ပလိၵ်ႈ/ယႄး ၵူတ်ႇထတ်းတီႉလႆႈယႃႈမဝ်းၵမ် 2 သႅၼ်မဵတ်ႉပၢႆ တီႈတူဝ်သိုၵ်းလူင်ပွင်ၸိုင်ႈမၢၼ်ႈ 2 ၵေႃႉ ၼႂ်းၸႄႈဝဵင်းတႃႈၶီႈလဵၵ်း။
မိူဝ်ႈဝၼ်းတီႈ 5/7/2020 ယၢမ်းၵၢင်ၶမ်ႈ ယူႇတီႈပလိၵ်ႈ ၵူတ်ႇထတ်းၼႂ်းၵႃးသိုၵ်းမၢၼ်ႈ 2 ၵေႃႉ ၸဝ်ႈႁၢၼ် ထုၼ်းလိၼ်းဢွင်ႇ တင်း ႁူဝ်ႁၢၼ် ၼၢႆႇၸူဝ်း ၽူႈမီးၸၼ်ႉၼႂ်းတပ်ႉသိုၵ်းလူင်ပွင်ၸိုင်ႈမၢၼ်ႈ ဢၼ်တူၵ်းပုၼ်ႈၽွၼ်းဝႆႉ တၢင်းၸႄႈဝဵင်းမိူင်းယွင်း၊ ၵူတ်ႇထတ်းတီႉလႆႈ တီႈပွၵ်ႉမႄႈၶၢဝ် ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း ၼႆယဝ်ႉ။
ယႃႈမႃႉ ဢၼ်တီႉလႆႈၼၼ်ႉ သႂ်ႇထူင်ၸၢၼ်ႈသေ သႂ်ႇဝႆႉတၢင်းလင်ၵႃးၶဝ် တင်းမူတ်း 219,800 မဵတ်ႉ။ ဢိင်ၼိူဝ်လွင်ႈၼႆႉသေ ယူႇတီႈပလိၵ်ႈလႆႈၵုမ်းတူဝ်သိုၵ်းမၢၼ်ႈတင်းသွင်ၵေႃႉဝႆႉယဝ်ႉ ပိုတ်ႇလိူင်ႈလၢဝ်း ၸွမ်းၼင်ႇ ပၵ်းပိူင်မၢႆမီႈဝၢၼ်ႈမိူင်းမီးၼၼ်ႉ တီႈႁူင်းပလိၵ်ႈၸႄႈဝဵင်းတႃႈၶီႈလဵၵ်း ၼႆယဝ်ႉ။
လိူဝ်သေၼၼ်ႉ မိူဝ်ႈဝၼ်းတီႈ 3/7/2020 ယၢမ်းဝၢႆးဝၼ်း 4 မူင်းၼၼ်ႉ ပလိၵ်ႈတႃႈၶီႈလဵၵ်း ၵူတ်ႇထတ်းတီႉလႆႈ ယႃႈမဝ်းၵမ် တီႈဝၢၼ်ႈၼမ်ႉဢုၼ်ႇ ၶၼ်ငိုၼ်း 3,450 သႅၼ်ပျႃး။
မိူဝ်ႈဝၼ်းတီႈ 4/7/2020 ယၢမ်းၵၢင်ဝၼ်း မွၵ်ႈ 11 မူင်းၶိုင်ႈၼၼ်ႉၵေႃႈ တီႉလႆႈယႃႈမဝ်းၵမ် တီႈၸႄႈဝဵင်းပၢင်လွင်း ယႃႈမႃႉ ၶၼ်ငိုၼ်း 14,985 သႅၼ်ပျႃးလႄႈ ယႃႈဢႆႊသ် ICE ၶၼ်ငိုၼ်း 1,250 သႅၼ်ပျႃး ၼႆယဝ်ႉ။