ၵူၼ်းမိူင်းထႆး ဢၼ်ၶဝ်ႈမႃးယူႇဝႆႉတၢင်းၾင်ႇမိူင်းတႆး ပဵၼ်တၢင်းၵၢၼ်ၼၼ်ႉ ယူႇတီႈၽူႈမီးပုၼ်ႈၽွၼ်း တီႈတႃႈၶီႈလဵၵ်း လႆႈသူင်ႇပွၵ်ႈၶဝ်ႈမိူဝ်း တၢင်းၾင်ႇမႄႈသၢႆၶိုၼ်း 10 ၵေႃႉ။
မိူဝ်ႈၼႆႉ ဝၼ်းတီႈ 24/7/2020 ၵူၼ်းမိူင်းထႆး ဢၼ်ၶဝ်ႈမႃးယူႇဝႆႉတၢင်းမိူင်းတႆး ပဵၼ်တၢင်းၵၢၼ်ၼၼ်ႉ လႆႈသူင်ႇၶၢမ်ႈၶူဝ် မိုတ်ႈၵိုဝ်း မၢႆ 2 လႅၼ်လိၼ်တႆး – ထႆး (မႄႈသၢႆ – တႃႈၶီႈလဵၵ်း) တႃႇႁူဝ်ၵူၼ်း 10 ၵေႃႉ ပွၵ်ႈၶဝ်ႈမိူဝ်းတၢင်းၾင်ႇမႄႈသၢႆ ၸိုင်ႈထႆးၶိုၼ်း ၼႆယဝ်ႉ။
ၸၢႆးၼုမ်ႇတုၺ်ႈ ႁူဝ်ပဝ်ႈပႃႇတီႇႁူဝ်သိူဝ် ၸႄႈဝဵင်းတႃႈၶီႈလဵၵ်းလႄႈ ၸုမ်းၸွႆႈထႅမ်ႁႅင်းၵၢၼ်ယၢၼ်မိူင်း ၸွမ်းလႅၼ်လိၼ် တႆး – ထႆး လၢတ်ႈတီႈၽူႈတွႆႇႁွၵ်ႈဝႃႈ “မိူဝ်ႈၼႆႉ သူင်ႇပွၵ်ႈၵူၼ်းမိူင်းထႆး ၶဝ်ႈၵႂႃႇတၢင်းၾင်ႇမႄႈသၢႆထႅင်ႈ တင်းမူတ်း 10 ၵေႃႉ။ ၼိုင်ႈဝူင်ႈလႂ် သူင်ႇပွၵ်ႈမိူဝ်း 3 ဝၼ်း” ဝႃႈၼႆ။
ၵူၼ်းမိူင်းထႆး ဢၼ်သူင်ႇပွၵ်ႈမိူဝ်းတၢင်းၾင်ႇမိူင်းထႆးၶိုၼ်းၼၼ်ႉ ၵမ်ႈၼမ်ၶဝ်ႈမႃးပဵၼ်တၢင်းၵၢၼ် မႃးႁဵတ်းၵၢၼ်တၢင်း ၾင်ႇတႃႈၶီႈလဵၵ်းသေ ပွၵ်ႈၶဝ်ႈမိူဝ်းၶိုၼ်း။ ၵွၼ်ႇတေပွၵ်ႈမိူဝ်းၼၼ်ႉ တေလႆႈတၢင်ႇသၢႆမၢႆၸိုဝ်ႈဢွၼ်တၢင်းသေ သူင်ႇထိုင်တီႈၽူႈမီးပုၼ်းၽွၼ်းတၢင်းၾင်ႇမိူင်းထႆး၊ ယူႇတီႈၽူႈမီးပုၼ်ႈၽွၼ်းတၢင်းမိူင်းႁူမ်ႈတုမ် ႁၢင်ႈႁႅၼ်းသူင်ႇၸူးပၼ်တၢင်း ၽူႈမီးပုၼ်ႈၽွၼ်းတၢင်းၾင်ႇမိူင်းထႆး ဢၼ်မႃးပႂ်ႉႁပ်ႉဢဝ်တီႈၶူဝ်မိုတ်ႈၵိုဝ်းမၢႆ 2 ၼၼ်ႉ ၼႆယဝ်ႉ။
ၸၢႆးၼုမ်ႇတုၺ်ႈ သိုပ်ႇလၢတ်ႈဝႃႈ “ ၵူၼ်းမိူင်းထႆး ဢၼ်ပွၵ်ႈမိူဝ်းၼၼ်ႉ ၶဝ်တေလႆႈတၢင်ႇသဵၼ်ႈၸိုဝ်ႈၶဝ်ဝႆႉ ဢွၼ်တၢင်းၵွၼ်ႇ။ ယူႇတီႈၽူႈမီးပုၼ်ႈၽွၼ်းတၢင်းသွင်ၾင်ႇႁပ်ႉႁူႉယဝ်ႉ ၸင်ႇတေသူင်ႇပွၵ်ႈမိူဝ်းတၢင်းမိူင်းထႆးၶႃႈ။ ဢမ်ႇၸႂ်ႈဝႃႈ ႁဵတ်းၼၼ်ႁဵတ်းၼႆသေ ၶၢမ်ႈမိူဝ်းၵမ်းလဵဝ် ဢမ်ႇလႆႈ။ ၵူၼ်းထႆးဢၼ်ပွၵ်ႈမိူဝ်းၼၼ်ႉ တေလႆႈပဵၼ်ၵူၼ်းယိပ်းဝႂ်ထႆး ၵူၼ်းထႆးတႄႉတႄႉၼၼ်ႉၶႃႈယဝ်ႉ” ဝႃႈၼႆ။
ၵူၼ်းမိူင်းထႆး ဢၼ်လုၵ်ႉတၢင်းၾင်ႇတႃႈၶီႈလဵၵ်းသေ သူင်ႇပွၵ်ႈၶဝ်ႈတၢင်းၾင်ႇမိူင်းထႆးၼၼ်ႉ ၼိုင်ႈဝူင်ႈလႂ် တေသူင်ႇ 3 ဝၼ်း တေပဵၼ်ဝၼ်းၸၼ်၊ ဝၼ်းပုတ်ႉလႄႈ ဝၼ်းသုၵ်း ၼႆယဝ်ႉ။
ဢိင်ၼိူဝ်လွင်ႈတၢင်းပဵၼ်ၶူဝ်ႊဝိတ်ႉ 19 ၼႆႉသေ ယူႇတီႈလူင်ပွင်ၸိုင်ႈမိူင်းထႆး ၸီႉသင်ႇႁႂ်ႈပိၵ်ႉဢိုတ်းၽၵ်းတူၶဝ်ႈမိူင်း ၸွမ်းလႅၼ်လိၼ် ၵူႈတီႈ ဢၼ်တိတ်းၸပ်းတၢင်းမိူင်းထႆးၼၼ်ႉ တႄႇဢဝ်ဝၼ်းတီႈ 23/3/2020 မႃးထိုင် ဝၼ်းတီႈ 23/7/2020 ၼႆႉ ၶွပ်ႈတဵမ် 4 လိူၼ်ယဝ်ႉ။ ပႃးၸဵမ်ၽၵ်းတူ တီႈၶူဝ်မိုဝ်ႈၵိုတ်းမၢႆ 1 (တႃႈၶီႈလဵၵ်း – မႄႈသၢႆ) ။
မိူဝ်ႈဝၼ်းတီႈ 22/7/2020 ၼၼ်ႉၵေႃႈ ၵူၼ်းမိူင်းထႆး ဢၼ်လုၵ်ႉတၢင်းတႃႈၶီႈလဵၵ်း ပွၵ်ႈၶၢမ်ႈၶဝ်ႈမိူဝ်းတၢင်းၾင်ႇမိူင်းထႆး ၼၼ်ႉ တင်းမူတ်းမီး 11 ၵေႃႉ ၽူႈၸၢႆး 6 ၵေႃႉလႄႈ ၼၢင်းယိင်း 5 ၵေႃႉ-ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ