ၼၢင်းယိင်းၵေႃႉၼိုင်ႈ ထုၵ်ႇယိုဝ်းတၢႆၼႂ်းၵႃး တီႈၸႄႈဝဵင်းၼမ်ႉၸၢင်၊ ပဵၼ်ယွၼ်ႉလွင်ႈသင် ပလိၵ်ႈတိုၵ်ႉၵူတ်ႇထတ်းယူႇ။
ဝၼ်းတီႈ 23/7/2020 ယၢမ်းၵၢင်ၶိုၼ်း မွၵ်ႈ 11 မူင်းၼၼ်ႉ ၼၢင်းယိင်းၵေႃႉၼိုင်ႈ ထုၵ်ႇၵူၼ်းဢမ်ႇႁူႉၾၢႆႇ ယိုဝ်းတၢႆၼႂ်းၵႃး ၼႂ်းၸႄႈဝဵင်းၼမ်ႉၸၢင် ၸိုင်ႈတႆးပွတ်းၸၢၼ်း ၼႆယဝ်ႉ။
ၽူႈၵွၼ်းပလိၵ်ႈၸႄႈဝဵင်းၼမ်ႉၸၢင် ဢူးမိၼ်းဢွင်ႇ လၢတ်ႈတီႈၽူႈတွႆႇႁွၵ်ႈဝႃႈ “ၸႂ်ႈၶႃႈဢေႃႈ မိူဝ်ႈဝႃးယၢမ်းၵၢင်ၶိုၼ်း ၼၢင်းယိင်းၵေႃႉၼိုင်ႈ ထုၵ်ႇယိုဝ်းတၢႆ တီႈၼႂ်းၵႃး” ဝႃႈၼႆ။
ဢွင်ႈတီႈၼၢင်းယိင်း ဢၼ်လႆႈထုၵ်ႇယိုဝ်းတၢႆၼၼ်ႉ ယၢၼ်ၵႆဝဵင်းၼမ်ႉၸၢင် 6 လၵ်း၊ တၢင်းဢွၵ်ႇဝဵင်းၼမ်ႉၸၢင် တေၵႂႃႇတၢင်း ၶူဝ်လမ် ဝႃႈၼႆ။
ဢူးလိၼ်းဢွင်ႇသူၺ်ႇ ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈမၢႆ 1 ၸႄႈဝဵင်းၼမ်ႉၸၢင် လၢတ်ႈတီႈၽူႈတွႆႇႁွၵ်ႈဝႃႈ “လွင်ႈၵၢၼ်တၢႆၼၼ်ႉ ႁဵတ်းႁိုဝ်လႄႈတၢႆဢၼ်ဝႃႈၼၼ်ႉ ႁဝ်းၶႃႈၵေႃႈ ဢမ်ႇလႆႈႁူႉလွင်ႈတၢင်းမၼ်းလီလီ။ မၼ်းၼၢင်း တၢႆၼိူဝ်ၵႃး ပဵၼ်ၵႃးသီၶၢဝ်။ လွင်ႈၵၢၼ်တၢႆၼၼ်ႉတႄႉ လၢတ်ႈၵၼ်ၵေႃႉလၢႆးလၢႆး။ ထၢင်ႇတႄႉမၼ်းၼၢင်း တေၵပ်းၵၢႆႇလူၺ်ႈသေဢၼ်ဢၼ်ၶႃႈယူဝ်ႉ” ဝႃႈၼႆ။
ဢိင်ၼိူဝ်လွင်ႈၵၢၼ်တၢႆၼၢင်းယိင်းၼႆႉသေ ပဵၼ်ယွၼ်ႉသင်လႄႈတၢႆ ဢၼ်ဝႃႈၼၼ်ႉ ယူႇတီႈပလိၵ်ႈၸႄႈဝဵင်းၼမ်ႉၸၢင် တိုၵ်ႉၵူတ်ႇထတ်းလွင်ႈပိူင်ပဵၼ်မၼ်းယူႇ ၼႆယဝ်ႉ။
