သိုၵ်းလူင်ပွင်ၸိုင်ႈမၢၼ်ႈ ၶိုၼ်ႈယိုဝ်း SSPP/SSA လႄႈ ၵူၼ်းဝၢၼ်ႈပၢႆႈၽေးသိုၵ်း သွၼ်ႈဝႆႉတီႈ ဝတ်ႉသွင်ၵႄး ၸႄႈဝဵင်းသီႇပေႃႉၼၼ်ႉ ၵူၼ်းပႃးတွင်ႉၵေႃႉၼိုင်ႈ တွင်ႉၵႄႇ ၸဵပ်းၵႅၼ်းလႄႈ လႆႈႁၢမ်သူင်ႇႁွင်ႈယႃသေ ၵိူတ်ႇလဵင်ႉ ႁၼ်ၼႃႈလုၵ်ႈ။
ဢွၼ်ၼႃႈၼႆႉ မိူဝ်ႈဝၼ်းတီႈ 22/7/2020 ယၢမ်းဝၢႆးဝၼ်း 4 မူင်းၶိုင်ႈၼၼ်ႉ သိုၵ်းလူင်ပွင်ၸိုင်ႈမၢၼ်ႈ ႁႅၼ်းသိုၵ်း ႁွၼ်ႈထဝ်ႇ လူမ်ႇယိုဝ်း တပ်ႉသိုၵ်းၸိုင်ႈတႆး SSPP/SSA ၼႂ်းၵႄႈဝၢၼ်ႈၼႃးဢုင်တင်း ဝၢၼ်ႈပၢင်မူင်ႈ လႄႈ ၵူၼ်းဝၢၼ်ႈလႆႈဢွၼ် ၵၼ်ပၢႆႈၽေးသိုၵ်း ဢွၵ်ႇမႃးသွၼ်ႈဝႆႉတီႈဝတ်ႉသွင်ၵႄး ႁူဝ်ၵူၼ်းတင်းမူတ်း 262 ၵေႃႉ ။ ၶမ်ႈၼၼ်ႉ ယၢမ်းၵၢင်ၶိုၼ်း ၵူၼ်းပႃးတွင်ႉၵေႃႉ ႞ တွင်ႉၵႄႇ ၸဵပ်းႁႅင်းၼႃႈလႄႈ လႆႈပႃးၵၼ်ဢဝ်ၵႂႃႇသူင်ႇ လဵင်ႉလုၵ်ႈ တီႈႁွင်ႈယႃသွင်ၵႄး – ဝႃႈၼႆ။
လုင်းၸၢႆးၶမ်းဢွင်ႇ ၽူႈတႅၼ်းသၽႃးၶဵတ်ႇလိူၵ်ႈတင်ႈမၢႆ 2 ၸႄႈဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ ၼၢင်းယိင်းၵေႃႉၼိုင်ႈ မႃးၵိူတ်ႇလုၵ်ႈဢွၼ်ႇ တီႈႁွင်ႈယႃသွင်ၵႄး၊ ပဵၼ်လုၵ်ႈၸၢႆးဢွၼ်ႇ မႄႈတင်းလုၵ်ႈဢွၼ်ႇ လွတ်ႈၽေးလီတၢင်းသွင်ၵေႃႉ ပဵၼ်ၵူၼ်းဝၢၼ်ႈၼႃးဢုင်ၶႃႈဢေႃႈ။ ယၢမ်းလဵဝ်တႄႉ မီးဝႆႉတီႈႁွင်ႈယႃ(ဆေးခန်း) သွင်ၵႄးဝႆႉ” ဝႃႈၼႆ။
ၵူၼ်းပၢႆႈၽေးသိုၵ်း 262 ၵေႃႉ ၸိူဝ်းမႃးသွၼ်ႈတီႈဝတ်ႉသွင်ၵႄးၼႆႉ ၵမ်ႈၼမ် ပဵၼ်ၵူၼ်းဝၢၼ်ႈၼႃးဢုင်၊ ၵူၼ်းဝၢၼ်ႈ ပၢင်မူင်ႈတႄႉ ဢမ်ႇပၢႆႈမႃး – ၼႆယဝ်ႉ။
လုင်းၸၢႆးၶမ်းဢွင်ႇ သိုပ်ႇလၢတ်ႈဝႃႈ “ ယၢမ်းလဵဝ် လႆႈငိၼ်းဝႃႈၶႂ်ႈယဵၼ်ဝႆႉ၊ ပေႃးဢမ်ႇမီးလွင်ႈၶဵင်ႈၶႅင်ၵၼ်ယဝ်ႉၵေႃႈ ၵူၼ်းပၢႆႈၽေးႁဝ်းၶႃႈတႄႉ ၶႂ်ႈဢွၼ်ၵၼ်ပွၵ်ႈမိူဝ်းၶိုၼ်းႁိူၼ်းယေးၽႂ်မၼ်းၶႃႈယဝ်ႉ။ ယွၼ်ႉဝႃႈ ပဵၼ်ၶၢဝ်းၽုၵ်ႇသွမ်ႈလႄႈ မၢင်ၵေႃႉ ပေႃးထူၺ်ႈၵႃႈဝႆႉ လူဝ်ႇသွမ်ႈၵူၺ်း ၸိူဝ်းၼႆႉၵေႃႈမီး၊ ယွၼ်ႉပဵၼ်ၶၢဝ်းႁဵတ်းၵၢၼ်လႄႈ ၵူၼ်းပၢႆႈၽေးတႄႉ မႆႈၸႂ်လွင်ႈၵၢၼ်သူၼ်ႁႆႈၼႃးၵၼ် ၶႃႈယဝ်ႉ” ဝႃႈၼႆ။
ဝၢၼ်ႈၼႃးဢုင်လႄႈဝၢၼ်ႈပၢင်မူင်ႈၼႆႉ မီးၸဵင်ႇၸၢၼ်းဝၼ်းဢွၵ်ႇ သီႇပေႃႉမွၵ်ႈ 15 လၵ်း။ လုၵ်ႉတီႈဝၢၼ်ႈသေ ၵႂႃႇတီႈၵျွင်းမုၼ်ၸဝ်ႈသွင်ၵႄး ယၢၼ်ၵႆမွၵ်ႈ 2 လၵ်းၵူၺ်းသေတႃႉ ယွၼ်ႉၾူၼ်တူၵ်း တၢင်းမိုၼ်ႈတၢင်းဢုင်လႄႈ ၵူၼ်းဝၢၼ်ႈ ႁူပ်ႉတၢင်းယၢပ်ႇၽိုတ်ႇဝႆႉ ၼႆယဝ်ႉ။
ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး (SSPP/SSA) ၼႆႉ ပဵၼ်ၸုမ်းဢၼ်လူင်းလၢႆးမိုဝ်းၵိုတ်းတိုၵ်း ၸၼ်ႉမိူင်းႁူမ်ႈတုမ်ဝႆႉ၊ ပႆႇလႆႈလူင်းလၢႆးမိုဝ်း ၵိုတ်းတိုၵ်းတူဝ်ႈမိူင်း NCA ။
တပ်ႉသိုၵ်းလူင်ပွင်ၸိုင်ႈမၢၼ်ႈၼႆႉ ပိုၼ်ၽၢဝ်ႇၵိုတ်းတိုၵ်းၾၢႆႇလဵဝ်ဝႆႉ တေႃႇထိုင်လိူၼ်ဢေႃႊၵတ်ႉသ်သဵင်ႈသေ တႃႉ ႁႅၼ်းသိုၵ်းႁွၼ်ႈထဝ်ႈ သွၵ်ႈတဝ်ႈ ၼႂ်းၸႄႈဝဵင်းသီႇပေႃႉ ၵျွၵ်ႉမႄးလႄႈ တင်း ၶွင်ႇသီႇဢဝ်ၶိုၼ်းၸိုင်ႈတႆး RCSS/SSA ဢၼ်လူင်းလၢႆမိုဝ်း NCA ဝႆႉၼၼ်ႉၵေႃႈ ၶဵင်ႈၶႅင်တေႃႇၵၼ် တေႃႇထိုင်ဝၼ်းမိူဝ်ႈၼႆႉ။
