တႄႇႁူဝ်လိူၼ်ၼႆႉမႃး ၸဝ်ႈၼႃႈတီႈထႆး တီႉၺွပ်းလႆႈ ၵူၼ်းမိူင်းႁူမ်ႈတုမ် လုၵ်ႉတၢင်းတႃႈၶီႈလဵၵ်း လၵ်ႉၶၢမ်ႈၼမ်ႉသၢႆ ၶဝ်ႈမိူင်းထႆး မႄႈသၢႆႁိမ်းပၢၵ်ႇၵေႃႉ။

ဢိင်ၼိူဝ်တၢင်းပဵၼ်ၸိူဝ်ႉမႅင်းၶူဝ်ႊဝိတ်ႉ 19 ၽႄႈလၢမ်းၼႂ်းမိူင်းသေ ၼင်ႇႁိုဝ်တေၵႅတ်ႇၵင်ႈၵုမ်းလႆႈ တၢင်းပဵၼ်လႄႈသင်၊ ၼင်ႇႁိုဝ်တၢင်းပဵၼ် ပေႃးတေဢမ်ႇၽႄႈလၢမ်းႁၢႆႉႁႅင်းၼၼ်ႉလႄႈသင်၊ တင်ႈတႄႇဝၼ်းတီႈ 23/3/2020 မႃး ယူႇတီႈလူင်ပွင်ၸိုင်ႈထႆး ၸီႉသင်ႇႁႂ်ႈပိၵ်ႉဢိုတ်းၽၵ်းတူမိူင်း ၸွမ်းလႅၼ်လိၼ်ၵူႈတီႈ။ ၵူၺ်းၵႃႈ လႅၼ်လိၼ်တႆး-ထႆး ပွတ်းတႃႈၶီႈလဵၵ်း-မႄႈသၢႆၼၼ်ႉ ဢမ်ႇလႆႈၶၢမ်ႈၶူဝ်ၵေႃႈ ၵူၼ်းမိူင်းၵႆႉဢွၼ်ၵၼ်လၵ်ႉၶၢမ်ႈၼမ်ႉ ၶဝ်ႈဢွၵ်ႇၵႂႃႇမႃး။ ၸဝ်ႈၼႃႈတီႈထႆးၵေႃႈ ၵမ်းၵမ်းတီႉလႆႈ-ၼႆယဝ်ႉ။

ၵဵဝ်ႇၵပ်းလွင်ႈၼႆႉ ၸၢႆးၼုမ်ႇတုၺ်ႈ ၾၢႆႇၸွႆႈထႅမ် ႁႅင်းၵၢၼ်ယၢၼ်မိူင်း လႅၼ်လိၼ်တႆး – ထႆး လၢတ်ႈတီႈၽူႈတွႆႇႁွၵ်ႈဝႃႈ- “မီးၵူၼ်းလၵ်ႉၶၢမ်ႈၵူႈဝၼ်းယဝ်ႉ၊ ၼႂ်းလိူၼ်ၼႆႉၵူၺ်း ၸဝ်ႈၼႃႈတီႈထႆး ၶဝ်တီႉလႆႈၼႆႉ ၶႂ်ႈမီးပၢၵ်ႇပၢႆယဝ်ႉ၊ ၵမ်ႈၼမ်လုၵ်ႉတၢင်းမိူင်းတႆးသေ လၵ်ႉၶၢမ်ႈၶဝ်ႈမိူင်းထႆး၊ ဢၼ်လၵ်ႉၶၢမ်ႈၵၢင်ဝၼ်းၵေႃႈမီး ဢၼ်လၵ်ႉၶၢမ်ႈၵၢင်ၶိုၼ်းၵေႃႈမီး ၵွပ်ႈဝႃႈၼမ်ႉမၼ်းႁႅင်ႈ။ မႄႈၼမ်ႉသၢႆ လႅၼ်လိၼ်တႆး-ထႆးၼႆႉ တၢင်းယၢဝ်းမၼ်းမီးမွၵ်ႈ 5 ၵီႊလူဝ်ႊၸိူဝ်းၼႆႉ၊ မိူဝ်ႈလဵဝ် တၢင်းလိုၵ်ႉမၼ်း ပဵင်းၸွမ်းမၢၵ်ႇၵၢဝ်ႈႁူဝ်ၶဝ်ႇၸိူဝ်းၼႆႉၵူၺ်း၊ ၶႂ်ႈၶၢမ်ႈတီႈလႂ်ၵေႃႈလႆႈ” ဝႃႈၼႆ။

ဝဵင်းမႄႈသၢႆ ဢၼ်မီးမႄႈၼမ်ႉသၢႆၶႅၼ်ႈဝႆႉၼႆႉ တေႃႇၼႃႈၵၼ်တင်း ၾင်ႇမိူင်းတႆး ဝဵင်းတႃႈၶီႈလဵၵ်း ၸႄႈတွၼ်ႈတႃႈၶီႈလဵၵ်း ၸိုင်ႈတႆးပွတ်းဢွၵ်ႇ ၸိုင်ႈမိူင်းႁူမ်ႈတုမ်မျႅၼ်ႇမႃႇ။

“ၵွပ်ႈပိူဝ်ႈဝႃႈပိၵ်ႉဢိုတ်းၶူဝ်သေ ႁၢမ်ႈၵူၼ်း ဢမ်ႇပၼ်ၶၢမ်ႈၵႂႃႇမႃးလႄႈ ၵူၼ်းၵေႃႈလၵ်ႉၶၢမ်ႈၸွမ်း တႃႈၼမ်ႉ တီႈၵူၼ်းၶၢမ်ႈၸိူဝ်းၼၼ်ႉ။ ႁၢမ်ႈဢမ်ႇလႆႈလႄႈ ထႆးၶဝ်ၸင်ႇမႃးႁဵတ်းႁူဝ်ႉႁႄႉဝႆႉ။   ၵူၺ်းၵႃႈႁႄႉဝႆႉသေတႃႉၵေႃႈ မႄႈၼမ်ႉသၢႆၼႆႉ မၼ်းယၢဝ်းပူၼ်ႉတီႈလႄႈ ၵူၼ်းတိုၵ်ႉလၵ်ႉၶၢမ်ႈယူႇ။ တိုၼ်ႈတီႈလႂ် တေၶၢမ်ႈလႆႈတီႈလႂ်ၸိူဝ်းၼႆႉ ၽူႈမီးပုၼ်ႈၽွၼ်းၾၢႆႇသိုၵ်းထႆးၶဝ် ၵႂႃႇမူၵ်းပႂ်ႉ၊ ၸွမ်းလႅၼ်လိၼ်ၼႆႉၶဝ်ပႂ်ႉမူတ်း၊ ပေႃးၵႂႃႇလၵ်ႉၶၢမ်ႈတႄႉ ၵမ်ႈၼမ်မၼ်းဢမ်ႇလွတ်ႈ၊ ဢၼ်ဢမ်ႇလွတ်ႈၼႆႉတႄႉ ၼႂ်းၸူဝ်ႈလိူၼ်ၼႆႉၵူၺ်းၶႂ်ႈမီးႁိမ်းပၢၵ်ႇၶႃႈဢေႃႈ”-ၸၢႆးၼုမ်ႇတုၺ်ႈ သိုပ်ႇလၢတ်ႈၼႄထႅင်ႈ ၼင်ႇၼႆ။

လွင်ႈတၢင်းဢၼ်ၵူၼ်းလၵ်ႉၶၢမ်ႈၼမ်ႉၼၼ်ႉ ၵမ်ႈၼမ်ပေႃးတေၶၢမ်ႈၶူဝ်မႃးပဵၼ်တၢင်းၵၢၼ် လႆႈၶဝ်ႈ Quarantine 14 ဝၼ်း၊ 21 ဝၼ်းဝႃႇၸိူဝ်းၼႆႉၵူၺ်းဢမ်ႇၵႃး တေလႆႈႁဵတ်းၸွမ်းမၢႆမီႈ မိူၼ်ၼင်ႇ တေလႆႈပွင်ႇဝႆႉတီႈ လုမ်းၽွင်းတၢင်လူင်ႈၼႃႈဝႆႉသေ လႆႈပႂ်ႉ 9 ဝၼ်း 10 ဝၼ်း ၸင်ႇလႆႈၶၢမ်ႈပဵၼ်ၸုပ်ႈ ပဵၼ်ၸုပ်ႈ ၼႆယဝ်ႉ။

ဝဵင်းတႃႈၶီႈလဵၵ်း ၸႄႈတွၼ်ႈတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်းၼႆႉ ပဵၼ်ဝဵင်းၵိုၵ်းလႅၼ်လိၼ် တႆး-ထႆး၊ ၾင်ႇမိူင်းထႆးပဵၼ်ဝဵင်းမႄႈသၢႆ၊ မီးမႄႈၼမ်ႉသၢႆၶတ်းၶႅၼ်ႈၵၼ်ဝႆႉသေ မီးၶူဝ်မိုတ်ႈၵိုဝ်းမၢႆ 1 တင်းမၢႆ 2 ၵၢႆႇၶၢမ်ႈၸူးၵၼ်ဝႆႉ။ ပဵၼ်ဝဵင်းၵူၼ်းၵိုၼ်း ငိုၼ်းၶွၼ်ႈလိူင်ႇ ဝဵင်းၵၢၼ်ၵႃႉၶၢႆပၢႆးမၢၵ်ႈမီး ၶိုၼ်ႈယႂ်ႇဝဵင်းၼိုင်ႈ၊ ပၼ်ႁႃလၢႆလၢႆလွင်ႈၵေႃႈၼမ်။