ၸုမ်းၵူၼ်းၼုမ်ႇတႆး TYO ၵဵင်းတုင် ၶိုၼ်းမႄးၶွတ်ႇၽွတ်ႈၶွမ်ႊမတီႊမႂ်ႇ၊ ၶိုၼ်းဝၢင်းၽႅၼ်ၼႃႈၵၢၼ်တႃငၢၼ်းမႂ်ႇ။
ဝၼ်းတီႈ 23/6/2020 ယၢမ်းဝၢႆးဝၼ်းတၢမ်းၶမ်ႈ 4 မူင်းထိုင် 6 မူင်းၶိုင်ႈ၊ ယူႇတီႈၶွမ်ႊမတီႊ ၸုမ်းၵူၼ်းၼုမ်ႇတႆး (Tai Youth Organization –TYO) ဢုပ်ႇဢူဝ်းၵၼ်ဝၢင်းၽႅၼ်ၼႃႈၵၢၼ် တီႈလုမ်းၵပ်းသၢၼ် ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး တီႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်း ၼႆယဝ်ႉ။
ၸၢႆးသဝ်ၵႅဝ်ႈ ၽူႈၶၢၼ်ပၢၵ်ႇ ၸုမ်းၵူၼ်းၼုမ်ႇတႆး TYO ၸႄႈဝဵင်းၵဵင်းတုင် လၢတ်ႈတီႈၽူႈတွႆႇႁွၵ်ႈဝႃႈ “ယၢမ်းလဵဝ် ႁဝ်းၶႃႈ ၶိုၼ်းမႄးၶွတ်ႇၽွတ်ႈၶွမ်ႊမတီႊ ၸုမ်းၵူၼ်းၼုမ်ႇတႆး ႁဝ်းၶႃႈၶိုၼ်းသေ တေဝၢင်းၽႅၼ်တူင်ႉၼိုင်ၵႂႃႇတၢင်းၼႃႈ။ ပၢင်ၵုမ်ၸုမ်းၵူၼ်းၼုမ်ႇတႆး ႁဝ်းၶႃႈၼႆႉ လႆႈၸတ်းႁဵတ်းမႃးသွင်ပွၵ်ႈၵမ်းၼႆႉယဝ်ႉ၊ မိူဝ်ႈဝၼ်းတီႈ 13/6/2020 ၼၼ်ႉ ၵမ်းၼိုင်ႈ၊ မိူဝ်ႈဝႃး ဝၼ်းတီႈ 23 ၵမ်းၼိုင်ႈ” ဝႃႈၼႆ။
ၸုမ်းၵူၼ်းၼုမ်ႇတႆး TYO ၵဵင်းတုင်ၼႆႉ ယိူင်းဢၢၼ်းပိူင်လူင်တႃႇ တူင်ႉၼိုင်ႁဵတ်းသၢင်ႈၵႂႃႇ မိူၼ်ၼင်ႇ ၵၢၼ်ပူၵ်းပွင်မုၼ်းလႅင်း ၵူၼ်းၼုမ်ႇၼႂ်းပိုၼ်ႉတီႈ၊ ၵၢၼ်ပူၵ်းပွင်မုၼ်းလႅင်း ၵူၼ်းပိုၼ်ႉတီႈ၊ လွင်ႈၵၢၼ်ႁႃၵိၼ်လဵင်ႉတွင်ႉ၊ ၵၢၼ်ၽုၵ်ႇသွမ်ႈ၊ ၵၢၼ်မေႃတိၼ်မေႃမိုဝ်း တွၼ်ႈတႃႇၵူၼ်းၼုမ်ႇ၊ ၵၢၼ်ပၢႆးပၺ်ၺႃ၊ ၽႃႇသႃႇလိၵ်ႈတႆးလႄႈ ၵၢၼ်ၾိင်ႈထုင်း ဢိၵ်ႇထႅင်ႈ လၢႆလၢႆလွင်ႈ ။ ယၢမ်းလဵဝ်ၵေႃႈတိုၵ်ႉမီးလွင်ႈၶွင်ႉၶမ် ၶိူင်ႈမႆႉၶိူင်ႈမိုဝ်းပႆႇမီးၵုမ်ႇထူၼ်ႈ ။ ၸၢႆးသဝ်ၵႅဝ်ႈ သိုပ်ႇလၢတ်ႈထႅင်ႈၼင်ႇၼႆ။
“တေႃႈလဵဝ်ၼႆႉ ႁဝ်းၶႃႈ ဢုပ်ႇဢူဝ်းၵၼ် တေပိုတ်ႇပၢင်သွၼ်လိၵ်ႈဢင်းၵိတ်ႉလႄႈ လၢႆးၾိုၵ်းလၢတ်ႈၵႂၢမ်း ဢင်းၵိတ်ႉ ပၼ်ၵူၼ်းၼုမ်ႇႁဝ်းၶႃႈ ၼႂ်းပိုၼ်ႉတီႈၵဵင်းတုင်ၼႆႉ။ ၵူၺ်းၵႃႈ သမ်ႉယၢပ်ႇၽိုတ်ႇ ၶိူင်ႈၸႂ်ႉတိုဝ်းၼႂ်းပၢင်သွၼ်ဝႆႉ။ ယၢမ်းလဵဝ် သင်မီးၽူႈမီးၼမ်ႉၸႂ်ၶဝ် ၸွႆႈမႃးၼႆ ၶႅၼ်းၶႅမ်ႉၶႃႈ၊ မုင်ႈမွင်းယူႇၶႃႈ။ ပၢင်သွၼ်ၼႆႉတႄႉ ႁဝ်းၶႃႈ တေဢၢၼ်းပိုတ်ႇ လိူၼ်ၼႆႉသဵင်ႈ ဢမ်ႇၼၼ် ဝၢႆးလင် တၢင်းပဵၼ်ၶူဝ်ႊဝိတ်ႉ 19 ႁၢႆယဵၼ်ၵႂႃႇ” ၸၢႆးသဝ်ၵႅဝ်ႈလၢတ်ႈၼင်ႇၼႆ။
ၶွမ်ႊမတီႊၸုမ်းၵူၼ်းၼုမ်ႇတႆး TYO ဝဵင်းၵဵင်းတုင် ဢၼ် ၶိုၼ်းၶွတ်ႇၽွတ်ႈ ၸုမ်းပွင်ၵၢၼ်ၼႆႉ CEC မီး 5 ၵေႃႉ၊ ၸုမ်း EC မီး 4 ၵေႃႉ လႄႈ ၸုမ်းၽူႈၵိူဝ်းၵုမ်မီး 7 ၵေႃႉ ၼႆယဝ်ႉ။
ၸုမ်းၵူၼ်းၼုမ်ႇတႆး TYO ၸႄႈဝဵင်းၵဵင်းတုင်ၼႆႉ တႄႇၶွတ်ႇၽွတ်ႈမႃးမိူဝ်ႈ 15/8/2011 ။
