ၽူႈတႅၼ်းသၽႃးၵူၼ်းမိူင်း ၸႄႈဝဵင်းမိူင်းယႆ တွင်ႈထၢမ် ၼႂ်းပၢင်ၵုမ်သၽႃး တီႈၼေႇပျီႇတေႃႇဝႃႈ ၸွင်ႇတေမီး ၵၢၼ်ႁၢင်ႈႁႅၼ်းပၼ်ၶူးလူင်ၽူႈၵွၼ်းႁူင်းႁဵၼ်း19 ၵေႃႉ တႃႁူင်းႁဵၼ်း 19 လင်၊ ႁူင်းႁဵၼ်းလူင်ပွင်ၸိုင်ႈ ၼႂ်းၸႄႈဝဵင်း မိူင်းယႆ ၸိူဝ်းႁၢမ်းပဝ်ႇ ၽူႈၵွၼ်းႁူင်းႁဵၼ်း ဝႃႈၼႆ။
ဝၼ်းတီႈ 07/02/2018 ၸၢႆးသီႇႁႃႉၵျေႃႇ ၽူႈတႅၼ်းသၽႃးၵူၼ်းမိူင်း ၸႄႈဝဵင်းမိူင်းယႆ တွင်ႈထၢမ်ၼႂ်းပၢင်ၵုမ်သၽႃး ၵူၼ်းမိူင်း တီႈၼေႇပျီႇတေႃႇ လွင်ႈႁူင်းႁဵၼ်းလူင်ပွင်ၸိုင်ႈမၢၼ်ႈ ၼႂ်းၸႄႈဝဵင်းမိူင်းယႆ 19 လင် ၸၼ်ႉဢွၼ်ႇ၊ ၸၼ်ႉၵၢင်လႄႈ ၸၼ်ႉသုင် ၸိူဝ်းၼၼ်ႉ ယွၼ်ႉႁၢမ်းပဝ်ႇဝႆႉ ၽူႈၵွၼ်းႁူင်းႁဵၼ်းလႄႈ ၸွင်ႇတၢင်းၾၢႆႇပၢႆးပၺ်ၺႃ မိူင်းႁူမ်ႈတုမ် မီးၽႅၼ်ၵၢၼ်တေတမ်းဝၢင်းပၼ် ၽူႈၵွၼ်းႁူင်းႁဵၼ်း တႃႇႁူင်းႁဵၼ်း 19 လင်ၼႆႉ ဝႃႈၼႆ။
ၸၢႆးသီႇႁႃႉၵျေႃႇ ၽူႈတႅၼ်းသၽႃးၵူၼ်းမိူင်းၸႄႈဝဵင်းမိူင်းယႆ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ ႁူင်းႁဵၼ်းလူင် ပွင်ၸိုင်ႈမၢၼ်ႈ ၼႂ်းၸႄႈဝဵင်းမိူင်းယႆ ႁဝ်းၶႃႈၼႆႉ တင်းမူတ်းမီး 92 လင်။ ၼႂ်းၼႆႉ တႃႇႁူင်းႁဵၼ်း 19 တီႈ ၼၼ်ႉ ဢမ်ႇမီးၽူႈၵွၼ်းႁူင်းႁဵၼ်း၊ ပႃးႁူင်းႁဵၼ်းၸၼ်ႉသုင် ၼႂ်းၸႄႈဝဵင်းမိူင်းယႆ လင်ၼိုင်ႈ။ တင်ႈတႄႇပိုတ်ႇ ႁူင်းႁဵၼ်းမႃး ထိုင်တေႃႈလဵဝ် ပႆႇမီး ၽူႈၵွၼ်းႁူင်းႁဵၼ်း။ ပေႃးဢမ်ႇမီးၽူႈၵွၼ်း ႁူင်းႁဵၼ်းၼႆ ၾၢႆႇပူၵ်းပွင် ႁူင်းႁဵၼ်း တေယူပ်ႈယွမ်း။ တေၵႂႃႇတုမ်ႉယွၼ်ႈပႃး လုၵ်ႈႁဵၼ်းၸိူဝ်းဢၼ်တေတွပ်ႇ ၸၼ်ႉသိပ်းဢေႃႈ။ ၵၢၼ်ပၢႆးပၺ်ၺႃမိူင်းႁဝ်းၼႆႉ တူၵ်းတႅမ်ႇသမ်ႉထုၵ်ႇလူင်လိုမ်းဝႆႉလႄႈ ၶႃႈႁဝ်းၸင်ႇတွင်ႈ ထၢမ်ၼႂ်းသၽႃးၼႆႉ” ဝႃႈၼႆ။
ၵဵဝ်ႇၵပ်းလွင်ႈၼႆႉ ယူႇတီႈဢူးမေႃႇထုၼ်း ၵႅမ်ၾၢႆႇပၢႆးပၺ်ၺႃ မိူင်းႁူမ်ႈတုမ် မိူင်းမၢၼ်ႈ တွပ်ႇလၢတ်ႈၶိုၼ်းဝႃႈ တေ ၽိူမ်ႉထႅမ် ၽူႈၵွၼ်း ႁူင်းႁဵၼ်းၸိူဝ်းၼၼ်ႉ။ ႁူင်းႁဵၼ်းၸၼ်ႉၵၢင်တႄႉ ပေႃးပီၼႃႈမႃး ၸင်ႇၽိူမ်ႉထႅမ်ပၼ်ၵႂႃႇ။ တေႃႈလဵဝ် တိုၵ်ႉႁၢင်ႈႁႅၼ်းဝႆႉယူႇ။ တီႈၸၼ်ႉသုင်ၵေႃႈ တေၽိူမ်ႉထႅမ် ပၼ်ၵႂႃႇ ယူႇ။ ၵူၺ်းၵႃႈ တေပဵၼ်မိူဝ်ႈလႂ်တႄႉ ပႆႇႁူႉ။ ၸၼ်ႉဢွၼ်ႇ/မူႇလတႄႉ တေၸၢင်ႈပႆႇႁပ်ႉႁွင်းဝႃႈ လူဝ်ႇ ၽိူမ်ႉထႅမ်ၽူႈၵွၼ်း ႁူင်းႁဵၼ်း ၵူၺ်းၵႃႈ တိုၵ်ႉလူဝ်ႇၶူး သွၼ်မၼ်းထႅင်ႈတင်းၼမ်ယူႇ လွင်ႈၼႆႉၵေႃႈ တိုၵ်ႉမီးတၢင်းယၢပ်ႇၽိုတ်ႇယူႇ” ဝႃႈၼႆ။
ၼႂ်းၸႄႈဝဵင်းမိူင်းယႆ ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇၼႆႉ တင်းမူတ်းႁူင်းႁဵၼ်းလူင်ပွင်ၸိုင်ႈ မီး 92 ႁူင်း ႁဵၼ်း။ ၼႂ်းၼၼ်ႉ ဢၼ်ႁၢမ်းပဝ်ႇ ၽူႈၵွၼ်းႁူင်းႁဵၼ်းဝႆႉသမ်ႉ 19 ႁူင်းႁဵၼ်း ၼႂ်း 19 ႁူင်းႁဵၼ်းၼၼ်ႉ ႁူင်းႁဵၼ်းၸၼ်ႉ သုင် 1 တီႈ၊ ၸၼ်ႉၵၢင် 2 တီႈလႄႈၸၼ်ႉ(ဢွၼ်ႇ) မူႇလ 16 တီႈ ဝႃႈၼႆ။
