သင်ၶၸဝ်ႈ ၼႂ်းၸႄႈဝဵင်းၵဵင်းတုင် ၶဝ်ႈတွပ်ႇလိၵ်ႈ (ၾၢႆႇမိူင်း/ယူၼ်း) တီႈဝတ်ႉႁူဝ်ၶူင်ႇ ၸႄႈဝဵင်းၵဵင်းတုင် ပွၵ်ႈၵမ်း 62 ဝႃႈၼႆ။
ဝၼ်းတီႈ 04-10/02/2018 ယၢမ်းၵၢင်ၼႂ် 8 မူင်း ထိုင် 4 မူင်းဝၢႆးဝၼ်း ၸုမ်းသင်ၶၸဝ်ႈ ၾၢႆႇမိူင်း/ ယူၼ်း ၼႂ်းၸႄႈ ဝဵင်းၵဵင်းတုင် ၸတ်းႁဵတ်းပၢင်တွပ်ႇလိၵ်ႈ ပွၵ်ႈၵမ်း 62 ၊ တီႈတိူၵ်ႈသွၼ်လိၵ်ႈပရိယၢတ်ႈထမ်းသင်ၶရၸူႉပထမ် ဝတ်ႉရႃၸထၢၼ်လူင်ႁူဝ်ၶူင်ႇ ပွၵ်ႉ 3 ၸႄႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်း။ မီးသင်ၶၸဝ်ႈလႄႈ သတ်ႉထႃး/ ၵူၼ်းမိူင်း လုၵ်ႈႁဵၼ်းယိင်းၸၢႆးၶဝ်ႈႁူမ်ႈတွပ်ႇလိၵ်ႈ တင်းၼမ် ဝႃႈၼႆ။
ၽူႈၶဝ်ႈႁူမ်ႈၸွႆႈ ပၢင်တွပ်ႇလိၵ်ႈ တီႈတိူၵ်ႈသွၼ်လိၵ်ႈဝတ်ႉႁူဝ်ၶူင်ႇ ၵဵင်းတုင် လၢတ်ႈဝႃႈ “ ဝၼ်းတီႈ 4 ထိုင် 10 ပဵၼ် ဝၼ်းတွပ်ႇလိၵ်ႈ သင်ၶၸဝ်ႈ တင်း လုၵ်ႈႁဵၼ်းၸၼ်ႉၸွမ်(ၼၵ်ႉသိုၵ်းသႃ) ၸၢႆး/ယိင်း။ ဝၼ်းတီႈ 11 သမ်ႉ တေပဵၼ် ဝၼ်းတွၼ်ႈသူး/ ရၢင်းဝလ်းလႄႈ လူႇတၢၼ်းယၢတ်ႇၼမ်ႉ ၵၢၼ်တွပ်ႇလိၵ်ႈၼႆႉ ၸတ်းႁဵတ်းဝႆႉ ပဵၼ်သွင်တွၼ်ႈ တွၼ်ႈ ၶူၼ်ႉၶႆႈ တင်း တွၼ်ႈတႅမ်ႈတွပ်ႇ” ဝႃႈၼႆ။
ပၢင်တွပ်ႇလိၵ်ႈ သင်ၶၸဝ်ႈၾၢႆႇမိူင်း/ယူၼ်း ဢၼ်ၶဝ်ႈတွပ်ႇလိၵ်ႈသမ်ႉ ၸၼ်ႉဢွၼ်ႇ၊ ၸၼ်ႉၵၢင်၊ ၸၼ်ႉလူင်လႄႈ ၸၼ်ႉပႃႇလိ (1)၊ ၸၼ်ႉ(2) ၸဵမ်ၸိူဝ်းၼႆႉ။ လိူဝ်ၼၼ်ႉ လုၵ်ႈႁဵၼ်းၸၢႆး/ယိင်းသမ်ႉ ၸၼ်ႉသိၼ်၊ ၸၼ်ႉတွၼ်ႈ (ၸၼ်ႉဢွၼ်ႇ) ၸၼ်ႉၵၢင်လႄႈ ၸၼ်ႉပၢႆ ၸဵမ်ၸိူဝ်းၼႆႉ ဝႃႈၼႆ။
