ပၢင်ပွႆးဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈတဵမ် 71 ပီ တီႈငဝ်ႈၸိုင်ႈလွႆတႆးလႅင်း ၸတ်းပႃးပၢင်ၶႅင်ႇ ၼၢင်းငၢမ်း Miss Loi Tai Leng 2018။
ဝၼ်းတီႈ 6 – 7/02/2018 ၼႂ်းတိုဝ်ႉတၢင်းဝၼ်းၸိူဝ်ႉၸၢတ်ႈၸိုင်ႈတႆး ၸုမ်းပွင်ၵၢၼ်ပၢႆးပၺ်ၺႃ ၶွင်ႇသီႇဢဝ်ၶိုၼ်းၸိုင်ႈတႆးလႄႈၸုမ်းၼၢင်းယိင်းၶွင်ႇသီႇဢဝ်ၶိုၼ်းၸိုင်ႈတႆး ဢွၼ်ႁူဝ်ၸတ်းႁဵတ်း ပၢင်ၶႅင်ႇၼၢင်းႁၢင်ႈလီ Miss Loi Tai Leng 2018 တီႈငဝ်ႈၸိုင်ႈလွႆတႆးလႅင်း မီးသၢဝ် 17 ၼၢင်း ၶဝ်ႈၶႅင်ႇ ။
ယိူင်းဢၢၼ်းဢၼ်လႆႈၸတ်းပၢင်ၶႅင်ႇၼၢင်းငၢမ်းမီး 3 ၶေႃႈ တႃႇတိုၵ်းသူၼ်းပႂ်ႉပႃးၶူဝ်းၼုင်ႈတၢင်းဝႆ ၸၢဝ်းၶိူဝ်းၼႂ်းမိူင်းတႆး၊ တႃႇႁႂ်ႈၸၢဝ်းၶိူဝ်းဢၼ်ယူႇသဝ်းၼႂ်းမိူင်းတႆး တိူဝ်းမီးလွင်ႈၸမ်ၸႂ်ၵၼ်၊ ႁႂ်ႈပဵၼ် တီႈၼႄၼမ်ႉၵတ်ႉတၢင်းၶႅၼ်ႇၼၢင်းယိင်းၸၢဝ်းၶိူဝ်းၼႂ်းမိူင်းတႆး ၸဵမ်ၸိူဝ်းၼႆႉ။
ၼၢင်းမူဝ်ၶၢဝ်ၼူၼ်း ၽူႈၶၢၼ်ပၢၵ်ႇ ၸုမ်းၼၢင်းယိင်း RCSS လၢတ်ႈဝႃႈ – “ ပၢင်ၶႅင်ႇၼႆႉတေလႆႈဝႃႈ ပဵၼ်တိုဝ်ႉတၢင်းလီ တွၼ်ႈတႃႇၵူၼ်းၼုမ်ႇၸၢဝ်းၶိူဝ်းၼႂ်းမိူင်းတႆးႁဝ်း ပွၵ်ႈၼႆႉပဵၼ်ပွၵ်ႈႁႅၵ်ႈလႄႈ တေမီးလွင်ႈၶွင်ႉၶမ်လၢႆဢၼ်ယူႇ မိူဝ်းၼႃႈမႃးၵေႃႈတေမီးထႅင်ႈယူႇ ယုမ်ႇယမ်ဝႃႈပေႃးၸတ်းထႅင်ႈ ၼႆ လွင်ႈၼမ်ႉၵတ်ႉလႄႈတူဝ်ထူပ်းၵူၼ်းၼုမ်ႇႁဝ်းတေတိူဝ်းတွၼ်းမႃးထႅင်ႈယူႇ ၶႂ်ႈၾၢၵ်ႇထိုင် ၵူၼ်းၼုမ်ႇ ႁဝ်း ႁႂ်ႈဢွၼ်ၵၼ်ၶတ်းၸႂ်လဵပ်ႈႁဵၼ်း မီးတၢင်းႁူႉၼမ်ၼမ် မိူၼ်ၼင်ႇလွင်ႈလိၵ်ႈလၢႆးပိုၼ်း ၊ၶူဝ်းၶွင်ၵိုၵ်းၼမ်ႉလိၼ်ႁိၼ်ၽႃ မိူင်းႁဝ်းၸိူဝ်းၼႆႉ ၼင်ႇႁိုဝ်ပေႃးတေၸၢင်ႈလၢတ်ႈႁႂ်ႈလုမ်ႈၾႃႉႁူႉႁၼ် တၢင်းႁၢင်ႈလီမိူင်းတႆး ” ဝႃႈၼႆ။
ၼၢင်းႁၢင်ႈလီ ဢၼ်လႆႈတီႈ 1 ပဵၼ် ယိင်းမွၵ်ႇၵွၼ် ၶမ်း ႁွင်ႈၵၢၼ်ၾၢႆႇပိုၼ်ၽၢဝ်ႇ RCSS/SSA ၊တီႈ 2ပဵၼ် ယိင်းၼွင်ႉမူၺ် ၸုမ်းၵူၼ်းၼုမ်ႇတႆး TYO တူၼ်ႈတီး၊ တီႈ 3 ပဵၼ် ယိင်းမူၺ်ၽွင် ၸဝ်ႈၼႃႈတီႈၾၢႆႇၵပ်းသိုပ်ႇတိတ်းတေႃႇၼွၵ်ႈမိူင်းၸိူဝ်းၼႆႉ ။
ၼၢင်းငၢမ်းဢၼ်လႆႈသူးတီႈၼိုင်ႈလႆႈႁပ်ႉလူဝ်ႉရၢင်းဝလ်း သၢႆပၢႆႉ ၼၢင်းငၢမ်းလႄႈငိုၼ်း 10,000 ဝၢတ်ႇ၊ တီႈ 2 လႆႈငိုၼ်းသူး 7,000 ဝၢတ်ႇ ၊ တီႈ 3 လႆႈ 5,000 ဝၢတ်ႇ သူးယွမ်ႉၸႂ်ၼိုင်ႈၵေႃႉလႂ် 3,000 ဝၢတ်ႇ။
လိူဝ်သေပၢင်ၶႅင်ႇၼၢင်းႁၢင်ႈလီယဝ်ႉ ယင်းမီးပၢင်တွၼ်ႈသူးၽူႈတႅမ်ႈၵႂၢမ်း/ ႁွင်ႉၵႂၢမ်း မိူၼ်ၼင်ႇ ၸၢႆးၶမ်းလဵၵ်း၊ ၸၢႆးထႅၼ်ႈလႅဝ်း၊ ၸၢႆးတႃႇဢူး၊ ၸၢႆးသၢႆလၢဝ်၊ ၼၢင်းၶမ်းၼွင်ႉၸိူဝ်းၼႆႉ။ ယွင်ႈယေႃး ၶႅပ်းၸုမ်ႈလႄႈ သၢႆၶေႃးၶႅပ်းၶမ်း ဢၼ်မီးၵႃႈၶၼ်မွၵ်ႈ 20,000 ဝၢတ်ႇ (ငိုၼ်းမၢၼ်ႈ 8 သႅၼ်ပၢႆ) ။
