ၵေႃႁူမ်ႈသၢင်ႈၵူၼ်းၼုမ်ႇတႆး TYN တေႁူမ်ႈၵၼ်ပႆၶိုၼ်ႈလွႆ ၼႂ်းတိုဝ်ႉတၢင်းဝၼ်းၸိူဝ်ႉၸၢတ်ႈၸိုင်ႈ တႆး ၶွပ်ႈတဵမ် 71 ပီ ပိူဝ်ႈႁႂ်ႈၵူၼ်းၼုမ်ႇမီးလွင်ႈမိုတ်ႈၵိုဝ်းၸမ်ၸႂ်ၵၼ်လႄႈ ၵႆယၢၼ်ယႃႈမဝ်းၵမ်။

ပေႃးထိုင်မႃးဝၼ်းတီႈ 18/02/2018 လိူၼ်သီႇမႂ်ႇသီႇၶမ်ႈၼႆႉၵေႃႁူမ်ႈသၢင်ႈၵူၼ်းၼုမ်ႇတႆး Tai Youth Network တေႁူမ်ႈၵၼ်ပႆၶိုၼ်ႈလွႆ မူၺ်ႇတေႃႇႁူဝ်လိုင်း ၼႂ်းဢိူင်ႇပႅတ်ႇၵၢင်ႉ ၸႄႈဝဵင်း မိူင်းပဵင်း ၸႄႈတွၼ်ႈၵဵင်းတုင် ၸိုင်ႈတႆးပွတ်းဢွၵ်ႇ။

ၸၢႆးသူႉ ၽူႈၶၢၼ်ပၢၵ်ႇTYN လၢတ်ႈဝႃႈ – “ မိူဝ်ႈၼႂ်းဝၼ်းၸိူဝ်ႉၸၢတ်ႈၼၼ်ႉ ၵူၼ်းၼုမ်ႇၵေႃႈၸတ်း ဝၼ်းၸိူဝ်ႉၸၢတ်ႈယူႇၼႂ်းပိုၼ်ႉတီႈၽႂ်မၼ်း ၵွပ်ႈၼၼ်လႄႈ ႁဝ်းၸင်ႇတေဢွၼ်ၵၼ် ၶိုၼ်ႈလွႆၼႂ်း ဝၼ်ႈတီႈ 18 ၼႆႉ မၢႆတွင်းဝၼ်းၸိူဝ်ႉၸၢတ်ႈၸိုင်ႈတႆး ယွၼ်းၽိတ်ႈမွၵ်ႇထိုင်ၵူၼ်းၼုမ်ႇႁဝ်းၵူႈ တီႈၼႂ်းမိူင်းႁူမ်ႈတုမ်မႃးၶဝ်ႈႁူမ်ႈၼမ်ၼမ်သေၵမ်း ၼင်ႇႁိုဝ်ႁဝ်းတေမီးလွင်ႈၸမ်ၸႂ်ၵၼ် ၵွင်ႉသၢၼ် ႁူမ်ႈၵၢၼ်ၵၼ်ၵႂႃႇမိူဝ်းၼႃႈ ” ဝႃႈၼႆ။

ယိူင်းဢၢၼ်းဢၼ်ႁူမ်ႈၵၼ်ပႆၶိုၼ်ႈလွႆၼႆႉ – တႃႇႁႂ်ႈပဵၼ်လွင်ႈမေႃႁၵ်ႉသႃ ၼင်လိၼ်မိူင်းတႆးလႄႈ ႁၵ်ႉသႃသိင်ႇဝႅတ်ႉလွမ်ႉ ၾိင်ႈတိုၼ်းပဵၼ်၊ တႃႇဢွၵ်ႇႁႅင်းႁႂ်ႈယူႇလီၵႅၼ်ႇၶႅင်၊ တႃႇႁႂ်ႈပဵၼ်လွင်ႈလဵပ်ႈ ႁဵၼ်းတူဝ်ထူပ်း ၸႃႉႁူမ်ႈၶီ လီႁူမ်ႈသိူဝ်းၸွမ်းၵၼ်၊ တႃႇလဵပ်ႈႁဵၼ်းၵၢၼ်ယူႇသဝ်း ၵိၼ်သၢင်ႈၵူၼ်း ပိုၼ်ႉတီႈလႄႈ ႁၵ်ႉၸိူဝ်ႉၸၢတ်ႈၸိူဝ်ႉၶိူဝ်း၊ တႃႇႁႂ်ႈပဵၼ်လွင်ႈပူၵ်းသူၼ်းမေႃၶဝ်ႈၸႂ်ၸွႆႈထႅမ်ၼႂ်းၵၢၼ် ပွင်ဝၢၼ်ႈမိူင်းၶိုၼ်ႈယႂ်ႇငမ်းယဵၼ် ၸိူဝ်းၼႆႉ ။

ၵေႃႁူမ်ႈသၢင်ႈၵူၼ်းၼုမ်ႇတႆးၼႆႉ ႁူမ်ႈၵၼ်ၶိုၼ်ႈလွႆသုင်ၼႂ်းမိူင်းတႆးမႃးလၢႆလၢႆလုၵ်ႈ ပွၵ်ႈၵမ်း(1) ၶိုၼ်ႈ လွႆလဵင်း ၊ ပွၵ်ႈၵမ်း(2) ၶိုၼ်ႈလွႆၸၢင်ႉမိူင်းၶိူဝ်း၊ ပွၵ်ႈၵမ်း(3) ၶိုၼ်ႈလွႆသၢမ်သိပ်း (လွႆႁႃႈယွတ်ႈ) ၸႄႈဝဵင်းၵူတ်ႉၶၢႆ ၊ ပွၵ်ႈၵမ်း(4) ၶိုၼ်ႈလွႆၸၢင်ႉမိူင်းၵိုင်၊ ပွၵ်ႈၵမ်း( 5) ၶိုၼ်ႈသၼ်လွႆတႄးမိူင်း ၸေႈလၢၼ်ႉ ၸႄႈဝဵင်းမူႇၸေႊ ၊ လွႆဝိရႃႇသ ၸႄႈမိူင်းၶၢင်၊ လွႆသွင်ထဝ်ႈ ၸႄႈဝဵင်းမိူင်းသူႈ ၸိူဝ်းၼႆႉ။