ၵူၼ်းပၢႆႈၽေးသိုၵ်း တီႈသီႇပေႃႉ ပွၵ်ႈၶိုၼ်းႁိူၼ်းယေးၽႂ်မၼ်း ၽွင်ႈယဝ်ႉယွၼ်ႉငဝ်းလၢႆးၼႂ်းပိုၼ်ႉတီႈ ၼိမ်ယဵၼ်လူင်းယဝ်ႉ ဝႃႈၼႆ။

ဝၼ်းတီႈ 23/07/2020 ယၢမ်းဝၢႆးဝၼ်းမွၵ်ႈ 4 မူင်းၶိုင်ႈၼၼ်ႉသေ ၵူၼ်းဝၢၼ်ႈ ၸိူဝ်းဢွၼ်ၵၼ်ပၢႆႈၽေးသိုၵ်း ယွၼ်ႉတပ်ႉသိုၵ်းလူင်ပွင်ၸိုင်ႈမၢၼ်ႈ တင်း ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး (SSPP/SSA) ပဵၼ်ပၢင်တိုၵ်းၵၼ် တီႈၼႂ်းၵႄႈဝၢၼ်ႈၼႃးဢုင်တင်း ဝၢၼ်ႈပၢင်မူင်ႈ ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ မိူဝ်ႈဝၼ်းတီႈ 22/7/2020 သေ ၵႂႃႇသွၼ်ႈဝႆႉတီႈဝၢၼ်ႈၼမ်ႉပႅၼ်ႈ တင်း ဝၢၼ်ႈသွင်ၵႄးၼၼ်ႉ ဢွၼ်ၵၼ်ပွၵ်ႈၶိုၼ်းႁိူၼ်းၵၼ် ၵမ်ႈၽွင်ႈယဝ်ႉ-ၼႆယဝ်ႉ။

ၸၢႆးၼုမ်ႇ ၵူၼ်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ “မိူဝ်ႈဝႃးၼႆႉ ၵူၼ်းပၢႆႈၽေးသိုၵ်းတီႈ ဝၢၼ်ႈၼမ်ႉပႅၼ်ႈတႄႉ ၶိုၼ်းဢွၼ်ၵၼ်ပွၵ်ႈႁိူၼ်းယေးၵၼ်ၶႃႈယဝ်ႉ။ လႆႈငိၼ်းဝႃႈ မိူဝ်ႈၼႆႉ တီႈသွင်ၵႄးၵေႃႈ တေပွၵ်ႈမိူၼ်ၵၼ်ၶႃႈယဝ်ႉ။ ယွၼ်ႉငဝ်းလၢႆး ၼႂ်းပိုၼ်ႉတီႈၵေႃႈ ယဵၼ်လူင်းဝႆႉယဝ်ႉ။ ထႅင်ႈၾၢႆႇၼိုင်ႈၵေႃႈ ယၢမ်းလဵဝ်ၼႆႉ ပဵၼ်ၶၢဝ်းၽုၵ်ႈသွမ်ႈ ၵေႃႈၸႂ်ႈသေ ၵူၼ်းပၢႆႈၽေးႁဝ်းၶႃႈ ဢွၼ်ၵၼ်မႆႈၸႂ်ၵၼ်ၶႃႈဢေႃႈ” ဝႃႈၼႆ။

ဢိင်ၼိူဝ်သိုၵ်းလူင်ပွင်ၸိုင်ႈမၢၼ်ႈတင်း သိုၵ်းတႆး SSPP ပဵၼ်ပၢင်တိုၵ်းၵၼ်ၼႆႉသေ လွင်ႈလူႉသုမ်းမၢတ်ႇၸဵပ်း တၢင်းၾၢႆႇ SSPP တႄႉ ဢမ်ႇမီး ဝႃႈၼႆ။

ၽူႈမီးပုၼ်ႈၽွၼ်း SSPP ဢၼ်တူၵ်းၼႃႈတီႈတၢင်းပွတ်းသီႇပေႃႉၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ “လွင်ႈမၢတ်ႇၸဵပ်းလူႉ တၢႆသိုၵ်းမၢၼ်ႈတႄႉ ႁဝ်းၶႃႈပႆႇလႆႈႁူႉၸွမ်း။ တၢင်းၾၢႆႇ SSPP ႁဝ်းၶႃႈတႄႉ လွတ်ႈၽေးၵၼ်ၵူႈၵေႃႉၶႃႈ၊ ဢမ်ႇမီးလွင်ႈမၢတ်ႇ ၸဵပ်းလူႉတၢႆသင်ၶႃႈ။ ယၢမ်းလဵဝ်ၼႆႉ လွင်ႈၶဵင်ႈၶႅင်ၵၼ်ၵေႃႈဢမ်ႇမီးယဝ်ႉ၊ ႁဝ်းၶႃႈၵေႃႈ ငိူင်ႉဝႄႈသေ သိုၵ်းမၢၼ်ႈၶဝ်ၵေႃႈ ထွႆထွၼ်ၵႂႃႇယဝ်ႉၶႃႈ” ဝႃႈၼႆ။

သိုပ်ႇလၢတ်ႈဝႃႈ “ဢွင်ႈတီႈဢၼ်ၶဝ်မႃးသွၵ်ႈတဝ်ထိူၼ်ႇၼႆႉ မၼ်းပဵၼ်ၼႃႈတီႈ SSPP ႁဝ်းၶႃႈဢေႃႈ ၶဝ်တင်ႈၸႂ်သွၵ်ႈတဝ် ႁဝ်းၶႃႈဢေႃႈ။ ပဵၼ်သိုၵ်းမၢၼ်ႈတီႈၼမ်ႉလၼ်ႈ ဢဵၼ်ႁႅင်းတေမီးမွၵ်ႈ 60 ပၢႆ ၶဝ်ၽႄပဵၼ်သွင်ငႃးသေ တင်ႈၸႂ်သွၵ်ႈတဝ်ႁဝ်းၶႃႈ။ ယွၼ်ႉၼၼ်ၸင်ႇလႆႈပဵၼ်ပၢင်တိုၵ်းၵၼ်ၶႃႈယဝ်ႉ” ဝႃႈၼႆ။

ယၢမ်းလဵဝ် လွင်ႈၶဵင်ႈၶႅင်ၵၼ်တင်းသွင်ၾၢႆႇယဵၼ်လူင်းၵႂႃႇ ယွၼ်ႉတၢင်းၾၢႆႇသိုၵ်းမၢၼ်ႈၶိုၼ်းထွႆထွၼ်ၵႂႃႇ ဝႃႈၼႆ။

ၸၢႆးၼုမ်ႇ သိုပ်ႇလၢတ်ႈဝႃႈ “ဢွင်ႈတီႈၸိူဝ်းၼၼ်ႉ မၼ်းပဵၼ်ဢွင်ႈတီႈ SSPP ၶႃႈလူး တၢင်းၾၢႆႇ SSPP တႄႉ ပၵ်းယူႇဝႆႉ ၶိုၼ်းမိူၼ်ၵဝ်ႇၵူၺ်းၶႃႈဢေႃႈ။ ၾၢႆႇသိုၵ်းမၢၼ်ႈတႄႉၶဝ်ဢမ်ႇထႅမ်ႁႅင်းသိုၵ်း၊ ယွၼ်ႉၼၼ် ပၢင်တိုၵ်းၸင်ႇတေယဵၼ်လူင်း ၵႂႃႇၶႃႈယဝ်ႉ” ဝႃႈၼႆ။

ဝၢၼ်ႈၼႃးဢုင်လႄႈဝၢၼ်ႈပၢင်မူင်ႈၼႆႉ မီးၸဵင်ႇၸၢၼ်းဝၼ်းဢွၵ်ႇ သီႇပေႃႉမွၵ်ႈ 15 လၵ်း။ လုၵ်ႉတီႈဝၢၼ်ႈသေ ၵႂႃႇတီႈၵျွင်းမုၼ်ၸဝ်ႈသွင်ၵႄး ယၢၼ်ၵႆမွၵ်ႈ 2 လၵ်းၵူၺ်းသေတႃႉ ယွၼ်ႉၾူၼ်တူၵ်း တၢင်းမိုၼ်ႈတၢင်းဢုင်လႄႈ ၽွင်းပၢႆႈၽေးသိုၵ်းၼၼ်ႉ ၵူၼ်းဝၢၼ်ႈ ႁူပ်ႉတၢင်းယၢပ်ႇၽိုတ်ႇဝႆႉ ၼႆယဝ်ႉ။

ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး (SSPP/SSA) ၼႆႉ ပဵၼ်ၸုမ်းဢၼ်လူင်းလၢႆးမိုဝ်းၵိုတ်းတိုၵ်း ၸၼ်ႉမိူင်းႁူမ်ႈတုမ်ဝႆႉ၊ ပႆႇလႆႈလူင်းလၢႆးမိုဝ်း ၵိုတ်းတိုၵ်းတူဝ်ႈမိူင်း NCA ။

တပ်ႉသိုၵ်းလူင်ပွင်ၸိုင်ႈမၢၼ်ႈၼႆႉ ပိုၼ်ၽၢဝ်ႇၵိုတ်းတိုၵ်းၾၢႆႇလဵဝ်ဝႆႉ တေႃႇထိုင်လိူၼ်ဢေႃႊၵတ်ႉသ်သဵင်ႈသေတႃႉ ႁႅၼ်းသိုၵ်းႁွၼ်ႈထဝ်ႇ သွၵ်ႈတဝ် ၼႂ်းၸႄႈဝဵင်းသီႇပေႃႉ ၵျွၵ်ႉမႄးလႄႈ တင်း ၶွင်ႇသီႇဢဝ်ၶိုၼ်းၸိုင်ႈတႆး RCSS/SSA ဢၼ်လူင်းလၢႆမိုဝ်း NCA ဝႆႉၼၼ်ႉၵေႃႈ ၶဵင်ႈၶႅင်တေႃႇၵၼ် တေႃႇထိုင်ဝၼ်းမိူဝ်ႈၼႆႉ။