သိုၵ်း RCSS တင်း သိုၵ်း TNLA ဢၼ်ၶဵင်ႈၶႅင်ၵၢၼ်သိုၵ်းတေႃႇၵၼ်ၼႆႉ တင်းသွင်ၾၢႆႇငိူင်ႉငၢၵ်ႈႁၢင်ႇယၢၼ်ၵၼ်ယဝ်ႉ လႄႈ ၵူၼ်းဝၢၼ်ႈၼွၵ်ႈၼႃးပၢင်ႇ ၼႂ်းၸႄႈဝဵင်းၼမ်ႉတူႈ 200 ပၢႆ ပၢႆႈမႃးတီႈ ဝၢၼ်ႈၸၢမ် ၼၼ်ႉ ဢွၼ်ၵၼ်ပွၵ်ႈၶိုၼ်းဝၢၼ်ႈ။
ဝၼ်းတီႈ 23/6/2020 ၼၼ်ႉ ယွၼ်ႉသိုၵ်း RCSS တင်း သိုၵ်း TNLA ၶဵင်ႈၶႅင်ၵၢၼ်သိုၵ်းတေႃႇၵၼ်သေ ႁဵတ်းႁႂ်ႈၵူၼ်းမိူင်း ၼႂ်းပိုၼ်ႉတီႈ မႆႈၸႂ် ၵူဝ်ပဵၼ်ပၢင်တိုၵ်းသိုၵ်းသိူဝ်။ ၵူၼ်းဝၢၼ်ႈၼႃးၵေး၊ ဝၢၼ်ႈပဵင်းလူင်၊ ဝၢၼ်ႈၼႃးၵႅင်းလႄႈ ဝၢၼ်ႈၵုၼ်ၵျွင်း ၸိူဝ်းၼႆႉ လႆႈဢွၼ်ၵၼ်ပၢႆႈၽေး မႃးသွၼ်ႈဝႆႉတီႈဝတ်ႉ/ၵျွင်းႁွင်ႇဝၢၼ်ႈၸၢမ် ၸႄႈဝဵင်းၼမ်ႉတူႈ၊ ဝၼ်းမိူဝ်ႈၼႆႉတေႉ ပွၵ်ႈၶိုၼ်းဝၢၼ်ႈ မူတ်းယဝ်ႉဝႃႈၼႆ။
ၵူၼ်းပိုၼ်ႉတီႈ ၼမ်ႉတူႈ လၢတ်ႈတီႈၽူႈတွႆႇႁွၵ်ႈဝႃႈ “မိူဝ်ႈဝႃး ဝၼ်းတီႈ 24 သိုၵ်း TNLA ထွၼ်ဢွၵ်ႇၵႂႃႇတၢင်း ဝၢၼ်ႈပဵင်းၺွင်ႇ ဝၢၼ်ႈပုင်ႇယဝ်ႉလႄႈ ငဝ်းလၢႆး လွင်ႈၶဵင်ႈၶႅင်ၵၼ် ယဵၼ်လူင်းသေ ၵူၼ်းဝၢၼ်ႈလႆႈပွၵ်ႈမိူဝ်းၶိုၼ်း ႁိူၼ်းယေးၽႂ်မၼ်းယဝ်ႉ” ဝႃႈၼႆ။
ၵူၼ်းမိူင်းဢၼ်ပၢႆႈၽေးမႃးသွၼ်ႈဝႆႉတီႈ ဝတ်ႉ/ၵျွင်းႁွင်ႇဝၢၼ်ႈၸၢမ်ၼႆႉ တင်းမူတ်းမီး 243 ၵေႃႉ။ ပဵၼ်ၵူၼ်း ဝၢၼ်ႈပဵင်းလူင် တင်းမူတ်း15 လင်ႁိူၼ်း ၸၢႆး 22 ၵေႃႉ၊ ယိင်း 29 ၵေႃႉ ႁူမ်ႈ 51 ၵေႃႉ။ ဝၢၼ်ႈၼႃးၵေး လင်ႁိူၼ်း 29 လင်၊ ၸၢႆး 25 ၵေႃႉ၊ ယိင်း 57 ၵေႃႉ ႁူမ်ႈ 82 ၵေႃႉ။ ဝၢၼ်ႈၼႃးၵႅင်း လင်ႁိူၼ်း 23 လင်၊ ၸၢႆး 34 ၵေႃႉ၊ ယိင်း 57 ၵေႃႉ ႁူမ်ႈ 91 ၵေႃႉ။ ဝၢၼ်ႈၵုၼ်ၵျွင်း လင်ႁိူၼ်း 4 လင်၊ ၸၢႆး 7 ၵေႃႉ၊ ယိင်း 12 ႁူမ်ႈၵၼ် 19 ၵေႃႉ ၼႆယဝ်ႉ။
ဝၢၼ်ႈၼႃးၵေး၊ ဝၢၼ်ႈပဵင်းလူင်၊ ဝၢၼ်ႈၵုၼ်ၵျွင်းလႄႈ ဝၢၼ်ႈၼႃးၵႅင်း ၸိူဝ်းၼႆႉ ယူႇၼႂ်းဢိူင်ႇဝၢၼ်ႈၸၢမ် မီးၼႂ်းၵႄႈၵၢင် လႃႈသဵဝ်ႈလႄႈ ဝၢၼ်ႈၸၢမ် ၸႄႈဝဵင်းၼမ်ႉတူႈ ယၢၼ်ဝၢၼ်ႈၸၢမ် မွၵ်ႈ 3-4 လၵ်း ၼႆယဝ်ႉ။
မိူဝ်ႈပီ 2017 -18 ၼၼ်ႉ သိုၵ်း RCSS သိုၵ်း TNLA ႁဵတ်းသိုၵ်းႁဵတ်းသိူဝ်တေႃႇၵၼ် ၼႂ်းမိူင်းတႆး ပွတ်းႁွင်ႇႁၢဝ်ႈႁႅင်း၊ ၵူၼ်းမိူင်းၼပ်ႉႁဵင် ၺႃးၸၢၵ်ႇသိုၵ်း၊ ၸိူဝ်းၺႃးထၢင်ႇထိူမ်သေ ထုၵ်ႇၶႃႈတၢႆၵေႃႈမီးၼမ်။ ဢမ်ႇၸၢင်ႈၽုၵ်ႇ ဢမ်ႇၸၢင်ႈသွမ်ႈ သေ သူၼ်ႁႆႈၼႃး ႁၢမ်းၵႂႃႇ ၽွင်းၼၼ်ႉ ၵေႃႈ ၼပ်ႉႁူဝ်ပၢၵ်ႇတိုင်ႇ။ ပီ 2019 တေႃႇ ယၢမ်းလဵဝ် သိုၵ်းသွင်ၾၢႆႇ ယိူၼ်ႉၵၼ် တေႃႇၵၼ် ဢမ်ႇပေႃးႁဵတ်းသိုၵ်း ႁဵတ်းသိူဝ်တေႃႇၵၼ်လႄႈ ၵူၼ်းမိူင်းလႆႈယူႇသႃႇၵတ်းယဵၼ်။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ