တပ်ႉသိုၵ်းတဢၢင်း TNLA တင်း တပ်ႉသိုၵ်းလူင်ပွင်ၸိုင်ႈမၢၼ်ႈ ပဵၼ်ပၢင်တိုၵ်းႁၢဝ်ႈႁႅင်း ၵူၼ်းမိူင်း 158 ၵေႃႉ ၼႂ်းၸႄႈဝဵင်းၵူတ်ႉၶၢႆ ဢွၼ်ၵၼ်ပၢႆႈၽေးသိုၵ်း မႃးသွၼ်ႈယူႇဝႆႉတီႈ ၼႂ်းဝဵင်းသႅၼ်ဝီ။

ဝၼ်းတီႈ 05/02/2018 ယၢမ်းဝၢႆးဝၼ်း 2 မူင်း ၵူၼ်းမိူင်း ဝၢၼ်ႈတႃႈၶၢႆႇလႄႈ ဝၢၼ်ႈသၢႆးၶၢဝ် ၸႄႈဝဵင်းၵူတ်ႉၶၢႆ ဢွၼ် ၵၼ်ပၢႆႈၽေးသိုၵ်း ဢွၵ်ႇမႃးသွၼ်ႈသဝ်းဝႆႉတီႈ ဝတ်ႉဝိႁၢရ်လူင်ၵွင်းဢၢႆႇ ဢိူင်ႇၵွင်းဢၢႆႇ ၸႄႈဝဵင်းသႅၼ်ဝီ ၸႄႈ တွၼ်ႈ လႃႈသဵဝ်ႈ ၸိုင်ႈတႆးပွတ်းႁွင်ႇ။ တႄႇႁူဝ်လိူၼ်ၼႆႉမႃး သိုၵ်းတဢၢင်း တင်း သိုၵ်းလူင်ပွင်ၸိုင်ႈမၢၼ်ႈ ပဵၼ်ပၢင်တိုၵ်း ၵၼ် ၼႂ်းထုင်ႉလႅၼ်ၶၼ်ႈ ၼမ်ႉတူႈ၊ ၵူတ်ႉၶၢႆလႄႈ သႅၼ်ဝီ လၢႆပွၵ်ႈလၢႆၵမ်း။

ၼၢင်းၶိၼ်ႇထႃးယီႇ ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈ မၢႆ(1) ၸႄႈဝဵင်းသႅၼ်ဝီ လၢတ်ႈတီႈၸုမ်းၶၢဝ်ႇ ၽူႈတွႆႇ ႁွၵ်ႈဝႃႈ “ ၸႂ်ႈၶႃႈဢေႃႈ ဢၼ်ပၢႆႈမႃးတၢင်းသႅၼ်ဝီႁဝ်းၶႃႈၼႆႉ တင်းမူတ်း မီး 158 ၵေႃႉ၊ ပီႈၼွင်ႉ ႁဝ်းၶႃႈ ဢၼ်ပၢႆႈ မႃးသမ်ႉ ပဵၼ်ၸၢဝ်းတႆး၊ ၸၢဝ်းၶၢင်လႄႈ ၸၢဝ်းလွႆ ၸဵမ်ၸိူဝ်းၼႆႉၶႃႈ။ မၢင်ၵေႃႉ ဢမ်ႇတၼ်းလႆႈ ၶူဝ်းလဵင်းသင်မႃး ပႃးမႃးၵိုၵ်းတူဝ်ၶဝ် ၼိုင်ႈၸုမ်ႇၵူၺ်း။ လီဢေးလူၵေႃႈ လုၵ်ႈဢွၼ်ႇႁဵၼ်း ၸိူဝ်းပၢႆႈမႃး တိုၵ်ႉၼုင်ႈၶူဝ်းႁူင်းႁဵၼ်းယူႇ ၶူဝ်းလၢႆႈၵေႃႈ ဢမ်ႇ တၼ်းလႆႈသင်မႃး ၶဝ်ၵေႃႈႁႃၶူဝ်းလဵင်းသေ ပၼ်ၵၼ်ၼုင်ႈႁဵတ်းၼၼ်ၶႃႈ ဢေႃႈ။ ယဝ်ႉၵေႃႈ လုၵ်ႈဢွၼ်ႇလႅင်ၵေႃႈ မီး 2 ၵေႃႉ” ဝႃႈၼႆ။

ၵဵဝ်ႇၵပ်းလွင်ႈၼႆႉ ၵူၼ်းမိူင်း ဢၼ်ပၢႆႈၽေးသိုၵ်း မႃးသွၼ်ႈသဝ်းဝႆႉတီႈ ၼႂ်းဢိူင်ႇၵွင်းဢၢႆႇၼႆႉ ၽူႈၸၢႆး 76 ၵေႃႉ၊ ၽူႈ ယိင်း 82 ၵေႃႉ ႁူမ်ႈၵၼ် 158 ၵေႃႉ ဝႃႈၼႆ။

ၼၢင်းၶိၼ်ႇထႃးယီႇ လၢတ်ႈဝႃႈ မိူဝ်ႈဝႃး ဝၼ်းတီႈ 6 တႄႉ ယူႇတီႈၽူႈၽွင်းငမ်းဢုပ်ႉပိူင်ႇၸႄႈဝဵင်းသႅၼ်ဝီသေ လႆႈ ၸွႆႈၵႂႃႇ ၶဝ်ႈသၢၼ် 10 ထူင်။ ဝၢႆးဝၼ်းသမ်ႉ ၶိူဝ်းလီးသေႃး ၵေႃႈမႃးၵမ်ႉၸွႆႈပၼ် ဝႃႈၼႆ။

ၼႂ်းမိူင်းတႆး ပွတ်းၼမ်ႉၶမ်း၊ ၼမ်ႉတူႈ၊ ၵျွၵ်ႉမႄး၊ ၼမ်ႉသၼ်ႇ ၸဵမ်ၸိူဝ်းၼႆႉ တပ်ႉသိုၵ်းတဢၢင်းတင်း တပ်ႉသိုၵ်း လူင်ပွင်ၸိုင်ႈမၢၼ်ႈ ပဵၼ်ပၢင်တိုၵ်းၵၼ်သေဢမ်ႇၵႃး ထႅင်ႈၾၢႆႇၼိုင်ႈၵေႃႈ တပ်ႉသိုၵ်းတဢၢင်းတင်း တပ်ႉသိုၵ်း RCSS/SSA ၵေႃႈ ပဵၼ်ပၢင်တိုၵ်းၵၼ် ဝႃႈၼႆ။