ၸွမ်ၸိၵ်းသိုၵ်းထႆးဢွၼ်ဢဝ်ၸုမ်းၸိူဝ်း ၵႂႃႇႁူပ်ႉထူပ်းၵၼ်တင်း ၸွမ်ၸိၵ်းသိုၵ်းမၢၼ်ႈ တီႈၼေႇပျီႇ တေႃႇ ပိူဝ်ႈသၢင်ႈလွင်ႈမိုတ်ႈၵိုဝ်းၸမ်ၸႂ်ၵၼ်။
ဝၼ်းတီႈ 04 – 06 /02/2018 သိုဝ်ႇၶၢဝ်ႇထႆးရတ်ႊ Thairath ပိုၼ်ၽၢဝ်ႇဝႃႈ ၸွမ်သိုၵ်းလူင် ထၢရ်ႊၶျႆႊယၼ်ႊ သီႊသူႊဝၼ်ႊ ၽူႈၵွၼ်းသိုၵ်း သုင်သုတ်း လႆႈဢွၵ်ႇၶၢဝ်းတၢင်းၵႂႃႇ မိူင်းႁူမ်ႈ တုမ်မျၢၼ်ႇမႃႇ ႁူပ်ႉထူပ်းတင်း ၸွမ်သိုၵ်းလူင် မိၼ်ႉဢွင်ႇလၢႆႇ ပိူဝ်ႈႁႂ်ႈတပ်ႉသိုၵ်းသွင်ၸိုင်ႈမိူင်း မီးလွင်ႈမိုတ်ႈၵိုဝ်းၸမ်ၸႂ်ၵၼ်။
ၼႂ်းပၢင်ၼႆႉဢုပ်ႇဢူဝ်းၵၼ် လွင်ႈၵၢၼ်ပၢႆးပၺ်ၺႃ ၊ လွင်ႈၵၢၼ်ၶၢဝ်ႇ၊ လွင်ႈလႅၼ်လိၼ်၊ လွင်ႈၵၢၼ် ၽုၵ်ႇသွမ်ႈၸိူဝ်းၼႆႉ။ လိူဝ်ၼၼ်ႉမီးၵၢၼ်ၵႂႃႇလွင်းသွမ်းမုၼ်ၸဝ်ႈႁူမ်ႈၵၼ် ၼႆယဝ်ႉ။
မိူဝ်ႈဝၼ်းတီႈ 28-30/08/2017 ၼၼ်ႉၵေႃႈ သိုဝ်ႇၶၢဝ်ႇထႆးရတ်ႊပိုၼ်ၽၢဝ်ႇဝႃႈ ၶွမ်ႊမတီႊသုင်သုတ်း (HLC) High Level Committee Meeting Thailand – Myanmar ထႆး – မၢၼ်ႈ ၸတ်းႁဵတ်း ပၢင်ၵုမ်တီႈႁူင်းႁႅမ်းဢဝႃႊၼီႊ ၸႄႈတွၼ်ႈၶွၼ်ၵႅၼ်ႇ ၸိုင်ႈထႆး ။ ၽူႈၵွၼ်းသိုၵ်းထႆး ၸွမ်သိုၵ်းလူင် သူႊရၽူင်ႊ သူႊဝၼ်ႊၼဢတ်ႊ လႄႈ ၽူႈၵွၼ်းသိုၵ်းမၢၼ်ႈ ၸွမ်သိုၵ်းလူင် မိၼ်းဢွင်ႇလၢႆႇ ဢွၼ် ဢဝ် ၸဝ်ႈၼႃႈ တီႈၾၢႆႇၵဵဝ်ႇၶွင်ႈတင်းသွင်ၾၢႆႇၶဝ်ႈႁူမ်ႈ။
