ပီႈၼွင်ႉတႆး ၸိူဝ်းႁဵတ်းၵၢၼ် ၼႂ်းၵဵင်းမႆႇ ၸိုင်ႈထႆး ႁူမ်ႈႁႅင်းႁူမ်ႈၸႂ်ၵၼ်သေ လဵၼ်ႈမၢၵ်ႇၼင် ႁႂ်ႈပဵၼ်တီႈမၢႆတွင်း ၼႂ်းဝၼ်းၸိူဝ်ႉၸၢတ်ႈတႆး ၶွပ်ႈတဵမ် 71 ပီ (Shan State National Day) ဝႃႈၼႆ။

ဝၼ်းတီႈ 04/02/2018 ယၢမ်းဝၢႆးဝၼ်း 1 မူင်း ထိုင် 5 မူင်း ႁူဝ်ၶမ်ႈ ၸုမ်းႁႅင်းၵၢၼ်ၽွမ်ႉႁူမ်ႈ WSA တင်း ၸုမ်း ၵူၼ်းၼုမ်ႇတႆး ၵဵင်းမႆႇ ႁူမ်ႈၵၼ်သေ ၸတ်းႁဵတ်းပၢင်လဵၼ်ႈမၢၵ်ႇၼင် တႃႇၵူၼ်းၼုမ်ႇလႄႈ ပီႈၼွင်ႉႁႅင်းၵၢၼ်တႆး ၸိူဝ်းၶဝ်ႈၵႂႃႇႁဵတ်းၵၢၼ်ၼႂ်းၵဵင်းမႆႇ တႃႇႁႂ်ႈပဵၼ်တီႈမၢႆတွင်း ၼႂ်းဝၼ်းၸိူဝ်ႉၸၢတ်ႈၸိုင်ႈတႆးသေ ဢမ်ႇၵႃး ၼွၵ်ႈလိူဝ် ၼၼ်ႉ ၼင်ႇႁိုဝ် ၵူၼ်းၼုမ်ႇပေႃးတေယၢၼ်ၵႆ ယႃႈမဝ်းၵမ်၊ ႁႂ်ႈမီးလွင်ႈမိုတ်ႈၵိုဝ်းႁူႉၸၵ်းၵၼ်လႄႈ ႁႂ်ႈမေႃၸွႆႈထႅမ် တိုတ်ႉတၢႆးၵၼ်။ ပၢင်လဵၼ်ႈမၢၵ်ႇၼင်ၼႆႉ ၸတ်းႁဵတ်းတီႈ ၵဵင်းမႆႇယူႊၼၢႆႊတႅတ်ႊ(Chiang Mai United) ၸႄႈဝဵင်းၵဵင်းမႆႇ ၸိုင်ႈထႆး ဝႃႈၼႆ။

ၸၢႆးၶိူဝ်းလႅင်း ၽူႈပွင်ၵၢၼ် ၸုမ်းႁႅင်းၵၢၼ်ၽွမ်ႉႁူမ်ႈ WSA လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ ပဵၼ်ပီႈၼွင်ႉႁႅင်း ၵၢၼ်တႆးႁဝ်း၊ ၸုမ်းၵူၼ်းၼုမ်ႇတႆးႁဝ်း ၸဵမ်ၸိူဝ်းၼႆႉ ႁဝ်းၶႃႈ မႃးႁူမ်ႈၵၼ်သေ လဵၼ်ႈမၢၵ်ႇၼင် တႃႇႁႂ်ႈပဵၼ်တီႈ မၢႆ တွင်း ၼႂ်းဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈတဵမ် 71 ပီ။ ဢၼ်ႁဝ်းၶႃႈ ႁူမ်ႈၵၼ်သေ ၸတ်းႁဵတ်းပၢင်လဵၼ်ႈမၢၵ်ႇၼင် တႃႇပဵၼ်တီႈမၢႆတွင်း ပွၵ်ႈၼႆႉ တေလႆႈဝႃႈ ပဵၼ်ပွၵ်ႈၵမ်းႁႅၵ်ႈ(ဢွၼ်တၢင်းသုတ်း)။ ယိူင်းဢၢၼ်းဢၼ်လႆႈ ၸတ်းႁဵတ်း သမ်ႉ ႁႂ်ႈပီႈၼွင်ႉတႆးႁဝ်းၶႃႈ မႃးႁူပ်ႉထူပ်းၵၼ်၊ ႁႂ်ႈလုၵ်ႈဢွၼ်ႇတႆးႁဝ်းၶႃႈ မႃးလဵၼ်ႈၶႅင်ႇမၢၵ်ႇၼင်ၵၼ် တႃႇလႆႈငိုၼ်း ၵွင်ၵၢင် တႃႈတေသိုဝ်ႉၶိူင်ႈၸႂ်ႉသွႆ ၵၢၼ်သွၼ်ႁဵၼ်းသေ တေၸွႆႈသူင်ႇပၼ် တီႈႁူင်းႁဵၼ်းၸိူဝ်ႉၸၢတ်ႈလွႆတႆးလႅင်း။ ယဝ်ႉၵေႃႈ ႁႂ်ႈၵူၼ်းၼုမ်ႇတႆးႁဝ်း ယၢၼ်ၵႆယႃႈမဝ်းၵမ်၊ ယႃႇႁႂ်ႈပဵၼ်မူႇပဵၼ်ၸုမ်းသေ ၵႂႃႇပၢၼ်းၽိတ်းမေႃးပိူၼ်ႈ၊ ႁႂ်ႈ ႁဝ်းၶႃႈၽွမ်ႉသဵင်ပဵင်းပၢၵ်ႇၵၼ်၊ ႁႂ်ႈလႆႈႁူပ်ႉထူပ်းမိုတ်ႈၵိုဝ်းၵၼ်၊ ယႃႇႁႂ်ႈၵူၼ်းၼုမ်ႇႁဝ်းၸိူဝ်းမႃးယူႇၼႂ်းၵဵင်းမႆႇၼႆႉ ယႃႇ ႁႂ်ႈလႆႈသၢင်ႈၵၢၼ်ႁၢႆႉတေႃႇၵၼ်လႄႈ ပိူၼ်ႈၸဵမ်ၸိူဝ်းၼႆႉ” ဝႃႈၼႆ။

ပၢင်လဵၼ်ႈမၢၵ်ႇၼင် မၢႆတွင်းဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈတဵမ် 71 ပီ တီႈၵဵင်းမႆႇၼႆႉ ၸုမ်းၶဝ်ႈၶႅင်ႇတင်းမူတ်း မီး 13 ၸုမ်း။ ၸုမ်းဢၼ်လႆႈၵႂႃႇသူးထီႉၼိုင်ႈသမ်ႉ ပဵၼ်ၸုမ်းႁူဝ်မိူင်း FC၊ ထီႉသွင် ၸုမ်းသိူဝ်ၼုမ်ႇၾႃႉ၊ ထီႉသၢမ် သမ်ႉ ၸုမ်းသၼ်လွႆ FC။ လိူဝ်ၼၼ်ႉ တွၼ်ႈပႃးထႅင်ႈ သူးၼမ်ႉၸႂ် ၽူႈပႂ်ႉၵူဝ်းလႄႈ ၽူႈလဵၼ်ႈၶႅၼ်ႇထႅင်ႈ ၸဵမ်ၸိူဝ်း ၼႆႉ ဝႃႈၼႆ။

ၸၢႆးၶိူဝ်းလႅင်းလၢတ်ႈဝႃႈ ပၢင်လဵၼ်ႈမၢၵ်ႇၼင်ပွၵ်ႈၼႆႉ ႁဝ်းၶႃႈ လႆႈငိုၼ်းၵမ်ႉထႅမ် တီႈပီႈၼွင်ႉတႆးႁဝ်း ၵမ်ႉထႅမ်ၸွႆႈ မႃးၵေႃႉဢိတ်းၵေႃႉဢွတ်းသေ၊ ယဝ်ႉၵေႃႈ တီႈတၢင်ႇၸုမ်းထႅင်ႈ ၼွၵ်ႈလိူဝ်ၼၼ်ႉ လႆႈၵဵပ်းၵၼ်ထႅင်ႈတီႈ ၸုမ်းၸိူဝ်း ဢၼ်ၶဝ်ႈၶႅင်ႇမၢၵ်ႇၼင် ၼိုင်ႈၸုမ်းလႂ် 1 ၽၼ်းပၢႆ။ ငိုၼ်းၸိူဝ်းၼႆႉ ဢဝ်မႃးႁူမ်ႈၵၼ်တင်းမူတ်းသေ ႁဝ်းၶႃႈ သိုဝ်ႉသူး/ရၢင်းဝလ်းသေ တွၼ်ႈၵၼ်။ ယဝ်ႉၵေႃႈ ၸၢႆႇၵႃႈဢွင်ႈတီႈလဵၼ်ႈမၼ်း။ ၼွၵ်ႈလိူဝ်ၼၼ်ႉ ငိုၼ်းဢၼ်ၵိုတ်း လိူဝ်ထႅင်ႈၸိူဝ်းၼၼ်ႉၵေႃႈ ႁဝ်းၶႃႈသိုဝ်ႉၶိူင်ႈၸႂ်ႉသွႆတႃႇၵၢၼ်ႁဵၼ်းသေ သူင်ႇၸွႆႈပၼ်တီႈႁူင်းႁဵၼ်းၸိူဝ်ႉၸၢတ်ႈတႆး တီႈလွႆတႆးလႅင်းၶႃႈ” ဝႃႈၼႆ။