သိုၵ်းလူင်ပွင်ၸိုင်ႈမၢၼ်ႈ လႄႈ သိုၵ်း RCSS ၶဵင်ႈၶႅင်ၵၢၼ်သိုၵ်းၵၼ်ၼႂ်းၸေႈဝဵင်းၵျွၵ်ႉမႄး မၢၵ်ႇလူင်တူၵ်းသႂ်ႇဝၢၼ်ႈ သေဢမ်ႇၵႃးၵူၼ်းဝၢၼ်ႈၺႃးယိုဝ်းတၢႆၵေႃႉၼိုင်ႈ မၢတ်ႇၸဵပ်းၵေႃႉၼိုင်ႈ။
မိူဝ်ႈၼႆႉ ဝၼ်းတီႈ 29/6/2020 ယၢမ်းၵၢင်ၼႂ် သဵင်ၵွင်ႈသဵင်မၢၵ်ႇတႅၵ်ႇတၢင်းဝၢၼ်ႈ ပၢင်ၵႅၼ် ၸႄႈဝဵင်းၵျွၵ်ႉမႄး၊ ၵူၼ်းဝၢၼ်ႈတၢႆထင်တီႈၵေႃႉၼိုင်ႈ၊ မၢတ်ႇၸဵပ်းၵေႃႉၼိုင်ႈ။ ၵေႃႉတၢႆၼၼ်ႉ ၸိုဝ်ႈလုင်းသူႉ ဢႃယု 60 ပၢႆ၊ ၵေႃႉတိူဝ်ႉမၢတ်ႇၸဵပ်း ၸိုဝ်ႈၼၢႆးသႂ် မၢၵ်ႇၵွင်ႈတိူဝ်ႉတီႈၵုမ်ႇၵူၼ်ႈ ၼႆယဝ်ႉ။
ၸၢႆးထုၼ်းဝိၼ်း ၽူႈတႅၼ်းသၽႃးၸႄႈမိူင်းၶဵတ်ႇလိူၵ်ႈတင်ႈမၢႆ 1 ၸႄႈဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ “ၸႂ်ႈၶႃႈဢေႃႈ ၵူၼ်းဝၢၼ်ႈတၢႆ ၵေႃႉၼိုင်ႈလႄႈ တိူဝ်ႉမၢတ်ႇၸဵပ်းၵေႃႉၼိုင်ႈၶႃႈ။ ၵူၼ်းမၢတ်ႇၸဵပ်းလႄႈ လူႉတၢႆၼႆႉ ဢမ်ႇၸႂ်ႈၺႃးမၢၵ်ႇလူင်တူၵ်းသႂ်ႇ ၺႃးမၢၵ်ႇၵွင်ႈယိုဝ်းသႂ်ႇၶႃႈဢေႃႈ ။ လႆႈငိၼ်းဝႃႈ သိုၵ်းမၢၼ်ႈ ယူႇတၢင်းၼွၵ်ႈဝၢၼ်ႈသေ ဢဝ်ၵွင်ႈၸၢၵ်ႈယိုဝ်းသႂ်ႇၼႂ်းဝၢၼ်ႈယဝ်ႉၵေႃႈ ပွႆႇမၢၵ်ႇသႂ်ႇထႅင်ႈ၊ မီးၵူၼ်းလူႉတၢႆထင်တီႈ ၵေႃႉၼိုင်ႈၶႃႈဢေႃႈ” ဝႃႈၼႆ။
မိူဝ်ႈဝႃး ဝၼ်းတီႈ 28/6/2020 ၼၼ်ႉၵေႃႈ ၵူၼ်းဝၢၼ်ႈဢႅၵ်ႉၵျီး လုင်းမွင်ႇ ဢႃယု မွၵ်ႈ 50 ပၢႆ ထုၵ်ႇသိုၵ်း လူင်ပွင်ၸိုင်ႈမၢၼ်ႈ ထဵတ်ႈထၢမ်ပေႃႉထုပ်ႉ ထိုင်တီႈပေႃးတၢႆလိုမ်း ၼႆယဝ်ႉ။
ၸၢႆးထုၼ်းဝိၼ်း သိုပ်ႇလၢတ်ႈဝႃႈ “ၸႂ်ႈၶႃႈဢေႃႈ ပဵၼ်ၵူၼ်းဝၢၼ်ႈဢႅၵ်ႉၵျီး၊ မၼ်းၸၢႆးပဵၼ်ၵူၼ်းလဵင်ႉၵႂၢႆး ယူႇဝႆႉၼႂ်းသုမ်ႉ တၢင်းၼွၵ်ႈဝၢၼ်ႈ၊ ၵူၼ်းဝၢၼ်ႈတႄႉ ဢွၼ်ၵၼ်ပၢႆႈဢွၵ်ႇၵႂႃႇယဝ်ႉ၊ မၼ်းသမ်ႉပွၵ်ႈမႃးၶဝ်ႈမႃးၼႂ်းဝၢၼ်ႈ၊ သိုၵ်းမၢၼ်ႈၶဝ် ၺွပ်းမၼ်းၸၢႆးသေ ၸဵတ်ႈထၢမ် ပေႃႉထုပ်ႉမၼ်းၶႃႈဢေႃႈ” ဝႃႈၼႆ။
ယၢမ်းလဵဝ်ၼႆႉ လုင်းၸၢႆးမွင်ႇ လႆႈသူင်ႇယူတ်းယႃတူဝ်ဝႆႉတီႈ ႁူင်းယႃၵျွၵ်ႉမႄးဝႆႉယဝ်ႉ ဝႃႈၼႆ။
