ပၢင်ယုၵ်ႉမုၼ်း ၼမ်ႉၵတ်ႉၵူၼ်းၼုမ်ႇတႆးလႄႈ ၸဝ်ႈႁႆႈၸဝ်ႈၼႃး ၸတ်းႁဵတ်းတီႈ ဢိူင်ႇဝၢၼ်ႈၵၢတ်ႈ ၸႄႈဝဵင်းတၢင်ႉ ယၢၼ်း ၽူႈၶဝ်ႈႁူမ်ႈလဵပ်ႈႁဵၼ်း 100 ပၢႆ ဝႃႈၼႆ။

ဝၼ်းတီႈ 09-12/02/2018 ၶၢဝ်းတၢင်း 4 ဝၼ်း ၵူၼ်းၼုမ်ႇတႆး ဝၢၼ်ႈၵၢတ်ႈ ဢွၼ်ႁူဝ်သေ ၸတ်းႁဵတ်းပၢင်ယုၵ်ႉ မုၼ်းၼမ်ႉ ၵတ်ႉၵူၼ်း ၼုမ်ႇတႆးလႄႈ ၸဝ်ႈႁႆႈၸဝ်ႈၼႃး တီႈဝတ်ႉဝိႁၢရ်လူင် ဝၢၼ်ႈၵၢတ်ႈ ဢိူင်ႇဝၢၼ်ႈၵၢတ်ႈ ၸႄႈ ဝဵင်းတၢင်ႉယၢၼ်း ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ။ ပၢင်သွၼ်ၼႆႉ ယိူင်းဢၢၼ်း ယုၵ်ႉမုၼ်း ၽိူမ်ႉထႅမ်ၼမ်ႉၵတ်ႉၵူၼ်းၼုမ်ႇ လႄႈ ၸဝ်ႈႁႆႈ/ၼႃး ဝႃႈၼႆ။

ၸၢႆးပႃႉ ၽူႈၵိူဝ်းၵုမ်ၵူၼ်းၼုမ်ႇတႆး ၸႄႈဝဵင်းတၢင်ႉယၢၼ်း လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ ယိူင်းဢၢၼ်း ဢၼ် လႆႈၸတ်းႁဵတ်းပၢင်ယုၵ်ႉမုၼ်းၼႆႉ ၶႂ်ႈႁႂ်ႈၼမ်ႉၵတ်ႉၵူၼ်းၼုမ်ႇႁဝ်း ၸဝ်ႈႁႆႈၸဝ်ႈၼႃးႁဝ်း မီးပိုၼ်ႉႁူႉၼမ်ႉၵတ်ႉ ၶိုၼ်ႈယႂ်ႇမႃးထႅင်ႈ။ ၼႂ်းပၢင်သွၼ်ၼႆႉ မီးၵူၼ်းၼုမ်ႇတင်းၸဝ်ႈႁႆႈ/ၼႃး ၼႂ်းဢိူင်ႇဝၢၼ်ႈၵၢတ်ႈ၊ ဢိူင်ႇၼႃး ႁုပ်ႇလႄႈ ဢိူင်ႇၼႃးငုၺ်း ၸိူဝ်းၼႆႉမႃးၶဝ်ႈႁူမ်ႈ” ဝႃႈၼႆ။

ပၢင်ယုၵ်ႉမုၼ်းၼမ်ႉၵတ်ႉၵူၼ်းၼုမ်ႇတႆးလႄႈ ၸဝ်ႈႁႆႈ/ၼႃးၼႆႉ ၶူးဢၼ်မႃးပူင်သွၼ်ပၼ်သမ်ႉ ၵေႃပူၵ်းပွင်ၵူၼ်း ၼုမ်ႇၸိုင်ႈတႆး SSYAC ၊ ၸၢႆးႁိၼ်သႅင်၊ ၵေႃႁူမ်ႈသၢင်ႈၸဝ်ႈႁႆႈၸဝ်ႈၼႃး ၸိုင်ႈတႆးလႄႈ ၸၢႆးဝၼ်းလႅင်းၶမ်း ၽူႈ တႅၼ်းသၽႃးၸိူဝ်ႉၸၢတ်ႈ ၸႄႈတွၼ်ႈလႃႈသဵဝ်ႈ ၸဵမ်ၸိူဝ်းၼႆႉ ဝႃႈၼႆ။

ႁူဝ်ၶေႃႈ ဢၼ်ပူင်သွၼ်ၵႂႃႇ ၼႂ်းပၢင်သွၼ် ယုၵ်ႉမုၼ်းၼမ်ႉၵတ်ႉၵူၼ်းၼုမ်ႇတႆးလႄႈ ၸဝ်ႈႁႆႈ/ၼႃးသမ်ႉ ၵဵဝ်ႇၵပ်း လူၺ်ႈ ပိုၼ်းတႆး၊ လွင်ႈပူၵ်းပွင် ၸဝ်ႈႁႆႈၸဝ်ႈၼႃး၊ လွင်ႈယူႇၵိၼ်သၢင်ႈလႄႈ လၢႆးၵွင်ႉသၢၼ်ၶဝ်ႈဢွၵ်ႇၵပ်းသိုပ်ႇႁႃၵၼ်၊ လၢႆးၵဵပ်းၶေႃႈမုလ်း ၶၢဝ်ႇသၢရ် ၸဵမ်ၸိူဝ်းၼႆႉ ဝႃႈၼႆ။