ၽူႈလၵ်ႉၸၵ်ႉၶုတ်ႈလိူင်ႇၼမ် တီႈဝဵင်းတူၼ်ႈတီး ၸၵ်ႉၶူတ်ႈပႃးထူင်ပႃး မႄႈပုမ်လူင် ၊ ထိုင်မိူဝ်ႈလဵဝ် ပလိၵ်ႈယင်းပႆႇတိၺွပ်းလႆႈတူဝ်လႄႈ ၵူၼ်းပိုၼ်ႉတီႈဢွၼ်ၵၼ်မႆႈၸႂ်လွင်ႈႁူမ်ႇလူမ်ႈ။
မိူဝ်ႈဝၼ်းတီႈ 04/2/2018 ယၢမ်းၵၢင်ၼႂ်မွၵ်ႈ 10 မူင်း၊ ၵူၼ်းၸၢႆးသွင်ၵေႃႉၶီႇလူတ်ႉၶိူင်ႈ မႃးၸၵ်ႉၸၼ်ထူင်ပႃးမႄႈပုမ်လူင်ၵေႃႉၼိုင်ႈ တီႈႁိမ်းတၢင်းၽႄႁၢၼ်ႉၶၢႆၶဝ်ႈမုၼ်း ထၢႆႇဝၼ်း တီႈပွၵ်ႉယေႇဢေးၵုၼ်း ႁိမ်းႁူင်းႁဵၼ်းၸၼ်ႉသုင် မၢႆ 4။ ၵူၼ်းႁၢႆႉ 2 ၵေႃႉၼၼ်ႉ ဝၢႆးလင်လႆႈထူင်ပႃးမႄႈမၢၼ်းယဝ်ႉ ၶီႇလူတ်ႉၶိူင်ႈ ပၢႆႈၵႂႃႇပႅတ်ႈ။
မၼေႃႇၼႃႇၸေႃး မႄႈပုမ်လူင်ၵေႃႉၺႃးၽူႈလၵ်ႉၸၵ်ႉၸၼ်ထူင်ၼၼ်ႉ လၢတ်ႈဝႃႈ– “ဢၼ်ၸၵ်ႉၶုတ်ႈႁိမ်ဢဝ်ၵႂႃႇၼႆႉ ပဵၼ်ၵူၼ်းၼုမ်ႇသွင်ၵေႃႉ။ ၶီႇလူတ်ႉၶိူင်ႈဝႆးၼႃႇ။ ၼႂ်းဢႅပ်ႇငိုၼ်းၶႃႈဢၼ်ၶဝ်ၸၼ်ဢဝ်ၵႂႃႇၼၼ်ႉ ပႃးၵႂႃႇ မိူၼ်ၼင်ႇ ပပ်ႉယေးငိုၼ်း၊ ၶိူင်ႈၾူၼ်ႊမိုဝ်းထိုဝ်၊ ဝႂ်ၶႃႈႁၢပ်ႇၵၢၼ်ၶုၼ်၊ ၵၢၵ်ႇသေႃးႁိူၼ်းၸိူဝ်းၼႆႉ။ ၵူၼ်းမိူင်းဢၼ်ထူပ်းၽေးၸိူင်ႉၼႆ မီးၼမ်တႄႉတႄႉ။ၶႆႈဝႃႈမီးယူႇၵူႈဝၼ်း။ ပလိၵ်ႈယင်းပႆႇတိလႆႈတူဝ်ၵူၼ်းႁၢႆႉလႄႈ ပဵၼ်ဢၼ်လီမႆႈၸႂ် “- ဝႃႈၼႆ။
ၵူၼ်းဢၼ်ၸၵ်ႉၶုတ်ႈၶူဝ်းၶွင်ပွၵ်ႈၼႆႉ ပဵၼ်ၵူၼ်းၸၢႆးၼုမ်ႇ 2 ၵေႃႉ၊ ဢႃယုမီးမွၵ်ႈ 20 ပီ၊ မီးလွင်ႈၸၵ်ႉၶုတ်ႈထူင်ပႃး ၶူဝ်းၶွင်ၵူႈဝၼ်းဝႃႈၼႆ။
“တေႃႈၼင်ႇၵၢင်ၼႂ် 10 မူင်းယင်းႁတ်းၸၵ်ႉၸူၼ်ၶူဝ်းပိူၼ်ႈၼႆတႄႉ ပေႃးပဵၼ်ၵၢင်ၶမ်ႈၵၢင်ၶိုၼ်းလႄႈတီႈၸွၵ်ႉ တီႈၸဵင်ႇတႄႉ ၶႅၼ်းဢမ်ႇလူဝ်ႇလၢတ်ႈယဝ်ႉ။ တီႈဝဵင်းတူၼ်ႈတီးၼႆႉ ႁႅင်းပလိၵ်ႈဢၼ်ဢဝ်ႁူမ်ႇလူမ်ႈၵေႃႈဢေႇ၊ ၵူၼ်းၺႃးၸၵ်ႉၸူၼ်ၶူဝ်းၵေႃႈ ၵမ်ႈၼမ် ယုင်ႈယၢင်ႈၸွမ်းၼႃႈၵၢၼ်လႄႈ ဢမ်ႇပဵၼ်ပိုတ်ႇဢမု/ၶၻီး။ လွင်ႈၸၵ်ႉၶုတ်ႈႁိမ်ဢဝ်ၶူဝ်းၶွင်ၵၼ်ၸိူင်ႉၼႆၼႆႉ ၵႆႉၵႆႉပဵၼ်တႃႇသေႇ“- ၵူဝ်ႇထုၼ်း ၵူၼ်းယူႇပွၵ်ႉၵၢၼ်ႇသေႉ ဝဵင်းတူၼ်ႈတီး လၢတ်ႈ။
မၼေႃႇၼႃႇၸေႃး တႄႉ ၼင်ႇႁိုဝ်ၵူၼ်းမိူင်းတေလႆႈလွင်ႈလွတ်ႈၽေးၼၼ်ႉ တေပိုတ်ႇဢမု (ၶၻီး) တီႈႁူင်းပလိၵ်ႈမၢႆ 2 ဝဵင်းတူၼ်ႈတီး–ၼႆယဝ်ႉ။