ၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး SHRF ဢွၵ်ႇလိၵ်ႈပိုၼ်ၽၢဝ်ႇ လွင်ႈသိုၵ်းလူင်ပွင်ၸိုင်ႈမၢၼ်ႈ ယိုတ်းဢဝ်တီႈလိၼ် ၵူၼ်းဝၢၼ်ႈယဝ်ႉ ၸႅင်ႈၵႂၢမ်း ၸွႆးတြႃးၶိုၼ်း၊ ႁႄႉႁၢမ်ႈ RCSS/SSA လူင်းပိုၼ်ႉတီႈ ၸွႆႈထႅမ်ႁႄႉၵၢင်ႈတၢင်းပဵၼ်ၶူဝ်ႊဝိတ်ႉ 19 ၸိူဝ်းၼႆႉ ပဵၼ်ၵၢၼ်ၵိတ်ႇၶႂၢင် ပူၼ်ႉပႅၼ်တေႃႇ ၶၵ်ႉၵၢၼ်လွင်ႈငမ်းယဵၼ် ဢမ်ႇဝႆႉၼၵ်းၼိူဝ်လွင်ႈငမ်းယဵၼ် – ဝႃႈၼႆ။

ဝၼ်းတီႈ 22/7/2020 ယူႇတီႈ ၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး (SHRF) ဢွၵ်ႇၽိုၼ်တၢမ်းငဝ်းလၢႆး လွင်ႈသိုၵ်း လူင်ပွင် ၸိုင်ႈမၢၼ်ႈ ဢဝ်လိူင်ႈဢမ်ႇပဵၼ်ထမ်းတြႃး ၸဝ်ႈႁႆႈၼႃး 47 ၵေႃႉ၊ ဝႃႈပူၼ်ႉပႅၼ်လိၼ်တပ်ႉၶဝ် ဢၼ်မီးႁိမ်းတိူင်းသိုၵ်း ဝၼ်းဢွၵ်ႇၵၢင် ၼႂ်းၵိင်ႇၸႄႈဝဵင်းၶူဝ်လမ် ၸႄႈဝဵင်းၼမ်ႉၸၢင် ၸိုင်ႈတႆးပွတ်းၸၢၼ်းၼၼ်ႉ ၼႆယဝ်ႉ။

ၸၢႆးႁေႃသႅင် ၽူႈၶၢၼ်ပၢၵ်ႇ ၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး (SHRF) လၢတ်ႈတီႈၽူႈတွႆႇႁွၵ်ႈဝႃႈ “လွင်ႈသိုၵ်းမၢၼ်ႈ ႁုပ်ႈယိုတ်းတီႈလိၼ်ၼႆႉ မၼ်းၼႄဝႃႈၶဝ်ဢမ်ႇဝႆႉၵူၼ်းမိူင်းပဵၼ်လွင်ႈယႂ်ႇ၊ ဢမ်ႇသႂ်ႇၸႂ်ၵၢၼ်လူလွမ်တူၺ်းထိုင်ပၼ် ၵၢၼ်ႁႃလဵင်ႉတွင်ႉပေႃႈမႄႈၵူၼ်းမိူင်းၸိူဝ်းပဵၼ်ၸဝ်ႈႁႆႈၸဝ်ႈၼႃး၊ ယိပ်းၵွင်ႈၵၢင်ႇသေ ၶိုၼ်းပေႉၵိၼ်ၵူၼ်းမိူင်းၼႆႉ ဢမ်ႇထုၵ်ႇလီပဵၼ်သေဢိတ်း။ ႁဝ်းၶႃႈၶႂ်ႈႁႂ်ႈ ၶဝ်ပူတ်းထွၼ်ပၼ်ၶိုၼ်း လွင်ႈၶဝ်ဢဝ်လိူင်ႈ(ၸွႆးတြႃး) တေႃႇၸဝ်ႈႁႆႈၸဝ်ႈၼႃး ၸိူဝ်းၼၼ်ႉ ႁႂ်ႈဢဝ်တီႈလိၼ်ၸိူဝ်းၼၼ်ႉ ပၼ်ၶိုၼ်းၵူၼ်းမိူင်း ႁႂ်ႈၵူၼ်းမိူင်းလႆႈၽုၵ်ႇသွမ်ႈ ႁဵတ်းၵၢၼ်လဵင်ႉတွင်ႉၵႂႃႇ” – ဝႃႈၼႆ။

တီႈလိၼ်ၸိူဝ်းၼႆႉ တိတ်းၸပ်းလႅၼ်တပ်ႉသိုၵ်းမၢၼ်ႈ ၶလယ 66 ၊ တွၼ်ႈတၢင်းဢွၵ်ႇဝဵင်းၶူဝ်လမ်။ သိုၵ်းမၢၼ်ႈ ယိုတ်းဢဝ်ဝႆႉ ၼပ်ႉႁူဝ်သိပ်းပီမႃးသေတႃႉ ဢမ်ႇၽုၵ်ႇသင်၊ ၵူၼ်းဝၢၼ်ႈသမ်ႉၶဝ်ႈၽုၵ်ႇၶိုၼ်းလႄႈ ၺႃးသိုၵ်းမၢၼ်ႈ ၸႅင်ႈၵႂၢမ်းဢဝ်လိူင်ႈ၊ ၼႄးဝႃႈ ၵူၼ်းဝၢၼ်ႈပဵၼ်ၾၢႆႇပူၼ်ႉပႅၼ်ၼႆသေ ဢဝ်မၢႆမီႈ ၶေႃႈ 447 သေ ၸႅင်ႈၵႂၢမ်းတြႃး တေႃႇၵၼ်ဝႆႉ။

ၸဝ်ႈႁႆႈၼႃး 47 ၵေႃႉ လႆႈထုၵ်ႇႁွင်ႉၵႂႃႇၶိုၼ်ႈလုမ်းတြႃးတီႈၼမ်ႉၸၢင် မိူဝ်ႈဝၼ်းတီႈ 9/6/2020 ပိူဝ်ႈႁပ်ႉႁူႉ လွင်ႈဝႃႈၺႃးဢဝ်လိူင်ႈ (ၸွႆးတြႃး) ၼႆသေ ၶိုၼ်းႁႂ်ႈႁၢႆးငၢၼ်းတူဝ်တီႈလုမ်းတြႃးထႅင်ႈ မိူဝ်ႈဝၼ်းတီႈ18 ၊ 24 ၊ 29 လိူၼ်ၵျုၼ်ႊလႄႈ ဝၼ်းတီႈ 10 ၼႂ်းလိူၼ်ၵျူႊလၢႆႊၼႆႉထႅင်ႈ ၼႆယဝ်ႉ။

“ႁဝ်းၶႃႈ ၶိုၼ်ႈလမ်းတြႃးၼႆႉ မီး 5 ပွၵ်ႈယဝ်ႉၶႃႈ ၊ တင်း 5 ပွၵ်ႈၼႆႉ ၾၢႆႇၸႅင်ႈၵႂၢမ်းဢမ်ႇမႃးသေၵမ်း၊ မိူဝ်ႈၵမ်းပူၼ်ႉၼၼ်ႉ ၾၢႆႇၵူၼ်းဝၢၼ်ႈႁဝ်းၶႃႈ ဢမ်ႇမႃးၵေႃႉၼိုင်ႈ ၶဝ်ႈဝႃႈတေႁႃလိူင်ႈၶိုၼ်း။ ဢၼ်လႆႈၶိုၼ်ႈလုမ်းတြႃး ၼႆႉ မိူဝ်ႈဝၼ်းတီႈ 10 ၵျူႊလၢႆ ။ ႁဝ်းၶႃႈတေႉ တိုၼ်းဢမ်ႇၽွမ်ႉ၊ တိုၼ်းတေယွၼ်းၶိုၼ်းတီႈလိၼ်ႁဝ်းႁႂ်ႈလႆႈဢေႃႈ” – လုင်းလႃႉထုၼ်း ၸဝ်ႈသူၼ် ဢၼ်ၺႃးယိုတ်းတီႈလိၼ်လၢတ်ႈ။

ၸဝ်ႈႁႆႈၼႃးၸိူဝ်းၼၼ်ႉ ပဵၼ်ၵူၼ်းၼႂ်းပွၵ်ႉ 1 ၊ 2 ၊ 3 လႄႈ ပွၵ်ႉ 6 ဝဵင်းၶူဝ်လမ်။ ၸဝ်ႈႁႆႈၼႃးၶဝ် ပိုင်ႈဢိင်တီႈလိၼ် 400 ဢေႊၵႃႊပၢႆ ဢၼ်မီးတၢင်းဢွၵ်ႇဝဵင်းၼၼ်ႉသေ ၽုၵ်ႇသွမ်ႈ ၶဝ်ႈၵၢပ်ႇ၊ ၶဝ်ႈ၊ ငႃးလႄႈထူဝ်ႇလိၼ် ၸိူဝ်းၼႆႉ။ ပေႃးၶၢႆ ၶူဝ်းႁႆႈၶူဝ်းသူၼ် ႞ပီ မီးငိုၼ်းၶဝ်ႈ ဢမ်ႇယွမ်း 2 လၢၼ်ႉၵျၢပ်ႈ။ လိၼ်သူၼ်ၸဝ်ႈႁႆႈၼႃးၸိူဝ်းၼႆႉ ထုၵ်ႇသိုၵ်းမၢၼ်ႈ ၶလယ 66 ဢဝ်ပၢႆႉပူၵ်းပၵ်း ၵိတ်ႇၶႂၢင် လွၵ်ႇငိုတ်ႈ ႁႂ်ႈၵိုတ်းၵၢၼ်ၽုၵ်ႇသွမ်ႈ ၸဵမ်မိူဝ်ႈလိူၼ်ဢေႃႊၵတ်ႊသ် 2019 ပူၼ်ႉမႃး တေႃႇထိုင်တေႃႈလႆႈ ဢမ်ႇၸၢင်ႈၶဝ်ႈၽုၵ်ႇသွမ်ႈၶိုၼ်း။

လွင်ႈသိုၵ်းမၢၼ်ႈႁုပ်ႈယိုတ်း/ သိမ်း တီႈလိၼ် ႁိမ်းၶူဝ်လမ်ၼႆႉ ၸဵမ်မိူဝ်ႈ ပီ 1996-1998 ၽွင်းသိုၵ်းမၢၼ်ႈ ပိုတ်ႇၼႃႈသိုၵ်း ၽဵဝ်ႈမူၺ်ႉ/ ၵႂၢတ်ႇ လၢင်ႉပိုၼ်ႉတီႈ ၼႂ်းၸိုင်ႈတႆး ပွတ်းၵၢင် လႄႈ ပွတ်းၸၢၼ်း၊ ပိူဝ်ႈတႃႇ မိပ်ႇငႅၼ်းတပ်ႉသိုၵ်းၸိုင်ႈတႆး ဢၼ် ၸင်ႇႁႃၶိုၼ်းၶွတ်ႇၽွတ်ႈ (မိူဝ်ႈလဵဝ် ပဵၼ်ၸုမ်းၶွင်ႇသီႇဢဝ်ၶိုၼ်းၸိုင်ႈတႆး / တပ်ႉသိုၵ်းၸိုင်ႈတႆး RCSS/ SSA ၼၼ်ႉယဝ်ႉ) ၼႂ်းၸႄႈဝဵင်းၼမ်ႉၸၢင်။

တင်ႈတႄႇၼၼ်ႉမႃး သိုၵ်းမၢၼ်ႈတႄႇႁုပ်ႈယိုတ်းတီႈလိၼ်ၼပ်ႉႁဵင်ဢေႊၵႃႊသေ တင်ႈတပ်ႉၶဝ်ႁိမ်းၶူဝ်လမ်၊ ၵွပ်ႈဝႃႈပဵၼ် ၼႃႈတီႈလမ်ႇလွင်ႈတၢင်းၵၢၼ်သိုၵ်း၊ ပဵၼ်သဵၼ်ႈတၢင်းၶွႆႈၵၼ် ဢၼ်ၵွင်ႉၵၢႆႇပၼ်ၵူႈပွတ်းတွၼ်ႈ ၼႂ်းၸိုင်ႈတႆး။ မိူဝ်ႈၼႂ်းပီ 2010 ၼၼ်ႉ သိုၵ်းမၢၼ်ႈ တႄႇတင်ႈတပ်ႉတိူင်းသိုၵ်း ဝၼ်းဢွၵ်ႇၵၢင်ၶဝ် တီႈၶူဝ်လမ် ပဵၼ်တိူင်းသိုၵ်းဢၼ်မႂ်ႇသုတ်းၼႂ်း 14 တိူင်းသိုၵ်း ၶွင်သိုၵ်းမၢၼ်ႈၼၼ်ႉသေ ပဵၼ်တိူင်းသိုၵ်းထူၼ်ႈသီႇ ၼႂ်းၸိုင်ႈတႆး၊ ပႃႈတႂ်ႈမီးတပ်ႉၵွင် 26 တပ်ႉၵွင်၊ ဢဝ်ၼႃႈတီႈပုၼ်ႈၽွၼ်းၵုမ်းၵမ်ၶူဝ်း တိုၼ်းသၽႃဝ ၼႂ်းၸိုင်ႈတႆးပွတ်းၵၢင်လႄႈ ပွတ်းၸၢၼ်း ဢၼ်တဵၵ်းၸႂ်ႉ ၵူၼ်းမိူင်းၶၢႆႉပၢႆႈ မိူဝ်ႈပူၼ်ႉမႃးၶၢဝ်းတၢင်း 20 ပၢႆ ၼႂ်းၽိုၼ်တၢမ်းငဝ်းလၢႆး SHRF ဢွၵ်ႇဝႆႉၼင်ႇၼႆ။