ပႃႇတီႇႁူဝ်သိူဝ် ဝဵင်းတႃႈၶီႈလဵၵ်း ပူၵ်းပၢႆႉပႃႇတီႇ ၼႂ်းဢိူင်ႇမိူင်းၵူဝ်း ၸႄႈဝဵင်းတႃႈၶီႈလဵၵ်း 9 တီႈ။
ဝၼ်းတီႈ 23/6/2020 ယၢမ်းၵၢင်ၼႂ် 9 မူင်းၶိုင်ႈ ထိုင် 12 မူင်းၵၢင်ဝၼ်း ယူႇတီႈၵိင်ႇၽႄငဝ်ႈငုၼ်းတီႇမူဝ်ႇၶရေႇၸီႇ ၸိူဝ်ႉၶိူဝ်းတႆး (SNLD) ႁိုဝ် ပႃႇတီႇႁူဝ်သိူဝ် ဝဵင်းတႃႈၶီႈလဵၵ်း လူင်းပိုၼ်ႉတီႈ ပူၵ်းပၢႆႉပႃႇတီႇ ၼႂ်းဢိူင်ႇမိူင်းၵူဝ်း ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း ၼႆယဝ်ႉ။
ၸၢႆးၼုမ်ႇတူၺ်ႈ ႁူဝ်ပဝ်ႈ ပႃႇတီႇႁူဝ်သိူဝ် ၸႄႈဝဵင်းတႃႈၶီႈလဵၵ်း SNLD လၢတ်ႈတီႈၽူႈတွႆႇႁွၵ်ႈဝႃႈ “ၸႂ်ႈၶႃႈဢေႃႈ ႁဝ်းၶႃႈလႆႈၵႂႃႇပူၵ်း တင်းမူတ်း 9 ဝၢၼ်ႈၶႃႈ တီႈၼႂ်းဢိူင်ႇမိူင်းၵူဝ်း၊ ပူၵ်းပၢႆႉပႃႇတီႇၵူၺ်းၶႃႈ” ဝႃႈၼႆ။
လိူဝ်ၼၼ်ႉ တီႈၾဵတ်ႊၿုၵ်ႉ ၶွင်ၸၢႆးၼုမ်ႇတုၺ်ႈၵေႃႈ တႅမ်ႈဝႆႉဝႃႈ ၸွမ်းၼင်ႇပီႈၼွင်ႉၵူၼ်းဝၢၼ်ႈၶဝ် တုၵ်းယွၼ်းမႃးလႄႈ လႆႈပူၵ်းတင်ႈပၢႆႉပႃႇတီႇႁူဝ်သိူဝ် SNLD ငဝ်ႈငုၼ်းတီႇမူဝ်ႇၶရေႇၸီႇ ၸိူဝ်ႉၶိူဝ်းတႆး၊ ပိုတ်ႇၽုၺ်ႇပၼ်ၵႂႃႇ 9 ဝၢၼ်ႈ ၼႂ်းဢိူင်ႇမိူင်းၵူဝ်း ၸႄႈဝဵင်းတႃႈၶီႈလဵၵ်း ဝႃႈၼႆ။
ယူႇတီႈပႃႇတီႇႁူဝ်သိူဝ် SNLD သေ ဢၼ်လႆႈပူၵ်းပၢႆႉၵႂႃႇ 9 ဝၢၼ်ႈၼၼ်ႉ ပဵၼ်တီႈ ဝၢၼ်ႈသီၼေႃႇၵဝ်ႇ၊ ဝၢၼ်ႈသၼ်သၢႆးၵူဝ်း ၊ ဝၢၼ်ႈသီႇရိငွၵ်း၊ ဝၢၼ်ႈယၢင်းၶမ်းမႂ်ႇ၊ ဝၢၼ်ႈယၢင်းၶမ်းၵဝ်ႇ၊ ဝၢၼ်ႈယၢင်းၵႅဝ်ႈ၊ ဝၢၼ်ႈမူင်ႈ၊ ဝၢၼ်ႈၵႄးၵဝ်ႇလႄႈ ဝၢၼ်ႈၵႄးမႂ်ႇ ၼႂ်းဢိူင်ႇမိူင်းၵူဝ်း ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း ၼႆယဝ်ႉ။
ၼႂ်းၸႄႈဝဵင်းတႃႈၶီႈလဵၵ်း ဢၼ်လႆႈပိုတ်ႇဝႆႉ လုမ်းၵိင်ႇၽႄ ငဝ်ႈငုၼ်းတီႇမူဝ်ႇၶရေႇၸီႇၸိူဝ်ႉၶိူဝ်းတႆး SNLD ၼႆႉ တင်းမူတ်း မီး 17 တီႈ ဢိၵ်ႇပႃး တႃႈလိူဝ်ႇလႄႈ ၵဵင်းလၢပ်ႈ ၸိူဝ်းၼႆႉ။
ငဝ်ႈငုၼ်းတီႇမူဝ်ႇၶရေႇၸီႇၸိူဝ်ႉၶိူဝ်းတႆး (SNLD – Shan Nationalities League for Democracy) ၼႆႉ ၶွတ်ႇၽွတ်ႈမႃးမိူဝ်ႈဝၼ်းတီႈ 26/10/1988။ ယၢမ်းလဵဝ် ႁူဝ်ပဝ်ႈပဵၼ်ၸဝ်ႈၶုၼ်ထုၼ်းဢူး။ မိူဝ်ႈပၢင်လိူၵ်ႈတင်ႈ ပတ်းပိုၼ်ႉၸိုင်ႈမိူင်း ပီ 1990 ၼႂ်းမိူင်းတႆးလႆႈတီႈၼင်ႈ ၼမ်တီႈသုတ်း ပေႉထီႉ 1 သေ ၼႂ်းၸိုင်ႈမိူင်းႁူမ်ႈတုမ်မျႅၼ်ႇမႃႇ လႆႈထီႉ 2 ။ ၵူၺ်းၵႃႈ ထုၵ်ႇၸုမ်းသိုၵ်းမၢၼ်ႈယိုတ်းဢႃႇၼႃႇ ဢမ်ႇမွပ်ႈဢႃႇၼႃႇပၼ်။ ထိုင်မႃးပၢင်လိူၵ်ႈတင်ႈပတ်းပိုၼ်ႉ မိူဝ်ႈပီ 2015 ၼၼ်ႉ လႆႈတီႈၼင်ႈၼမ်သုတ်း ၼႂ်းသၽႃး 46 တီႈၼင်ႈ၊ ၼႂ်းၸိုင်ႈတႆး ပေႉၼမ်သုတ်းထီႉ 3 ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ