁဵတ်းဝၼ်းၵိူတ်ႇ ၸွမ်သိုၵ်းဢွင်ႇသၢၼ်း တီႈလၵ်းသဝ်ႁိၼ်ပႃးၸွမ်း”- ဝႃႈၼႆ။
ဝဵင်းပၢင်လူင် ၵိင်ႇၸႄႈဝဵင်းပၢင်လူင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်းၼႆႉ ပဵၼ်ဝဵင်းၵိုၵ်းပိုၼ်း လိၵ်ႈႁူမ်ႈမၢႆပၢင်လူင်။ ပဵၼ်ဝဵင်းဢၼ်ၽူႈဢွၼ်ႁူဝ်တႆး ၶၢင် ၶျၢင်း တင်းၽူႈဢွၼ်ႁူဝ်မၢၼ်ႈ ၸွမ်သိုၵ်းဢွင်ႇသၢၼ်း လႆႈၸႂ်လူင်းလၢႆးမိုဝ်း ၵေႃႇတင်ႈမိူင်းႁူမ်ႈတုမ်ၸွမ်းၵၼ် မိူဝ်ႈဝၼ်းတီႈ 12 ၾႅပ်ႊၿိဝ်ႊရီႊ 1947 ၊ မီးလၵ်းသဝ်ႁိၼ် ပဵၼ်တီႈမၢႆတွင်း ႁၢၼ်ႉတေႃႇဝၼ်းမိူဝ်ႈၼႆႉ။
