Friday, March 29, 2024

ၵူၼ်းၼုမ်ႇ ၼႂ်းပႃႇတီႇ NLD တေဢွၼ်ၸတ်းႁဵတ်း ဝၼ်းမိူင်းႁူမ်ႈတုမ် ၶွပ်ႈတဵမ် 71 ပီ တီႈလၵ်းသဝ်ႁိၼ် ပၢင်လူင်

Must read

ၵူၼ်းၼုမ်ႇ ၼႂ်းပႃႇတီႇၼူၵ်ႉယုင်း NLD ဢဵၼ်ႁႅင်း 7 မိုၼ်ႇၵေႃႉ တေတေႁူမ်ႈၵၼ် ၸတ်းႁဵတ်းဝၼ်းမိူင်းႁူမ်ႈတုမ် ၶွပ်ႈတဵမ် 71 ပီ တီႈၼႂ်းဝၢင်းလၵ်းသဝ်ႁိၼ် ၸႄႈဝဵင်းပၢင်လူင် ၵူၺ်းၵႃႈ ၵူၼ်းၼုမ်ႇလႄႈ ၵူၼ်းမိူင်း ၼႂ်းပိုၼ်ႉတီႈ တႄႉ ဢမ်ႇပႆႇလႆႈႁပ်ႉႁူႉ ဝႃႈၼႆ။

ဝၼ်းတီႈ 31/01/2018 ၶွမ်ႊမတီႊငဝ်ႈငုၼ်း CWC တင်း ၶွမ်ႊမတီႊ ၵူၼ်းၼုမ်ႇၸႄႈမိူင်း/တိူင်း ႁူပ်ႉထူပ်းၵၼ် တီႈၼေႇပျီႇတေႃႇ ပွၵ်ႈၵမ်းသွင် ယူႇတီႈႁူဝ်ပဝ်ႈၶွမ်ႊမတီႊၵူၼ်းၼုမ်ႇ ဢူးမွင်ႇမွင်ႇဢူးလၢတ်ႈဝႃႈ တေယူႇတီႈၵူၼ်း ၼုမ်ႇ ၼႂ်းပႃႇတီႇယူၵ်ႉယုင်း NLD ဢဵၼ်ႁႅင်း 7 မိုၼ်ႇၵေႃႉသေ တေၸတ်းႁဵတ်းဝၼ်းမိူင်းႁူမ်ႈတုမ် ၶွပ်ႈတဵမ် 71 ပီ တီႈၸႄႈဝဵင်းပၢင်လူင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ဝႃႈၼႆ။

- Subscription -

ၸၢႆးသူႉ ႁူဝ်ၼႃႈ ၸုမ်းၵူၼ်းၼုမ်ႇ ၸႄႈဝဵင်းပၢင်လူင်လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ လႆႈငိၼ်းၶၢဝ်ႇဢွၵ်ႇမႃးဝႃႈ ယူႇတီႈၵူၼ်းၼုမ်ႇ NLD သေ တေဢွၼ်ႁဵတ်းဝၼ်းမိူင်းႁူမ်ႈတုမ်။ တေႃႇယၢမ်းလဵဝ် ပႆႇႁၼ်ၶဝ်ႁၢင်ႈႁႅၼ်းသင်၊ ယဝ်ႉၵေႃႈ ၵူၼ်းပိုၼ်ႉတီႈၵေႃႈပႆႇလႆႈႁပ်ႉႁူႉလွင်ႈၼႆႉ။ လွင်ႈမႃးမွၵ်ႇထိုင်ၵေႃႈပႆႇမီး။ ယူႇတီႈၵူၼ်း ပိုၼ်ႉတီႈ ႁဝ်းၶႃႈတႄႉ ပႆႇလႆႈႁူႉ။ လွင်ႈတေၸတ်းႁဵတ်းဝၼ်းမိူင်းႁူမ်ႈတုမ်ၼႆႉ တေယူႇတီႈပႃႇတီႇသေၸတ်းႁဵတ်းႁႃႉ၊ ဢမ်ႇၼၼ် ယူႇတီႈလူင်ပွင်ၸိုင်ႈသေ တေဢွၼ်ၸတ်းႁဵတ်းႁႃႉဢၼ်ဝႃႈၼၼ်ႉ ၵူၼ်းမိူင်းယင်းပႆႇႁူႉလွင်ႈတၢင်းမၼ်း ၸႅင်ႈလႅင်းလီ” ဝႃႈၼႆ။

မိူဝ်ႈပူၼ်ႉမႃး လိူၼ်ၻီႊသႅမ်ႊၿိူဝ်ႊ 2017 ၼၼ်ႉ ပၢင်ၵုမ် လူင်းၵဵပ်းသဵင်ၵၢင်ၸႂ်ၵူၼ်းမိူင်း ၸၼ်ႉၸိူဝ်ႉၸၢတ်ႈတႆး ဢၼ်လူင်းႁူပ်ႉထူပ်းၵူၼ်းမိူင်း တီႈၸႄႈဝဵင်းပၢင်လူင်ၼႆႉ လွင်ႈၼႆႉၵေႃႈ ထုၵ်ႇသိုၵ်းလူင်ပွင်ၸိုင်ႈမၢၼ်ႈ သၢၼ်ၶတ်း ႁၢမ်ႈတပ်ႉ ဢမ်ႇပၼ်ႁဵတ်း ဝႃႈၼႆ။

ၸၢႆးသူႉ လၢတ်ႈဝႃႈ “ တေႃႈလဵဝ်သမ်ႉ တေယူႇတီႈ ၵူၼ်းၼုမ်ႇ NLD သေ ဢွၼ်ႁူဝ်ၸတ်းႁဵတ်းၼႆႉ တေလႆႈဝႃႈ ပဵၼ်ဢၼ်လၢၵ်ႇလၢႆးဢၼ်ၼိုင်ႈ။ တွၼ်ႈတႃႇႁဝ်းၶႃႈ တေၸတ်းႁဵတ်းပၢင်ၵုမ် ND တႆးၼၼ်ႉ လႆႈထုၵ်ႇတပ်ႉသိုၵ်း လူင်ပွင်ၸိုင်ႈမၢၼ်ႈႁၢမ်ႈတပ်ႉသေ ယူႇတီႈလူင်ပွင်ၸိုင်ႈၵေႃႈ ဢမ်ႇလိူဝ်လႆႈၶေႃႈသင်ႇသိုၵ်း သေပဵၼ်ၵႂႃႇႁႃႉ ဢၼ်ဝႃႈ ၼၼ်ႉ ၸၢင်ႈပဵၼ်လႆႈယူႇ။ တေႃႈလဵဝ်သမ်ႉ တေၸတ်းႁဵတ်းဝၼ်းမိူင်းႁူမ်ႈတုမ်၊ ဝၼ်းမိူင်းႁူမ်ႈတုမ်ဢၼ်ဝႃႈၼၼ်ႉ မၼ်းပဵၼ်ပိုၼ်းဢၼ်ၵဵဝ်ႇၵပ်းၼႂ်းၵူၼ်းမိူင်းႁူမ်ႈတုမ်ပတ်းပိုၼ်ႉတင်းမူတ်းယဝ်ႉ။ သင်ဝႃႈ ၸႂ်ႉၸိုဝ်ႈပႃႇတီႇသေ ႁဵတ်းၵႂႃႇၼႆ တေဢမ်ႇလီ။ သင်ဝႃႈ ၸႂ်ႉၸိုဝ်ႈလူင်ပွင်ၸိုင်ႈႁဵတ်းၼႆ လႅပ်ႈၶႅမ်ႉယူႇ။ မိူဝ်ႈပူၼ်ႉမႃး ပႃႇတီႇသၢင်ႇသီႈ ပဵၼ်လူင်ပွင်ၸိုင်ႈၼၼ်ႉ ၶဝ်ဢမ်ႇၸႂ်ႉၸိုဝ်ႈပႃႇတီႇၶဝ်သေၸတ်းႁဵတ်း။ ၶဝ်ၸႂ်ႉၸိုဝ်ႈလူင်ပွင်ၸိုင်ႈသေ ၸတ်းႁဵတ်းမႃး ဝၼ်းမိူင်းႁူမ်ႈတုမ်” ဝႃႈၼႆ။

ၸၢႆးဝၼ်းလႅင်းၶမ်း ၽူႈတႅၼ်းသၽႃးၸိူဝ်ႉၸၢတ်ႈ ၸႄႈတွၼ်ႈလႃႈသဵဝ်ႈ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ တီႈလၵ်းသဝ်ႁိၼ်ၼႆႉ ယူႇတီႈၸုမ်းၵူၼ်းၼုမ်ႇ ၼႂ်းမိူင်းႁူမ်ႈတုမ်ပတ်းပိုၼ်ႉ ယၢမ်ႈၸတ်းႁဵတ်းပၢင်ႁူပ်ႉ ထူပ်းၵၼ် မႃးယဝ်ႉၵမ်းၼိုင်ႈ။ မိူဝ်ႈၽွင်းၼၼ်ႉ ယူႇတီႈလူင်ပွင်ၸိုင်ႈမိူင်းတႆး သင်ႇႁၢမ်ႈဢမ်ႇပၼ်ၸတ်းႁဵတ်း ပၢင်ၵုမ်ၵူၼ်း ၼုမ်ႇၵူႈၸၢဝ်းၶိူဝ်း ၵူၺ်းၵႃႈ ယူႇတီႈႁူဝ်ၼႃႈၵူၼ်းၼုမ်ႇၵူႈၸၢဝ်းၶိူဝ်းဢမ်ႇယင်ႉဢမ်ႇၵိုတ်းသေ သိုပ်ႇၸတ်းႁဵတ်းမႃး တေလႆႈဝႃႈ ပဵၼ်ဢၼ်ပူၼ်ႉၽၢၼ်ႇမႃးလႆႈလီ။ ၵူၺ်းၵႃႈ တေႃႈလဵဝ် ၵူၼ်းမိူင်းဢွၼ်ၵၼ်ၸတ်းႁဵတ်းမႃးတင်းၼမ် တီႈသဝ်ႁိၼ်ပၢင်လူင်ၼႆႉ ထႅင်ႈၾၢႆႇၼိုင်ႈၵေႃႈ ၶႂ်ႈႁဵတ်းပွႆးသင်ႁဵတ်း မိူၼ်ဝႃႈ ၸတ်းႁဵတ်းလႆႈငၢႆႈငၢႆႈၵႂႃႇႁဵတ်းၼႆ။ တီႈသဝ်ႁိၼ်ပၢင်လူင်ၼႆႉ ၶႂ်ႈၸတ်းႁဵတ်းပွႆးသင်ၸတ်းႁဵတ်း ၵူၺ်းၵႃႈ တေလႆႈမွၵ်ႇထိုင် ၵူၼ်းပိုၼ်ႉတီႈ ၵူၼ်းၼုမ်ႇ ၸၢဝ်းၶိူဝ်းတေလီ ၶႅၼ်းပဵၼ်တၢင်းႁၼ်ထိုင်ဢၼ်ၼိုင်ႈ။ ၸွမ်းၼင်ႇၾိင်ႈႁိတ်ႈၵူၼ်းၼုမ်ႇၸၢဝ်း ၶိူဝ်းၼႂ်းပိုၼ်ႉတီႈႁဝ်း ၶႃႈမီးတႄႉ ၶႂ်ႈႁႂ်ႈပွင်ႇလႅင်းလၢတ်ႈၼႄ ၵူၼ်းၼႂ်းပိုၼ်ႉတီႈ ႁႂ်ႈလႆႈႁပ်ႉႁူႉ” ဝႃႈၼႆ။

မိူဝ်ႈပီၵၢႆယူႇတီႈၽူႈၵိူဝ်းၵုမ်မိူင်းႁူမ်ႈတုမ်တူဝ် တေႃႇဢွင်ႇသၢၼ်းသူႉၵျီႇ ဢွၼ်ႁူဝ်ၸတ်းႁဵတ်း ပၢင်ဢုပ်ႇၶႆႈလွင်ႈ ၵူၼ်းၼုမ်ႇလႄႈ ငမ်းယဵၼ် ဝႃႈၼႆ။

ၼႂ်းပီ 2018 ၼႆႉသမ်ႉ ယူႇတီႈတေႃႇဢွင်ႇသၢၼ်းသူႉၵျီႇ တေၶဝ်ႈႁူမ်ႈဢမ်ႇၶဝ်ႈႁူမ်ႈဢၼ်ဝႃႈၼၼ်ႉ ပႆႇႁူႉဝႃႈၼႆ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း