ၽၵ်းတူ ၶူဝ်လႅၼ်လိၼ်တႆး – ထႆး (တႃႈၶီႈလဵၵ်း – မႄႈသၢႆ) လႆႈပိၵ်ႉဢိုတ်းမႃး ၶၢဝ်းတၢင်းၶွပ်ႈတဵမ် 4 လိူၼ်၊ တုမ်ႉတိူဝ်ႉ ၵူၼ်းပိုၼ်ႉတီႈႁၢဝ်ႈႁႅင်း။

မိူဝ်ႈၼႆႉ ဝၼ်းတီႈ 23/7/2020 ၶူဝ်လႅၼ်လိၼ်တႆး – ထႆး (တႃႈၶီႈလဵၵ်း – မႄႈသၢႆ) လႆႈပိၵ်ႉဢိုတ်းမႃး ၶွပ်ႈတဵမ် 4 လိူၼ်ယဝ်ႉ။ ယူႇတီႈတၢင်းလူင်ပွင်ၸိုင်ႈမိူင်းထႆး ၸီႉသင်ႇပိၵ်ႉဢိုတ်းဝႆႉ ၸူဝ်ႈၶၢဝ်း ၽွင်းၶၢဝ်းတၢင်းပဵၼ်ၸိူဝ်ႉမႅင်း ၶူဝ်ႊဝိတ်ႉ 19 ၼႆႉ ၼင်ႇႁိုဝ် တေၵုမ်းၵမ်လႆႈၸိူဝ်ႉမႅင်းတၢင်းပဵၼ်လႄႈ ၼင်ႇႁိုဝ်တၢင်းပဵၼ် ပေႃးတေဢမ်ႇ လၢမ်းၽႄႈႁၢဝ်ႈႁႅင်းၼၼ်ႉ ၼႆယဝ်ႉ။

ၸၢႆးၼုမ်ႇတုၺ်ႈ ၽူႈၸွႆႈထႅမ်ႁႅင်းၵၢၼ်ယၢၼ်မိူင်း ၸွမ်းလႅၼ်လိၼ်တႆး – ထႆး လၢတ်ႈတီႈၽူႈတွႆႇႁွၵ်ႈဝႃႈ “ဢိင်ၼိူဝ်လွင်ႈပိၵ်ႉၶူဝ်ၼႆႉသေ တုမ်ႉတိူဝ်ႉၵူၼ်းမိူင်း ၸိူဝ်းယူႇၸွမ်းလႅၼ်လိၼ် တၢင်းၾင်ႇတႃႈၶီႈလဵၵ်းၼႆႉ တႄႇဢဝ်လုၵ်ႈဢွၼ်ႇထိုင်ၵူၼ်းထဝ်ႈ ပေႃႈလဵင်ႉလူင်ၶဝ်ၸိူဝ်းၼႆႉၶႃႈယဝ်ႉ။ လုၵ်ႈဢွၼ်ႇၵေႃႈ ဢမ်ႇလႆႈၵႂႃႇႁဵၼ်း လိၵ်ႈတၢင်း ၾင်ႇပုၼ်ႉ။ လွင်ႈၵူၼ်းႁႃၵိၼ်ႁႃယႅမ်ႉၸိူဝ်းၼႆႉ ၸဵမ်ၵူၼ်းၵႃႉၵူၼ်းၶၢႆ သထေးၸိူဝ်းၼႆႉ တုမ်ႉတိူဝ်ႉမူတ်းၶႃႈယဝ်ႉ ၵၢၼ်ပၢႆးမၢၵ်ႈမီးၼႆႉ” ဝႃႈၼႆ။

လူင်ပွင်ၸိုင်ႈမိူင်းထႆး ၸီႉသင်ႇပိၵ်ႉၽၵ်းတူ/ ၶူဝ် တၢင်းၶဝ်ႈဢွၵ်ႇၸွမ်းလႅၼ်လိၼ်တႆး – ထႆးၼႆႉ ဢမ်ႇၸႂ်ႈဝႃႈ ပဵၼ်တီႈ ၶူဝ်တႃႈၶီႈလဵၵ်းၼႆႉ ဢၼ်လဵဝ်ၵူၺ်း၊ သဵၼ်ႈတၢင်းလူင်ဢေးသျိူဝ်း မႄႈသွတ်ႈ – မျဝတီႇ၊ သင်ၶရပူရီ – ၵွင်းမူးသၢမ်သူႇ( ၽယႃးတူင်းသူႇ) ၸိူဝ်းၼႆႉၵေႃႈ ပိၵ်ႉဢိုတ်းမူတ်း။ မိူၼ်ၼင်ႇၽၵ်းတူ ဢၼ်ဢမ်ႇပိုတ်ႇပဵၼ်တၢင်းၵၢၼ် လၢၼ်ႇသဵၼ်ႈတၢင်းၵိဝ်ႇၽႃဝွၵ်ႈ BP1 ၊ လၢၼ်ႇပႃၶီး၊ လၢၼ်ႇၼမ်ႉယွၼ်း၊ လၢၼ်ႇလၵ်းတႅင်ႇလႄႈ လၢၼ်ႇၼႃးမူၼ်း – မႄႈႁွင်ႈသွၼ် ၸိူဝ်းၼႆႉ ၵေႃႈ ဢမ်ႇပၼ်ၵူၼ်းပိုၼ်ႉ တီႈၵႂႃႇမႃး။

ၸၢႆးသၢမ် ၵူၼ်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ “ပႂ်ႉမွင်းဝႃႈ မွင်းယဝ်ႉ လွင်ႈပိုတ်ႇၶူဝ်တႃႈၶီႈလဵၵ်းၼႆႉ၊ ၵူၺ်းၵႃႈ တၢင်းမုင်ႈမွင်းၼႆႉ ဢဝ်ပူၼ်ႉၵႂႃႇပႅတ်ႈသေ ယၢမ်းလဵဝ် မိူၼ်ဝႃႈ တၢင်းမုင်ႈမွင်းၼၼ်ႉ မၼ်းဢမ်ႇၶႂ်ႈမီး ၼႂ်းဢူၵ်းၼႂ်းၸႂ်ႁဝ်းၶႃႈယဝ်ႉ။ မၼ်းတုမ်ႉတိူဝ်ႉမူတ်းၶႃႈလူး၊ ၶူဝ်းၶွင် ဢဝ်ၶဝ်ႈဢွၵ်ႇ လႆႈသႂ်ႇၶွၼ်ႇမူတ်းၶႃႈၼႃႇ။ မိူၼ်ၵွင်ႇၶူဝ်း လဵၵ်ႉလဵၵ်ႉၵူၺ်း လႆႈပၼ်ၶွၼ်ႇ 50 – 100 ဝၢတ်ႇ။ မိူၼ်ၶွင်ၵိၼ် ၶူဝ်းၵုၼ်ႇၸိူဝ်းၼႆႉ ၶိုၼ်ႈၵူႈလွင်ႈၶႃႈယဝ်ႉ။ ယွၼ်ႉလႆႈ သႂၢင်းၶွၼ်ႇၼမ်ၵၼ်ၼၼ်ႉၶႃႈယဝ်ႉ။ ၸူးၸႂ်တႄႉ ၶႂ်ႈႁႂ်ႈပိူၼ်ႈပိုတ်ႇဝႆးဝႆးၼႆႉၶႃႈယဝ်ႉ” ဝႃႈၼႆ။

ၶူဝ်းၵုၼ်ႇသိၼ်ၵႃႉ လႄႈ ၵူၼ်းဢၼ်သွင်ၸိုင်ႈမိူင်း မွပ်ႈ/ႁပ်ႉ ပၼ်ၵႂႃႇမႃး တီႈ ၶူဝ်မၢႆ 2 ၊ ၶူဝ်မၢႆ 1 ဢၼ်ပိုတ်ႇပၼ်ၵူၼ်းၵႂႃႇမႃး ၵူႈပွၵ်ႈၼၼ်ႉတေႉ တိုၼ်းဢမ်ႇပၼ်ၽႂ်ၵႂႃႇမႃးလႃးလႃး။

ၶူဝ်တႃႈၶီႈလဵၵ်း – မႄႈသၢႆ ဢၼ်လႆႈပိၵ်ႉဢိုတ်းၵႂႃႇၼၼ်ႉ တွၼ်ႈတႃႇတေႁႄႉၵင်ႈတၢင်းပဵၼ်ၶူဝ်ႊဝိတ်ႉ 19 ၼင်ႇႁိုဝ် ပေႃးတေဢမ်ႇလၢမ်းၽႄႈတိတ်းၸပ်းၵၼ်ႁၢဝ်ႈႁႅင်းၼႆသေ ႁၢမ်ႈၵူၼ်းၶဝ်ႈဢွၵ်ႇၵႂႃႇမႃးၵူၺ်း။ လွင်ႈၶွင်ၵိၼ် ၶွင်ၸႂ်ႉ ၶူဝ်းၵုၼ်ႇတႄႉ တေႃႉၶဝ်ႈဢွၵ်ႇၵႂႃႇမႃးလႆႈ မိူၼ်ၵဝ်ႇ၊ ၵူၺ်းၵႃႈ တေလႆႈဢဝ်ၶၢမ်ႈဢွၵ်ႇၵႂႃႇမႃးတီႈၶူဝ်မိုတ်ႈၵိုဝ်းမၢႆ 2 ဝႃႈၼႆ။

ၼွၵ်ႈလိူဝ်ၼၼ်ႉ တၢင်းလႅၼ်လိၼ်တႆး – ၶႄႇ ၼႂ်းၸိုင်ႈတႆးပွတ်းႁွင်ႇၵေႃႈ တေႃႈၼင်ႇၼၼ် ယူႇတီႈလူင်ပွင်ၸိုင်ႈမိူင်းၶႄႇ ၸီႉသင်ႇပိၵ်ႉဢိုတ်းၽၵ်းတူ လႅၼ်လိၼ် ႁၢမ်ႈၵူၼ်းၶဝ်ႈဢွၵ်ႇၵႂႃႇမႃးသေ တုမ်းတိူဝ်ႉၵူၼ်းမိူင်းယူႇၸွမ်းလႅၼ်လိၼ် ႁၢဝ်ႈႁႅင်း မိူၼ်ၵၼ်။ ယူႇတီႈလူင်ပွင်ၸိုင်ႈမိူင်းၶႄႇ ၸီႉသင်ႇပိၵ်ႉၽၵ်းတူလႅၼ်လိၼ်မႃးၼႆႉ တင်ႈတႄႇ မိူဝ်ႈဝၼ်းတီႈ 1/4/2020 မႃး၊ ပေႃးထိုင်ဝၼ်းတီႈ 1/8/2020 ၸိုင် ၶွပ်ႈတဵမ် 4 လိူၼ်ယဝ်ႉၼင်ႇၵဝ်ႇ။