ၸုမ်းၸၢဝ်းၶိူဝ်း ၸုမ်းမွၼ်းတင်းၸုမ်းလႃးႁူႇ ႁဵတ်းပၢင်သပ်းၸႅင်ႈၶၢဝ်ႇ ၼႂ်းဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈၶူပ်ႇ 71 ပီ တီႈလွႆတႆးလႅင်း၊ လွင်ႈတေလူင်းလၢႆးမိုဝ်းၵိုတ်းယိုဝ်းတူဝ်ႈမိူင်း (NCA) ဝၼ်းတီႈ 13 လိူၼ်ၼႆႉ။

ပၢင်ပွႆးၶုၵ်းထူပ်းယုၵ်ႉယွင်ႈ ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈၶူပ်ႇ 71 ပီ၊ ဝၼ်းတီႈ 7 ၾႅပ်ႊၿိဝ်ႊရီႊ 2018 ၊ ဢၼ်ယူႇတီႈၶွင်ႇသီႇဢဝ်ၶိုၼ်းၸိုင်ႈတႆး (RCSS/SSA) ၸတ်းတီႈငဝ်ႈၸိုင်ႈ လွႆတႆးလႅင်းၼႆႉ မီးၸုမ်းၸၢဝ်းၶိူဝ်းယိပ်းၵွင်ႈၵၢင်ႇလုၵ်ႉၽိုၼ်ႉ၊ ပႃးၸဵမ်ၸုမ်းလူင်းလၢႆးမိုဝ်းၵိုတ်းယိုဝ်ႈတူဝ်ႈမိူင်း (NCA) ဢိၵ်ႇတင်း ၸုမ်းဢမ်ႇလူင်းလၢႆးမိုဝ်းၶဝ်ႈႁူမ်ႈ။ ၼႂ်းတိုဝ်ႉတၢင်းၼႆႉ ယူႇတီႈ ပႃႇတီႇမိူင်းမွၼ်းမႂ်ႇ (NMSP) တင်း ႁူမ်ႈတုမ်ၻီႊမူဝ်ႊၶရႅတ်ႊတိၵ်ႊလႃးႁူႇ (LDU) ဢၼ်ပဵၼ်လုၵ်ႈၸုမ်း ၶွင်ႊသီႊၾႅတ်ႊၻရႄႊၵူႈၸၢဝ်းၶိူဝ်း ၽွမ်ႉႁူမ်ႈ (UNFC) လႆႈႁဵတ်းပၢင်သပ်းၸႅင်ႈၶၢဝ်ႇ လွင်ႈတေလူင်းလၢႆးမိုဝ်း NCA ၼႂ်းဝၼ်းတီႈ 13 တေထိုင်ၼႆႉ။

ၼၢႆႇသူၺ်ႇတဵင်း ၽူႈၶဝ်ႈၶွမ်ႊမတီႊငဝ်ႈငုၼ်း NMSP လၢတ်ႈဝႃႈ- “ၸုမ်းႁဝ်းၼႆႉ တီႈတႄႉမၼ်းလႆႈ လူင်းလၢႆးမိုဝ်းၵိုတ်းသိုၵ်းမႃးၸွမ်း လူင်ပွင်ၸိုင်ႈၸုမ်းသိုၵ်းမၢၼ်ႈ မိူဝ်ႈပီ 1995 ၶၢဝ်းတၢင်းႁိုင်ၼၢၼ်းမႃးယဝ်ႉ။ ဢၼ်ႁဝ်းတတ်းသိၼ်ၸႂ်လူင်းလၢႆးမိုဝ်း NCA ပွၵ်ႈၼႆႉ ယွၼ်ႉဝႃႈၾၢႆႇလူင်ပွင်ၸိုင်ႈၵေႃႈတိုၵ်းသူၼ်းဝႃႈ ပေႃးဝႃႈလူင်းလၢႆးမိုဝ်း NCA ယဝ်ႉ ၶဝ်ႈဢုပ်ႇဢူဝ်းၵၼ်တၢင်းၵၢၼ်မိူင်းလႆႈ”-ဝႃႈၼႆ။

ၵႅမ်ႁူဝ်ပဝ်ႈၸုမ်းလႃးႁူႇ LDU ၵေႃႈလၢတ်ႈဝႃႈ- ” ဢၼ်ၸုမ်းႁဝ်းတတ်းသဵၼ်ႈၸႂ်လူင်းလၢႆးမိုဝ်း NCA ပွၵ်ႈၼႆႉ ယွၼ်ႉဝႃႈၶႂ်ႈသၢင်ႈလွင်ႈငမ်းယဵၼ် ၼႂ်းဝၢၼ်ႈၼႂ်းမိူင်း၊ ၶႂ်ႈၵႄႈလိတ်ႈပၼ်ႁႃၵၢၼ်မိူင်း လူၺ်ႈလွၵ်းလၢႆးဢုပ်ႇဢူဝ်းၵၢၼ်မိူင်း”- ဝႃႈၼႆ။

ၼွၵ်ႈသေၼၼ်ႉ တူဝ်တႅၼ်းၸုမ်းမွၼ်း လၢတ်ႈတွပ်ႇပႃး ၵႂၢမ်းထၢမ်ၽူႈသိုဝ်ႇၶၢဝ်ႇၶဝ်ဝႃႈ- ဢၼ်ႁဝ်း တတ်းသိၼ်ၸႂ် လူင်းလၢႆးမိုဝ်းၼႆႉ ဢမ်ႇၸႂ်ႈၶေႃႈတႅပ်းတတ်းၸုမ်း UNFC ၊ ပဵၼ်ၶေႃႈတႅပ်းတတ်း ၼႂ်းၸုမ်းႁဝ်းၵူၺ်း၊ ၸိူင်ႉႁိုဝ်ၵေႃႈ ႁဝ်းယွၼ်းဢၼုၺၢတ်ႈတီႈ UNFC ၸွမ်း-ဝႃႈၼႆ။

ၸဝ်ႈသိုၵ်းလူင်ၸၢႆးငိုၼ်း ၽူႈၶၢၼ်ပၢၵ်ႇ RCSS လၢတ်ႈဝႃႈ- မိူဝ်ႈဢွၼ်တၢင်း ဢၼ်လူင်းလၢႆးမိုဝ်း NCA ၼႆႉမၼ်းမီး 8 ၸုမ်းၵူၺ်း။ မိူဝ်ႈလဵဝ်ႁူႉတႅၵ်ႇလႅင်းယဝ်ႉ တေၽိူမ်ႉမႃးထႅင်ႈ 2 ၸုမ်း၊ ဢၼ်တေလူင်းလၢႆးမိုဝ်း ဝၼ်းတီႈ 13 လိူၼ်ၼႆႉ တေမီးၸုမ်းပႃႇတီႇမိူင်းမွၼ်းမႂ်ႇ (NMSP) တင်းၸုမ်းၻီႇမူဝ်ႇၶရႅတ်ႉတိၵ်ႉလႃးႁူႇ (LDU) -ဝႃႈၼႆ။

မၼ်းၸဝ်ႈယၢမ်ႈလၢတ်ႈတီႈ ၸုမ်းၶၢဝ်ႇၽူႈတွႆႇႁွၵ်ႈ ဢွၼ်ၼႃႈၼႆႉပႃးဝႃႈ- ၸုမ်းၸၢဝ်းၶိူဝ်းႁဝ်း ထုၵ်ႇလီလူင်း လၢႆးမိုဝ်း NCA ၼမ်ၼမ်။ ပေႃးၸုမ်းလူင်းလၢႆးမိုဝ်းမီးၼမ် ပေႃးဝႃႈဢုပ်ႇဢူဝ်းၵၢၼ်မိူင်းၵၼ် တင်းၸုမ်းလူင်ပွင်ၸိုင်ႈ တင်းတပ်ႉမတေႃႇသိုၵ်းမၢၼ်ႈမႃး ႁဝ်းတေမီးႁႅင်းသဵတ်ႈၵႃႈသဵတ်ႈႁူဝ် ၵၢၼ်မိူင်းၼမ်၊ ၵွပ်ႈဝႃႈၵူၼ်းႁဝ်းၼမ်-ဝႃႈၼႆ။

ၸုမ်း UNFC ၼႆႉ ယၢမ်းလဵဝ်ၵိုတ်းဝႆႉလုၵ်ႈၸုမ်းပဵၼ်တၢင်းၵၢၼ် 4 ၸုမ်း၊ မိူၼ်ၼင်ႇပႃႇတီႇမိူင်းမွၼ်းမႂ်ႇ (NMSP) ၊ ႁူမ်ႈတုမ်ၻီႊမူဝ်ႊၶရႅတ်ႊတိၵ်ႊလႃးႁူႇ (LDU) ၊ ပႃႇတီႇမႂ်ႇသုင်ၸိူဝ်ႉၸၢတ်ႈယၢင်းလႅင် (KNPP) ၊ ၶွင်ႊသီႊၸိူဝ်ႉၸၢတ်ႈရၶႅင်ႇ (ANC) ၸိူဝ်းၼႆႉ။ ပေႃးဝႃႈၸုမ်းမွၼ်း တင်းၸုမ်းလႃးႁူႇ လူင်းလၢႆးမိုဝ်း NCA ယဝ်ႉၵေႃႈ တေၵိုတ်းၸုမ်း ယၢင်းလႅင် KNPP တင်းရၶႅင်ႇ ANC သွင်ၸုမ်း။