ပီ 2020 ၼႂ်းလုၵ်ႈလိူၼ်ၵျုၼ်ႊၼႆႉ သိုၵ်းလူင်ပွင်ၸိုင်ႈမၢၼ်ႈ တင်း တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း TNLA ပဵၼ်ပၢင်တိုၵ်းၵၼ် ၼႂ်းၸိုင်ႈတႆးပွတ်းႁွင်ႇ ႁၢဝ်ႉႁႅင်းလိူဝ်ပိူၼ်ႈ။

ဝၼ်းတီႈ 21/6/2020 ယၢမ်းၵၢင်ဝၼ်း 11:45 မူင်းၼၼ်ႉ ယူႇတီႈ သိုၵ်းလူင်ပွင်ၸိုင်ႈမၢၼ်ႈ တင်း သိုၵ်းတဢၢင်း TNLA ပဵၼ်ပၢင်တိုၵ်းၼႂ်း ၸႄႈဝဵင်းၵူတ်ႉၶၢႆ ၸိုင်ႈတႆးပွတ်းႁွင်ႇ 16 ပွၵ်ႈ။ ၾၢႆႇသိုၵ်းမၢၼ်ႈ ထႅမ်ႁႅင်းသိုၵ်း တူင်ႉၼိုင်ၽိုတ်ႉၶဝ်ႈ ပၢင်တိုၵ်းလႆႈၵိူတ်ႇၶိုၼ်ႈ ထပ်းၵၼ် ၶိူဝ်းယႂ်းမႃး ။

ၵူၼ်းမိူင်းယူႉ လၢတ်ႈတီႈၽူႈတွႆႇႁွၵ်ႈဝႃႈ “ တၢင်းမိူင်းယူႉတႄႉ ဢမ်ႇငိၼ်းသဵင်ၵွင်ႈတႅၵ်ႇ၊ ၶဝ်တေလႅပ်ႈယိုဝ်းၵၼ်တၢင်း ၼႂ်းထိူၼ်ႇ ၵႆဝၢၼ်ႈဝႆႉၶႃႈဢေႃႈ။ တၢင်းၼႆႉ သိုၵ်းၸၢဝ်းၶိူဝ်း၊ သိုၵ်းမၢၼ်ႈ တူင်ႉၼိုင်ၼမ်ၼႃႇၶႃႈ” ဝႃႈၼႆ။

ႁွင်ႈၵၢၼ် ပိုၼ်ၽၢဝ်ႇ တပ်ႉသိုၵ်းတဢၢင်း ဢွၵ်ႇဝႆႉဝႃႈ “ဢၼ်ပဵၼ်ပၢင်တိုၵ်းၵၼ် တီႈမိူင်းယူႉၼႆႉ တပ်ႉသိုၵ်းမၢၼ်ႈ ၶမယ 113 ပႃႈတႂ်ႈ တပ်ႉမ 99 ထႅမ်ႁႅင်းသိုၵ်းၽိုတ်ႉၸူး ၼႂ်းၼႃႈတီႈတပ်ႉသိုၵ်းတဢၢင်း တူင်ႉၼိုင်လႄႈ လႆႈပဵၼ်ပၢင်တိုၵ်းၵၼ်” ဝႃႈၼႆ။

ယူႇတီႈၾၢႆႇတပ်ႉသိုၵ်းလူင်ပွင်ၸိုင်ႈမၢၼ်ႈ ပိုၼ်ၽၢဝ်ႇၵိုတ်းတိုၵ်း တႃႇၶၢဝ်းတၢင်း 3 လိူၼ် တႄႇဢဝ် ဝၼ်းတီႈ 9 လိူၼ်မေႊ 2020 ၵႂႃႇတၢင်းၼႃႈ ဝႃႈၼႆသေတႃႉ တိုၵ်ႉသိုပ်ႇထႅမ်ႁႅင်းသိုၵ်း တူင်ႉၼိုင်ၼႂ်းၼႃႈတီႈတပ်ႉသိုၵ်းတဢၢင်း ႁၢဝ်ႈႁႅင်း ႁွင်ႈၵၢၼ်ပိုၼ်ၽၢဝ်ႇ သိုၵ်းတဢၢင်း ဢွၵ်ႇဝႆႉၼင်ႇၼႆ။

တပ်ႉသိုၵ်းပူတ်းပွႆႇ ၸိူဝ်ႉၸၢတ်ႈ တဢၢင်း TNLA ၼႆႉ ပဵၼ်ဢူၺ်းလီသိုၵ်းၵၼ်တင်း သိုၵ်းရၶႅင်ႇ AA သိုၵ်းၶႄႇၵဝ်ႈၵၢင်ႉ MNDAA ။ ၶဝ်ႈ တင်း သၢမ်ၸုမ်းၼႆႉ ပိုၼ်ၽၢဝ်ႇၵိုတ်းတိုၵ်း ၾၢႆႇလဵဝ် တၢင်းသိုၵ်းမၢၼ်ႈဝႆႉ။ ၾၢႆႇသိုၵ်းမၢၼ်ႈၵေႃႈ တေႃႈ ၼင်ႇၼၼ် မိူဝ်ႈဝၼ်းတီႈ 9/5/2020 ၼၼ်ႉ လိူဝ်သေ တၢင်းၸႄႈမိူင်းၶျၢင်း လႄႈ ရၶႅင်ႇ တၢင်ႇပိုၼ်ႉတီႈ တေ ၵိုတ်းသိုၵ်းဝႆႉ တေႃႇထိုင် လိူၼ် ပႅတ်ႇ ဢိင်းၵလဵတ်ႈ သဵင်ႈ – ၵူၺ်းၵႃႈ ဝၢႆးပိုၼ်ၽၢဝ်ႉ ယင်းလေႃႇတိုၵ်း သိုၵ်းယၢင်းၽိူၵ်ႇ KNU တင်း သိုၵ်း RCSS ဢၼ်လူင်းလၢႆးမိုဝ်း ၵိုတ်းတိုၵ်းတူဝ်ႈမိူင်း NCA ဝႆႉၸိူဝ်းၼၼ်ႉပႃးလူးၵွၼ်ႇ။