ၼႂ်းဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈၶူပ်ႇ 71 ပီ ၾႅပ်ႊၿိဝ်ႊရီႊ 7 ဝၼ်း၊ 2018 ၼႆႉ သိုၵ်း TNLA တင်းသိုၵ်း RCSS တိုၵ်းယိုဝ်းၵၼ် တီႈလႅၼ်ၶႅၼ်ႈၸႄႈဝဵင်းၵျွၵ်ႉမႄးတင်း ၸႄႈဝဵင်းၼမ်ႉသၼ်ႇ ၸိုင်ႈတႆးပွတ်းႁွင်ႇ၊ သွင်ၾၢႆႇမီးလွင်ႈလူႉသုမ်းၼင်ႇၵၼ်။
ဝၼ်းတီႈ 07/02/2018 ဢၼ်ပဵၼ်ဝၼ်း ၼႂ်းဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈၶူပ်ႇ 71 ပီၼႆႉ တပ်ႉသိုၵ်းတဢၢင်း TNLA တင်း တပ်ႉသိုၵ်းၸိုင်ႈတႆး (RCSS/SSA) လႆႈပဵၼ်ပၢင်တိုၵ်းၵၼ် တီႈႁိမ်းၵိဝ်ႇၸူင်ပဵင်းမႆႉႁုင်း ၾၢႆႇၸၢၼ်းဝၢၼ်ႈၵႆႇတၢႆ ၵႄႈၵၢင်ၶွပ်ႇလႅၼ်ၶႅၼ်ႈ ဝဵင်းၼမ်ႉသၼ်ႇတင်းဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ-ၼႆယဝ်ႉ။
ႁွင်ႈၵၢၼ်ၶၢဝ်ႇ RCSS/SSA တႆးလွတ်ႈလႅဝ်း ႁၢႆးငၢၼ်းဝႆႉဝႃႈ- ပၢင်တိုၵ်းၵမ်းၼႆႉ ၾၢႆႇတပ်ႉသိုၵ်းတဢၢင်း TNLA လႆႈလူႉသဵင်ႈတၢႆ 3 ၵေႃႉ၊ ဝၢတ်ႇၸဵပ်း 5 ၵေႃႉ၊ သုမ်းၶိူင်ႈသိုၵ်းၵွင်ႈၵၢင်ႇမၢၵ်ႇမိုဝ်ႈၸိုၼ်းယၢမ်းတင်းၼမ်။ ၾၢႆႇတပ်ႉသိုၵ်းၸိုင်ႈတႆး (RCSS/SSA) လႆႈလူႉသုမ်း 1 ၵေႃႉ၊ ဝၢတ်ႇၸဵပ်း 3 ၵေႃႉ ၼႆယဝ်ႉ။
ဝၼ်းတီႈ 7 လိူၼ်ၾႅပ်ႊၿိဝ်ႊရီႊ 2018 တင်ႈတႄႇၵၢင်ၼႂ် 7 မူင်းပၢႆ ၸုမ်းသိုၵ်း TNLA ႁႅင်းၵူၼ်းပၢၵ်ႇပၢႆ ၸတ်းႁဵတ်းသွင်ငႃးသိုၵ်းသေ ၶိုၼ်ႈလေႃႇတိုၵ်းတပ်ႉသိုၵ်း RCSS/SSA ၊ သွင်ၾၢႆႇလႆႈပဵၼ်ပၢင်တိုၵ်းၵၼ် တေႃႇထိုင်ယၢမ်း 9 မူင်း-ၼႆယဝ်ႉ။
ၽူႈမီးပုၼ်ႈၽွၼ်းၾၢႆႇပွင်ႇၶၢဝ်ႇ TNLA မၢႆးဢၢႆႈၵျေႃႇ လၢတ်ႈတီႈသိုဝ်ႇၶၢဝ်ႇ RFA ဝႃႈ- ၾၢႆႇ RCSS ပူၼ်ႉပႅၼ်ၶဝ်ႈမႃးၼႂ်းၼႃႈလိၼ် TNLA လႄႈလႆႈပဵၼ်ပၢင်တိုၵ်းၵၼ်။
ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး (RCSS/SSA) ၼႆႉ ပဵၼ်ၸုမ်းၼိုင်ႈၼႂ်း 8 ၸုမ်း ဢၼ်လူင်းလၢႆးမိုဝ်းလိၵ်ႈႁူမ်ႈမၢႆ ၵိုတ်းတိုၵ်းတူဝ်ႈမိူင်း (NCA) ဝႆႉတင်း လူင်ပွင်ၸိုင်ႈမၢၼ်ႈ တပ်ႉမတေႃႇမၢၼ်ႈ။ ၵူၺ်းၵႃႈ တပ်ႉသိုၵ်းတဢၢင်း TNLA ပဵၼ်ၸုမ်းဢၼ်ဢမ်ႇလူင်းလၢႆးမိုဝ်း NCA သေ ၶဝ်ႈပႃးဝႆႉၼႂ်းၸုမ်းဢူၺ်းလီပွတ်းႁွင်ႇ၊ ၸုမ်း FPNCC ဢၼ်တပ်ႉသိုၵ်းမိူင်းဝႃႉၽွမ်ႉႁူမ်ႈ (UWSA) ဢွၼ်ႁူဝ်ၼမ်းၼႃႈဝႆႉ။
