ၵူၼ်းမိူင်းၼမ်ႉၶမ်း ႁူမ်ႈၵၼ်တႅမ်ႈလိၵ်ႈထိုင်လူင်ပွင်ၸိုင်ႈမိူင်းတႆး ႁႂ်ႈၸွႆႈႁႃတၢင်းၵႄႈလိတ်ႈပၼ်ႁႃ လွင်ႈတီႈလိၼ် ၵူၼ်းမိူင်း ဢၼ်ၾၢႆႇတႅၵ်ႈၼႃႈလိၼ် တတ်းဢဝ်ပဵၼ်လိၼ်တၢင်း။
ဝၼ်းတီႈ 29 /01/2018 ၵူၼ်းမိူင်းၼမ်ႉၶမ်း ႁူမ်ႈၵၼ်တႅမ်ႈလိၵ်ႈထိုင် လူင်ပွင်ၸိုင်ႈမိူင်းတႆး ၵဵဝ်ႇ လွင်ႈ ၵူၼ်းမိူင်းၼမ်ႉၶမ်းဢၼ်ယူႇ သွင်ၾၢၵ်ႇၶၢင်ႈတၢင်း ၼႂ်းဢိူင်ႇမိူင်းဝီး ၸႄႈဝဵင်းၼမ်ႉၶမ်း။ ၵူၼ်းမိူင်း ယွၼ်းဝႂ်တီႈလိၼ် 105 တီႈလုမ်း တႅၵ်ႈၼႃႈလိၼ်။ ၵူၺ်းၵႃႈၾၢႆႇတီႈလိၼ်သမ်ႉတႅၵ်ႈပၼ် တီႈလိၼ်ဢမ်ႇတဵမ်လွၵ်းၸွမ်းၼင်ႇၸဝ်ႈသူၼ်ၸဝ်ႈၼႃးမီး။ ၵူၼ်းမိူင်းဢမ်ႇႁၢၼ်ႉၸႂ်ႁူမ်ႈၵၼ်တႅမ်ႈ လိၵ်ႈထိုင်လူင်ပွင် ၸိုင်ႈမိူင်းတႆး ႁႂ်ႈလူင်းၵူတ်ႇထတ်းပၼ် ။
လုင်းၸၢႆးပီး ၵူၼ်းၼႂ်းပိုၼ်ႉတီႈလၢတ်ႈဝႃႈ – “ ၵူၼ်းဝၢၼ်ႈဢၼ်တေႁဵတ်းႁိူၼ်းမႂ်ႇၼၼ်ႉ ၵႂႃႇယွၼ်းဝႂ် 105 တီႈလုမ်းၾၢႆႇတီႈလိၼ် ထႅမ်သႂ်ႇတၢင်းၵႂၢင်ႈတီႈလိၼ်ၼၼ်ႉမၼ်းယွမ်းလႄႈ ႁဵတ်းႁႂ်ႈၵူၼ်း ဝၢၼ်ႈဢမ်ႇပေႃးၸႂ် ” ဝႃႈၼႆ။
ၼၢင်းဢေသႅင် ၵူၼ်းၼႂ်းပိုၼ်ႉတီႈလၢတ်ႈဝႃႈ – “ ႁဝ်းၶႃႈ ၵူၼ်းမိူင်းၼမ်ႉၶမ်း ဢွၼ်ၵၼ်ၵႂႃႇတၢင်ႇ ထိုင်ၽူႈၵွၼ်းၸႄႈဝဵင်းၼမ်ႉၶမ်းယူႇ တႃႇႁႂ်ႈၸွႆႈထႅမ် ႁႂ်ႈၵူၼ်းဝၢၼ်ႈလႆႈၶိုၼ်းတီႈလိၼ်တဵမ်တဵမ် ၵူၺ်းၵႃႈၽူႈၵွၼ်းၸႄႈဝဵင်း ၶိုၼ်းလၢတ်ႈတီႈႁဝ်းၶႃႈဝႃႈ မၼ်းပဵၼ်ၶူင်းၵၢၼ်လူင်ပွင်ၸိုင်ႈလႄႈ ႁဝ်းဢမ်ႇၸၢင်ႈၸွႆႈသင် ၵွပ်ႈၼၼ်ႁဝ်းၶႃႈၵူၼ်းမိူင်းၼႆႉဢမ်ႇၸၢင်ႈၸႂ်ယႂ်ႇၽႂ်ယဝ်ႉၶႃႈ ” ဝႃႈၼႆ။
ႁွင်ႈၵၢၼ်ၾၢႆႇတီႈလိၼ် သပ်းၸႅင်ႈလၢတ်ႈဝႃႈ – ပေႃးပဵၼ်သဵၼ်ႈတၢင်းလူင် Super Highway ၼႆတၢင်းၵႂၢင်ႈတေမီး 400 ထတ်း၊ သဵၼ်ႈတၢင်းၵႂၢင်ႈယူဝ်းယူဝ်း တေၵႂၢင်ႈ 300 ထတ်း၊ သဵၼ်ႈတၢင်း ဢၼ် ၶိုတ်းၸၼ်ႉၵူႈမိူင်းမိူင်း 230ထတ်း ၊ သဵၼ်ႈတၢင်းၵပ်းသိုပ်ႇ တေႃႇၸႄႈတွၼ်ႈ 150 ထတ်း၊ ဝူင်ႈၵၢင် ဝၢၼ်ႈတေႃႇဝၢၼ်ႈသမ်ႉ တီႈဢေႇသုတ်းတေလႆႈၵႂၢင်ႈ 100 ထတ်း ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ