ၸုမ်း UNFC တင်း PPST ႁူပ်ႉၵၼ် တီႈငဝ်ႈၸိုင်ႈလွႆတႆးလႅင်း ပွၵ်ႈၵမ်းႁႅၵ်ႈ ဢုပ်ႇဢူဝ်းၼႄၵၼ် လွင်ႈတူင်ႉၼိုင် ၸုမ်းၽႂ်မၼ်း လႄႈလႅၵ်ႈလၢႆႈတၢင်းႁူႉ၊ တၢင်းယိူင်းဢၢၼ်း ၸဵမ်ၸိူဝ်းၼႆႉ ဝႃႈၼႆ။

ဝၼ်းတီႈ 06/02/2018 ယၢမ်းဝၢႆးဝၼ်း 3:30 မူင်း ထိုင် 5:30 မူင်းႁူဝ်ၶမ်ႈ ၶွင်ႊသီႊၾႅတ်ႊၻရႄႊၸၢဝ်းၶိူဝ်းၽွမ်ႉ ႁူမ်ႈ (UNFC) တင်း ၸုမ်းႁူမ်ႈသၢင်ႈၶၵ်ႉၵၢၼ်ငမ်းယဵၼ် (PPST ၽူႈၼမ်းၸုမ်းလူင်းလၢႆးမိုဝ်း NCA 8 ၸုမ်း) ႁူပ်ႉၵၼ် တီႈငဝ်ႈၸိုင်ႈလွႆတႆးလႅင်း လႅၼ်လိၼ် တႆး-ထႆး ဢုပ်ႇလၢတ်ႈၼႄၵၼ် လွင်ႈငဝ်းလၢႆးယၢမ်းလဵဝ် ၸုမ်းၽႂ် ၸုမ်းမၼ်းပဵၼ်ဝႆႉၸိူင်ႉႁိုဝ်၊ ယဝ်ႉၵေႃႈ မိူဝ်းၼႃႈမႃး သမ်ႉ တေၸၢင်ႈႁူမ်ႈ မိုဝ်းၵၢၼ် ငၢၼ်းၵႂႃႇၸွမ်းၵၼ်ၸိူင်ႉႁိုဝ် ၸဵမ်ၸိူဝ်းၼႆႉ ဝႃႈၼႆ။

ၸဝ်ႈသိုၵ်းလူင် ၸၢႆးငိုၼ်း ၽူႈၶၢၼ်ပၢၵ်ႇ RCSS/SSA လၢတ်ႈဝႃႈ “ ပိူင်လူင်မၼ်းတႄႉ ၶဝ်ၸဝ်ႈၵေႃႈ မႃးၶဝ်ႈႁူမ်ႈ ပၢင်ပွႆးဝၼ်းၸိူဝ်ႉၸၢတ်ႈၸိုင်ႈတႆး တီႈငဝ်ႈၸိုင်ႈလွႆတႆးလႅင်းႁဝ်း လႆႈဢဝ်တိုဝ်ႉတၢင်းၼႆႉသေ ႁူပ်ႉၵၼ်၊ ဢၼ်ႁဝ်း ၶႃႈႁူပ်ႉၵၼ်တႄႉ လၢတ်ႈၼႄ ငဝ်းလၢႆးဢၼ်ပဵၼ်ယူႇယၢမ်းလဵဝ်ၼႆႉ။ ၸုမ်းၽႂ်ၸုမ်းမၼ်း မၼ်းပဵၼ်ဝႆႉၸိူင်ႉႁိုဝ်။ တေလႆႈဝႃႈ ႁဝ်းၶႃႈမႃး Uplate တင်း Sharing ၼႄၵၼ်။ လိူဝ်ၼၼ်ႉ မိူဝ်းၼႃႈမႃးႁဝ်းတေ ၸၢင်ႈႁူမ်ႈၵၼ်ၵႂႃႇ လွင်ႈၵၢၼ်ငၢၼ်း။ ပွင်ႇဝႃႈ ၸုမ်းတေႃႇၸုမ်း မႃးလၢတ်ႈၼႄၵၼ် ငဝ်းလၢႆးယၢမ်းလဵဝ် ဢမ်ႇဝႃႈလွင်ႈၵၢၼ်မိူင်း၊ ၵၢၼ်သိုၵ်း” ဝႃႈၼႆ။

သိုပ်ႇလၢတ်ႈဝႃႈ ၵွပ်ႈပိူဝ်ႈ မၼ်းမီးလၢႆၾၢႆႇလၢႆတၢင်း ႁဝ်းၶႃႈ လႆႈမႃးၺႃးၵၼ် ႁဝ်းဝႃႈတင်ႈတႄႇ UNFC ၊ PPST ။ ယဝ်ႉၵေႃႈ ၼွၵ်ႈလႅၵ်ႈမၼ်း ပႃးတင်း KIO လႆႈမႃးၺႃးၵၼ် ပဵၼ်ဢၼ်လီတႄႉတႄႉ လႆႈမႃးလၢတ်ႈၼႄလွင်ႈ ငဝ်းလၢႆးၵၼ်။ တေႃႈလဵဝ် တင်းသဵင်ႈႁၼ်ထိုင်ဝႃႈ ဢမ်ႇဝႃႈၵၢၼ်မိူင်း၊ ၵၢၼ်သိုၵ်း၊ ၵၢၼ်ငမ်းယဵၼ်ၼႆႉ ႁဝ်းၵႂႃႇၸုမ်း ၽႂ်ၸုမ်းမၼ်းၼၼ်ႉ ဢမ်ႇလႆႈ မၼ်းတေလႆႈၶွၼ်ႈၵၼ်ၵႂႃႇ။ တေလႆႈဝႃႈငဝ်းလၢႆးလီ။ မိူဝ်းၼႃႈမႃးၵေႃႈ တေႁဵတ်းၸိူင်ႉၼႆ။ ၾၢႆႇၼိုင်ႈတၢင်းၼိုင်ႈၵေႃႈ UNFC တင်း PC တူဝ်တႅၼ်းလူင်ပွင်ၸိုင်ႈ ဢၼ်မႃးမီးတီႈၼႆႈၵေႃႈ ႁႂ်ႈၶဝ်လႆႈႁူပ်ႉၵၼ်ပႃးထႅင်ႈ” ဝႃႈၼႆ။

ၼွၵ်ႈလိူဝ်ၼၼ်ႉ ၸုမ်းၶၢင် KIO ၵေႃႈ ဢုပ်ႇလၢတ်ႈၼႄ လွင်ႈငဝ်းလၢႆး ဢၼ်ၶဝ်လႆႈၵႂႃႇႁူပ်ႉတူဝ်တႅၼ်း တပ်ႉသိုၵ်း လူင်ပွင်ၸိုင်ႈမၢၼ်ႈ တီႈၼႂ်းမိူင်းၶႄႇ ပူၼ်ႉမႃး ၶၢဝ်းတၢင်း 3-4 ဝၼ်းၼၼ်ႉ လႆႈႁူပ်ႉထူပ်းဢုပ်ႇဢူဝ်းၵၼ် ပဵၼ်ဝႆႉၸိူင်ႉႁိုဝ်။ လိူဝ်ၼၼ်ႉၵေႃႈ လၢတ်ႈၼႄ လွင်ႈသိုၵ်းတပ်ႉသိုၵ်းလူင်ပွင်ၸိုင်ႈမၢၼ်ႈ တင်း တပ်ႉသိုၵ်းၶၢင် ပဵၼ်ပၢင်တိုၵ်းၵၼ်ႁၢဝ်ႈႁႅင်း တၢင်းပွတ်းတွၼ်ႈ ၼႂ်းမိူင်းတႆးပွတ်းႁွင်ႇလႄႈ တၢင်းပွတ်းမိူင်းၶၢင် ၸိူဝ်းၼႆႉ ဝႃႈၼႆ။

ၸုမ်း UNFC ၼႆႉတေႃႈလဵဝ် တင်းမူတ်း မီးလုၵ်ႈၸုမ်းဝႆႉ 4 ၸုမ်း မိူၼ်ၼင်ႇ ၸုမ်းပႃႇတီႇမိူင်းမွၼ်းမႂ်ႇ၊ ၸုမ်းလႃးႁူႇ LDU၊ ၸုမ်းပႃႇတီႇမႂ်ႇသုင်ၸိူဝ်ႉၸၢတ်ႈယၢင်းလႅင် KNPP လႄႈ ၸုမ်းၶွင်ႇသီႇၸိူဝ်ႉၸၢတ်ႈရၶႅင်ႇ ANC ၸိူဝ်းၼႆႉ။ ၼႂ်းၼၼ်ႉသမ်ႉ ၸုမ်းပႃႇတီႇမိူင်းမွၼ်းမႂ်ႇတင်း ၸုမ်းလႃးႁူႇ LDU သမ်ႉ တေလူင်းလၢႆးမိုဝ်းၵိုတ်းတိုၵ်း ပတ်းပိုၼ်ႉ တူဝ်ႈမိူင်း NCA ၸွမ်းလူင်ပွင်ၸိုင်ႈမၢၼ်ႈ ၼႂ်းဝၼ်းတီႈ 13/02/2018 တေထိုင်မႃးၼႆႉ ဝႃႈၼႆ။

ၸုမ်း PPST သမ်ႉ ပဵၼ်ၸုမ်းၸၢဝ်းၶိူဝ်း EAOs ၸိူဝ်းလူင်းလၢႆးမိုဝ်း NCA ဝႆႉ 8 ၸုမ်း မီးၶွင်ႇသီႇဢဝ်ၶိုၼ်း ၸိုင်ႈတႆး/တပ်ႉသိုၵ်း ၸိုင်ႈတႆး (RCSS/SSA) ၊ ၸုမ်းပူတ်းပွႆႇၸိူဝ်ႉၸၢတ်ႈပဢူဝ်း (PNLO) ၊ တႅဝ်းႁူမ်ႈၸိူဝ်ႉၸၢတ်ႈ ၶျၢင်း (CNF) ၊ တႅဝ်းႁူမ်ႈၻီႊမူဝ်ႊ ၶရႅတ်ႊတိၵ်ႊ လုၵ်ႈႁဵၼ်းမိူင်းမၢၼ်ႈပတ်းပိုၼ်ႉ (ABSDF) ၊ ႁူမ်ႈတုမ်ၸိူဝ်ႉၸၢတ်ႈ ယၢင်းၽိူၵ်ႇ (KNU) ၊ တပ်ႉသိုၵ်း ယၢင်းသၢင်ႈၽွၼ်းပၢင်ႈၻီႊမူဝ်ႊၶရေႊၸီႊ (DKBA) ၊ တပ်ႉသိုၵ်းပူတ်းပွႆႇ ၸိူဝ်ႉၸၢတ်ႈယၢင်း-ၶွင်ႊသီႊငမ်းယဵၼ် (KNLA-PC) ၊ ပႃႊတီႊပူတ်းပွႆႇၸိူဝ်ႉၸၢတ်ႈရၶႅင်ႇ (ALP) ၸိူဝ်းၼႆႉ။