ၵူၼ်းၼုမ်ႇတႆး ၸႄႈဝဵင်းတၢင်ႉယၢၼ်း ဢဵၼ်ႁႅင်း မွၵ်ႈ 50 ၵေႃႉ ႁူမ်ႈၵၼ်သေ ပႆၶိုၼ်ႈလွႆ ၼႂ်းဝၼ်းၸိူဝ်ႉၸၢတ်ႈတႆး ၶွပ်ႈတဵမ် 71 ပီ တႃႇပဵၼ်တီႈမၢႆတွင်း ၼႂ်းဝၼ်းၸိူဝ်ႉၸၢတ်ႈ ဝႃႈၼႆ။
ဝၼ်းတီႈ 07/02/2018 ၵူၼ်းၼုမ်ႇတႆး ၼႂ်းဢိူင်ႇမၢၼ်ႈၵၢတ်ႈ၊ ဢိူင်ႇၼႃးႁုၵ်ႇလႄႈ ဢိူင်ႇၼႃးငုၺ်း ႁူမ်ႈၵၼ်သေ ပႆ ၶိုၼ်ႈလွႆၼမ်ႉႁွမ် ၼႂ်းၸႄႈဝဵင်းတၢင်ႉယၢၼ်း ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ တႃႇႁႂ်ႈပဵၼ်တီႈမၢႆတွင်း ၼႂ်း ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈတဵမ် 71 ပီ ဝႃႈၼႆ။
ၸၢႆးပႃႉ ၽူႈၵပ်းသၢၼ် လႄႈ ၽူႈၵိူဝ်းၵုမ် ၵူၼ်းၼုမ်ႇတႆး ၸႄႈဝဵင်းတၢင်ႉယၢၼ်း လၢတ်ႈတီႈၸုမ်းၶၢဝ်ႇၽူႈတွႆႇ ႁွၵ်ႈဝႃႈ “ ၼႂ်းဝၼ်းၸိူဝ်ႉၸၢတ်ႈၸိုင်ႈတႆးၼႆႉ ယူႇတီႈၵူၼ်းၼုမ်ႇတႆး ၸႄႈဝဵင်းတၢင်ႉယၢၼ်းႁဝ်း ၸႅၵ်ႇပဵၼ် သွင်ၸုမ်း သေ ပႆၶိုၼ်ႈလွႆ၊ ၸုမ်းၼိုင်ႈသမ်ႉ ပႆၶိုၼ်ႈတီႈလွႆၼမ်ႉႁွမ်၊ ထႅင်ႈၸုမ်းၼိုင်ႈသမ်ႉ ပႆၶိုၼ်ႈလွႆလဵင်း ဢၼ်ပဵၼ်လွႆ သုင်သုတ်းၼႂ်းမိူင်းတႆးႁဝ်းၼၼ်ႉ။ ၵူၼ်းၼုမ်ႇတႆးႁဝ်း ဢၼ်ပႆၶိုၼ်ႈတီႈလွႆၼမ်ႉႁွမ်ၼႆႉတႄႉ ႁဝ်းၶႃႈ ၸတ်းႁဵတ်း မိူၼ်မိူဝ်ႈၵူႈပွၵ်ႈ တီႈဢၼ်ယၢမ်ႈၶိုၼ်ႈမႃးၼၼ်ႉ ဢွၼ်တၢင်းသုတ်း ႁဝ်းၶႃႈ ပူၵ်းတုင်းၸိူဝ်ႉၸၢတ်ႈတႆးႁဝ်း တီႈၼိူဝ်လွႆ၊ ဢွၼ်ၵၼ်တၵ်ႉယမ်တုင်းၸိူဝ်ႉၸၢတ်ႈႁဝ်း၊ သိုပ်ႇမိုတ်းၵိုဝ်းၵၼ်၊ ဢုပ်ႇၶႆႈၼႄပိုၼ်းပဵၼ်မႃး ဝၼ်းၸိူဝ်ႉၸၢတ်ႈၸိုင်ႈ တႆး။ ယဝ်ႉၵေႃႈ ႁူမ်ႈၵၼ်ၵိၼ်ၶဝ်ႈႁူမ်ႈမူႇသေ ၶိုၼ်းပႆလူင်းမႃး ၸဵမ်ၸိူဝ်းၼႆႉ” ဝႃႈၼႆ။
ၵူၼ်းၼုမ်ႇတႆး ၸႄႈဝဵင်းတၢင်ႉယၢၼ်း ဢၼ်ဢွၼ်ၵၼ်ပႆၶိုၼ်ႈလွႆၼမ်ႉႁွမ်ၼႆႉ ၶွၼ်ႈတုမ်ၵၼ် တီႈဝၢၼ်ႈၵုင်းမူင်ႈ ဢိူင်ႇၵုင်းမူင်ႈသေ ပႆၶိုၼ်ႈ။ ႁိုင် 2 ၸူဝ်ႈမူင်းၶိုင်ႈပၢႆ ဝႃႈၼႆ။
ၾၢႆႇၼိုင်ႈၵေႃႈ ၵူၼ်းၼုမ်ႇတႆး ပွတ်းႁွင်ႇ လၢႆလၢႆၸႄႈဝဵင်း ႁူမ်ႈၵၼ်ပႆၶိုၼ်ႈလွႆလဵင်း ၼႂ်းဝၼ်းၸိူဝ်ႉၸၢတ်ႈ ၸိုင်ႈတႆး ၶွပ်ႈတဵမ် 71 ပီ ၼင်ႇၵဝ်ႇ။ ၼႂ်းဝၼ်းတီႈ 06/02/2018 ၼၼ်ႉ ၵူၼ်းၼုမ်ႇတႆး ႁူမ်ႈၵၼ်တီႈဝတ်ႉဝဵင်းမိူင်းပၢတ်ႇသေ ယၢမ်း 9 မူင်းၶိုင်ႈ ၵၢင်ၼႂ်သမ်ႉ ဢွၼ်ပႆၶိုၼ်ႈလွႆ ဝႃႈၼႆ။
ၵူၼ်းၼုမ်ႇၸႄႈဝဵင်းတၢင်ႉယၢၼ်း ဢၼ်ပႆၶိုၼ်ႈလွႆလဵင်းၼၼ်ႉ လၢတ်ႈဝႃႈ “ ႁဝ်းဢွၼ်ၵၼ်တႄႇၶိုၼ်ႈ မိူဝ်ႈဝၼ်းတီႈ 6 ယဝ်ႉၵေႃႈ ဢွၼ်ၵၼ်ၵႂႃႇလိုဝ်ႈတီႈပၢင်သဝ်းၸဝ်ႈၾႃႉ ၶိုၼ်းၼိုင်ႈသေ ထိုင်မႃး ဝၼ်းတီႈ 7 ၵၢင်ၼႂ် 6 မူင်းၸင်ႇ လုၵ်ႉသိုပ်ႇပႆၶိုၼ်ႈၽႅဝ်ၸိၵ်းလွႆၼၼ်ႉ မွၵ်ႈယၢမ်း 7 မူင်းၶိုင်ႈ၊ ထိုင်မႃး ယၢမ်း 8 မူင်းၶိုင်ႈသမ်ႉ ႁဝ်းၶႃႈ ဢွၼ်ၵၼ်တၵ်ႉ ယမ်တုင်းၸိူဝ်ႉၸၢတ်ႈတႆးသေ မွၵ်ႇလၢတ်ႈလွင်ႈပဵၼ်မႃး ဝၼ်းၸိူဝ်ႉၸၢတ်ႈၸိုင်ႈတႆး” ဝႃႈၼႆ။
ၵူၼ်းၼုမ်ႇတႆး ၸိူဝ်းပႆၶိုၼ်ႈလွႆလဵင်းသမ်ႉ ၵူၼ်းၼုမ်ႇတၢင်ႉယၢၼ်း၊ မိူင်းတွမ်း၊ ၼမ်ႉၽၵ်းလိူၼ်း၊ မိူင်းယႆ၊ ႁူဝ်ယလႄႈ မိူင်းပၢတ်ႇ ၸဵမ်ၸိူဝ်းၼႆႉ လွႆလဵင်းၼႆႉ မီးၼႂ်းၸႄႈဝဵင်းတၢင်ႉယၢၼ်း ပဵၼ်လွႆဢၼ်သုင်သုတ်းၼႂ်းၸိုင်ႈတႆး တၢင်းသုင် မီး 8,777 ထတ်း။
လိူဝ်ၼၼ်ႉ ၵူၼ်းၼုမ်ႇတႆး လွၵ်ႉၸွၵ်ႇၵေႃႈ ပႆတၢင်းၶိုၼ်ႈလွႆၼွၵ်ႇဝူဝ်း မၢႆတွင်းဝၼ်းၸိူဝ်ႉၸၢတ်ႈၸိုင်ႈတႆးၼင်ႇၵဝ်ႇ။
ၵူၼ်းၼုမ်ႇၸိူဝ်းပႆၶိုၼ်ႈလွႆၼႆႉ ယူႇတီႈၸုမ်းၵူၼ်းၼုမ်ႇတူင်ႇတၢင်ႇ ပိုၼ်ႉတီႈၽႂ်မၼ်းသေ ၶိုၼ်ႈလွႆၵူၺ်း။ ၵူၼ်းၼုမ်ႇတႆး TYN ပတ်းပိုၼ်ႉမိူင်းတႆးတႄႉ တေႁူမ်ႈၵၼ်သေ ၶိုၼ်းလွႆမူၺ်ႇတေႃႇႁူဝ်လိုင်း ၼႂ်းဝၼ်းတီႈ 18 လိူၼ်ၾႅပ်ႊၿိဝ်ႊရီႊၼႆႉ ဝႃႈၼႆ။
