Friday, March 29, 2024

လိူၼ်ၵျုၼ်ႊ-ၵျူႊလၢႆႊ ၼႆႉ သိုၵ်းလူင်ပွင်ၸိုင်ႈ လေႃႇယိုဝ်း RCSS/SSA ဢမ်ႇယွမ်း 20 ပွၵ်ႈ

Must read

တင်ႈဢဝ်ႁၢင်လိူၼ်ၵျုၼ်ႊမႃး တေႃႇထိုင်ဝၼ်းမိူဝ်ႈၼႆႉ သိုၵ်းလူင်ပွင်ၸိုင်ႈမၢၼ်ႈ ႁႅၼ်းသိုၵ်းလေႃႇတိုၵ်း တပ်ႉသိုၵ်း ၸိုင်ႈတႆး RCSS/SSA ၼႂ်းၸႄႈဝဵင်းၵျွၵ်ႉမႄး ဢမ်ႇယွမ်း 20 ပွၵ်ႈ၊ ၵူၼ်းဝၢၼ်ႈၵူၼ်းသူၼ် ၼပ်ႉႁူဝ်ႁဵင် ၺႃးၸၢၵ်ႇ ပၢင်တိုၵ်း သိုၵ်းသိူဝ်။

Photo by – တႆးလွတ်ႈလႅဝ်း/ ၵေႃႉသိုၵ်း RCSS

တႄႇဢဝ် မိူဝ်ႈဝၼ်းတီႈ 25/6/2020 မႃးတေႃႇထိုင် ဝၼ်းတီႈ 21/7/2020 ၼႆႉ သိုၵ်းလူင်ပွင်ၸိုင်ႈမၢၼ်ႈ 5 တပ်ႉၵွင် မိူၼ်ၼင်ႇ တပ်ႉၶလယ 22 ၊ ၶလယ 23 ၊ ၶလယ 101 ၊ ၶလယ 147 ၊ ၶလယ 256 ၊ ၶလယ 136 လႄႈ ၶမယ 503 ႁူမ်ႈၵၼ် သွၵ်ႈတဝ်ထိူၼ်ႇ လေႃႇတိုၵ်း တပ်ႉၶွင်ႇသီႇဢဝ် ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA ၼႂ်းၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ၊ သွင်ၾၢႆႇ တုမ်ႉလေႃႇၵၼ် လႆႈပဵၼ်ပၢင်တိုၵ်း ဢမ်ႇယွမ်း 20 ပွၵ်ႈ ။

- Subscription -

ၸဝ်ႈသိုၵ်း ဢုမ်ႈၶိူဝ်း ၽူႈၶၢၼ်ပၢၵ်ႇ RCSS လၢတ်ႈတီႈၽူႈတွႆႇႁွၵ်ႈဝႃႈ – “လွင်ႈလႆႈပဵၼ်ပၢင်တိုၵ်းၵၼ် ၼႂ်းၸႄႈ ဝဵင်းၵျွၵ်ႉမႄးၼႆႉ တေလႆႈဝႃႈ ယွၼ်ႉၾၢႆႇသိုၵ်းမၢၼ်ႈၶဝ် ပူၼ်ႉပႅၼ်ၶေႃႈၵိၼ်ၵႅၼ်ႇ NCA ၶႃႈယဝ်ႉ။ ၼႂ်း NCA ၼၼ်ႉ တိုၼ်းမီးဝႆႉဝႃႈ တီႈယူႇၽႂ်တီႈယူႇမၼ်း သင်ဝႃႈ မီးၵၢၼ်ငၢၼ်းသင်သေလွင်ႈလွင်ႈ တေလႆႈပွင်ႇလႅင်းၵၼ်၊ ဢဝ်လွင်ႈ လႆႈၸႂ်ၵၼ်သေၵွၼ်ႇ ၸင်ႇတေၵႂႃႇမႃးလႆႈ။ မိူၼ်ၼင်ႇ ၸုမ်းႁဝ်းၶႃႈ ပေႃးတေၶဝ်ႈၵႂႃႇၼႂ်းဝဵင်းၸိုင် တေဢမ်ႇလႆႈသႂ်ႇၶူဝ်း သိုၵ်း တေဢမ်ႇလႆႈပႃးၵွင်ႈ။ သိုၵ်းမၢၼ်ႈၶဝ်ၵေႃႈ သင်ဝႃႈ တေၶဝ်ႈၼႂ်းထိူၼ်ႇၼႂ်းၶိူဝ်းၵေႃႈ တေလႆႈပွင်ႇၶၢဝ်ႇၸူးတၢင်း ႁဝ်းၶႃႈ လူင်ႉလႅင်းၵၼ်တင်းသွင်ၾၢႆႇသေ ၸင်ႇတေပၼ်ၵႂႃႇၸိူဝ်းၼႆႉ” ဝႃႈၼႆ။

ပၢင်တိုၵ်းဢၼ်ပဵၼ်ၵၼ်ၼႂ်းၸႄႈဝဵင်းၵျွၵ်ႉမႄးၼႆႉ ပဵၼ်တၢင်းပွတ်းဢိူင်ႇႁၢႆးၵုၺ်၊ ဢိူင်ႇလွႆၸွင်ႈ၊ ဢိူင်ႇပၢင်ႇလေႃႉ၊ ဢိူင်ႇ မေႃႇမႃ။ ယွၼ်ႉပၢင်တိုၵ်းသေ ၾၢႆႇ ၶွင်ႇသီႇဢဝ်ၶိုၼ်းၸိုင်ႈတႆး မၢတ်ႇၸဵပ်းၽွင်ႈ၊ ဢမ်ႇမီးၽႂ်လူႉတၢႆ။ ၾၢႆႇသိုၵ်းမၢၼ်ႈ တေႉ လႆႈႁူႉဝႃႈ တၢႆ 3 ၵေႃႉ မၢတ်ႇၸဵပ်း 20 ၵေႃႉ။ ၵူၼ်းမိူင်းၼပ်ႉႁဵင် လႆႈဢွၼ်ၵၼ်ပၢႆႈယၢၼ်ႁိူၼ်းယေးတီႈယူႇ။

ၸၢႆးထုၼ်းဝိၼ်း ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈမၢႆ 1 ၸႄႈဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ “ဢိင်ၼိူဝ် လွင်ႈပဵၼ်ပၢင်တိုၵ်းၵၼ်ၼႆႉသေ ၵူၼ်းဝၢၼ်ႈႁဝ်းၶႃႈ လႆႈဢွၼ်ၵၼ်ပၢႆႈၽေးသိုၵ်းၼႆႉ တင်းမူတ်းတေမီး 1,000 ပၢႆၼႆႉၶႃႈ ယဝ်ႉ တီႈဢၼ်လႆႈႁူႉဝႆႉတႄႉ။ ယၢမ်းလဵဝ် ၵူၼ်းပၢႆႈၽေးသိုၵ်းတႄႉ လႆႈဢွၼ်ၵၼ်ပွၵ်ႈၶိုၼ်းႁိူၼ်းယေး ၽႂ်မၼ်းမူတ်းယဝ်ႉ တီႈၵျွၵ်ႉမႄးႁဝ်းၶႃႈတႄႉ” – ဝႃႈၼႆ။

ယွၼ်ႉပဵၼ်ပၢင်တိုၵ်းၵၼ်မႃးၼႆႉသေ ၵူၼ်းဝၢၼ်ႈလႆႈၺႃးၸၢၵ်ႇၸွမ်း ၼႂ်းၵႄႈပၢင်တိုၵ်း၊ လုင်းၸၢႆးသူႉ ဢႃယု 60 ပီ ၵူၼ်းဝၢၼ်ႈပၢင်ၵႅၼ် ထုၵ်ႇယိုဝ်းတၢႆထင်တီႈ၊ ၼၢႆးသႂ် ၵူၼ်းဝၢၼ်ႈပၢင်ၵႅၼ် တိူဝ်ႉၺႃးမၢၵ်ႇၵွင်ႈတီႈၵုမ်ႇၵူၼ်ႈလႄႈ လုင်းၸၢႆးမွင်ႇ ဢႃယု 60 ပီ ၵူၼ်းဝၢၼ်ႈဢႅၵ်ႉၵျီး ဢိူင်ႇပၢင်ႇလေႃႉ ထုၵ်ႇသိုၵ်းမၢၼ်ႈတီႉၺွပ်းပေႃႉထုပ်ႉ ၸႅတ်ႈထၢမ်ႁၢဝ်ႈႁႅင်း ၼႆယဝ်ႉ။

ဢိင်ၼိူဝ်ၵူၼ်းမိူင်းၺႃးယိုဝ်းတၢႆ ၊ မၢတ်ႇၸဵပ်း ၸိူဝ်းၼႆႉသေမိူဝ်ႈဝၼ်းတီႈ 10 ပူၼ်ႉမႃးၼႆႉ ၵူၼ်းမိူင်းၵျွၵ်ႉမႄး ၼပ်ႉမိုၼ်ႇ လုၵ်ႉႁိုၼ်ႇၼႄၵၢင်ၸႂ် လူၺ်ႈလၢႆးၵတ်းယဵၼ်၊ တုၵ်းယွၼ်း သိုၵ်းဢၼ်ၶႃႈႁႅမ်ၵူၼ်းမိူင်းတၢႆ ဢွၵ်ႇယၼ်ၼႂ်းပိုၼ်ႉတီႈ၊ ၼႂ်းဝၼ်းၼၼ်ႉၾၢႆႇသိုၵ်းမၢၼ်ႈၵေႃႈဝႃႈ ၵူၼ်းၼႄၵၢင်ၸႂ် ပူၼ်ႉပႅၼ်မၢႆမီႈ ၶၢဝ်းၶူဝ်ႊဝိတ်ႉ ၼႆသေ ပိုၼ်ၽၢဝ်ႇ ၸႅင်ႈၵႂၢမ်း ၸွႆးတြႃးတေႃႇ ၵူၼ်းဢွၼ်ႁူဝ်ဝႆႉ သၢမ်ၵေႃႉ – တေႃႇထိုင်တေႃႈလဵဝ် ပၼ်ႁႃ ယင်းပႆႇယဝ်ႉ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း