သၢဝ်ၵျွၵ်ႉမႄးၵေႃႉၼိုင်ႈ ဢၼ်လုၵ်ႉမိူင်းၶႄႇပွၵ်ႈမႃး ၵၵ်းတူဝ်ဝႆႉတီႈ ၵျွၵ်ႉမႄးၼၼ်ႉ လၢတ်ႈတီႈၽူႈမီးပုၼ်ႈၽွၼ်းဝႃႈ ၺႃးၵေႃႉပဵၼ်မႄႈတႄႉတႄႉ သူင်ႇတူဝ်မၼ်းၵႂႃႇမိူင်းၶႄႇ ၶၢႆပၼ်ပေႃႈလဵင်ႉၶႄႇဢဝ်ႁဵတ်းမေး ဝႃႈၼႆ။

မၼ်းၼၢင်းၼႆႉတိုၵ်ႉမီးဢႃယု 17 ပီ။ မၼ်းၼၢင်းလႆႈလၢတ်ႈတီႈပလိၵ်ႈမိူဝ်ႈ ဝၼ်းတီႈ 20/6/2020 ။

လုင်းၸၢႆးၵူး ၸုမ်းၶႅၵ်ႇလီပၢင်ၸႃႉ လၢတ်ႈတီႈၽူႈတွႆႇႁွၵ်ႈဝႃႈ“ ၸႂ်ႈတႄႉၶႃႈဢေႃႈ၊ လွင်ႈၼႆႉ ယူႇတီႈမၼ်းၼၢင်း ၵေႃႉပဵၼ်ယိင်းဢွၼ်ႇ ဢၼ်ထုၵ်ႇၶၢႆၵႂႃႇၼၼ်ႉလၢတ်ႈၼႄလႄႈ ၸင်ႇတေႁူႉၶႃႈ လွင်ႈဝႃႈထုၵ်ႇမႄႈ ၸဝ်ႈၵဝ်ႇၶၢႆပၼ်ၶႄႇ ဢၼ်ဝႃႈၼၼ်ႉ။ ယၢမ်းလဵဝ်ၼႆႉ ယူႇတီႈပလိၵ်ႈၵျွၵ်ႉမႄး လႆႈၵုမ်းတူဝ် မႄႈမၼ်းၼၢင်းလႄႈ ပေႃႈသိုပ်ႇမၼ်း ဝႆႉတီႈႁူင်းပလိၵ်ႈၵျွၵ်ႉမႄးသေ တိုၵ်ႉၸွပ်ႇထတ်းလွင်ႈတၢင်းမၼ်းဝႆႉယူႇ” ဝႃႈၼႆ။

မၼ်းၼၢင်းၼႆႉၸိုဝ်ႈႁွင်ႉ မမူဝ်းပုၼ်ႉတူႇ ယူႇပွၵ်ႉ 8 ၵျွၵ်ႉမႄး။ မိူဝ်ႈပီၵၢႆၼႆႉ မႄႈမၼ်းၼၢင်းလၢတ်ႈဝႃႈ ႁႂ်ႈမၼ်းၼၢင်း ၵႂႃႇသူႇၸႂ်းပေႃႈမၼ်း ဢၼ်ၶဝ်ႈႁူင်းယႃဝႆႉတီႈလႃႈသဵဝ်ႈၼႆသေ သူင်ႇမၼ်းၼၢင်းၵႂႃႇၸွမ်း ၼၢင်းယိင်းၵေႃႉၼိုင်ႈ။ ၵူၺ်းၵႃႈ ဢမ်ႇၵႂႃႇလႃႈသဵဝ်ႈ၊ ၼၢင်းယိင်းၵေႃႉၼၼ်ႉ ဢွၼ်ဢဝ်မၼ်းၼၢင်းၵႂႃႇထိုင်မိူင်းၶႄႇ၊ ႁႂ်ႈၵႂႃႇယူႇၸွမ်း ၵူၼ်းၸၢႆးၶႄႇၵေႃႉၼိုင်ႈ ဢႃယု30 ပီ တီႈဝဵင်းသျိၼ်းမီ ၼႆယဝ်ႉ။

ဝၢႆးလင်လႆႈႁဵတ်းမေးၶႄႇ လႆႈပီပၢႆ 4 လိူၼ်၊ မၼ်းၼၢင်းယွၼ်းပွၵ်ႈႁိူၼ်းၶိုၼ်းလႄႈ လႆႈႁူႉဝႃႈ ထုၵ်ႇမႄႈမၼ်း ၶၢႆပၼ်ၶႄႇလူၺ်ႈၵႃႈၶၼ် 8 မိုၼ်ႇယႂၼ်။ မၼ်းၼၢင်းတုၵ်းယွၼ်း ပွၵ်ႈႁိူၼ်းၶိုၼ်းတိၵ်းတိၵ်းလႄႈ ထိုင်တီႈၽူႈၸၢႆးၶႄႇၼၼ်ႉ ၵႂႃႇလၢတ်ႈပလိၵ်ႈၶႄႇ မႃးတီႉၺွပ်းဢဝ်တူဝ်မၼ်းၼၢင်းၵႂႃႇၶင်ဝႆႉၼႂ်းၶွၵ်ႈ ဝႃႈၼႆ။

မၼ်းၼၢင်းလႆႈယူႇၼႂ်းၶွၵ်ႈ 7 လိူၼ်ယဝ်ႉ ပလိၵ်ႈၶႄႇၸင်ႇ ပွႆႇတူဝ်မၼ်းၼၢင်း သူင်ႇၶၢမ်ႈလႅၼ်လိၼ် ပွၵ်ႈၶိုၼ်းႁိူၼ်း။ ယွၼ်ႉတၢင်းပဵၼ်ၶူဝ်ႊဝိတ်ႉ 19 သေ မၼ်းၼၢင်းမႃးထိုင် ၵျွၵ်ႉမႄး မိူဝ်ႈဝၼ်းတီႈ 20/6/2020 ယဝ်ႉ ၶဝ်ႈၵၵ်း/ၵဵပ်းတူဝ်ဝႆႉတီႈ ပၢင်သဝ်းတႃႇၵၵ်းတူဝ် ႁူင်းႁဵၼ်းတေႃးၽႃႈ ၼႆယဝ်ႉ။

ယၢမ်းလဵဝ်တႄႉ ပလိၵ်ႈၵျွၵ်ႉမႄး ၵုမ်းၶင်တူဝ်ၵေႃႉပဵၼ်မႄႈမၼ်းၼၢင်း၊ ပေႃႈသိုပ်ႇမၼ်းၼၢင်းလႄႈ ၼၢင်းယိင်းၵေႃႉၵႃႉၵူၼ်း(ပွႆးၸႃး) ဢၼ်ၵပ်းသိုပ်ႇၶၢႆမၼ်းၼၢင်းပၼ်ၶႄႇၼၼ်ႉဝႆႉယဝ်ႉ ဝႃႈၼႆ။