RCSS လႄႈ TNLA ၶဵင်ႈၶႅင်ၵၢင်သိုၵ်းတေႃႇၵၼ် ပွတ်းၸႄႈဝဵင်းၼမ်ႉတူႈလႄႈ ၵူၼ်းဝၢၼ်ႈ 200 ပၢႆ ၵူဝ်ပဵၼ်ပၢင်တိုၵ်း ဢွၼ်ၵၼ်ငိူင်ႉဝႄႈဝႆႉ ဝႃႈၼႆ။

ဝၼ်းတီႈ 23/6/2020 ယၢမ်းဝၢႆးဝၼ်း 4 မူင်း ၵူၼ်းဝၢၼ်ႈပဵင်းလူင်၊ ဝၢၼ်ႈၼႃးၵေး၊ ဝၢၼ်ႈၼႃးၵႅင်းလႄႈ ဝၢၼ်ႈၵုၼ်ၵျွင်း ဢွၼ်ၵၼ်ငိူင်ႉဝႄႈ မႃးသွၼ်ႈဝႆႉတီႈဝတ်ႉဝိႁၢရ်လူင် ၵျွင်းႁွင်ႇဝၢၼ်ႈၸၢမ် ၸႄႈဝဵင်းၼမ်ႉတူႈ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ။

ၵူၼ်းပၢႆႈၽေးသိုၵ်း ဢၼ်ႁွတ်ႈထိုင် ၵျွင်းႁွင်ႇမၢၼ်ႈၸၢမ် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ယွၼ်ႉသိုၵ်း လွႆတင်း သိုၵ်း ၶူဝ်းလၢႆးၶဵင်ႈၶႅင်ၵၼ်သေ ၵူၼ်းဝၢၼ်ႈႁဝ်းၶႃႈ ၵူဝ်ပဵၼ်ပၢင်တိုၵ်းလႄႈ လႆႈဢွၼ်ၵၼ်ငိူင်ႉပၢႆႈဢွၵ်ႇမႃးထႃႈ။ သဵင်ၵွင်ႈတႄႉ ပႆႇငိၼ်းတႅၵ်ႇ၊ တၢင်းသွင်ၾၢႆႇ တႄႉ ငႃၵၼ်ဝႆႉယူႇ။ ယဝ်ႉၵေႃႈ တိုၵ်ႉထႅမ်ႁႅင်းသိုၵ်းၼင်ႇၵၼ် တင်းသွင်ၾၢႆႇ။ ၶႃၶဵင်ႈၶႅင်ၵၼ်ၼႆႉ ၶႅၼ်ႈၵၼ်ႁွင်ႈၼမ်ႉမီႇ ၶႅၼ်ႈၵၼ်ၶူဝ်ၼႃးၵေးၵူၺ်း” ဝႃႈၼႆ။

ၵဵဝ်ႇၵပ်းလွင်ႈၼႆႉ ၸဝ်ႈသိုၵ်းဢုမ်ႈၶိူဝ်း ၽူႈၶၢၼ်ပၢၵ်ႇ RCSS/SSA ယိုၼ်ယၼ်လၢတ်ႈတီႈၽူႈတွႆႇႁွၵ်ႈဝႃႈ သွင်ၾၢႆႇလႆႈၶဵင်ႈၶႅင်ၵၼ်တႄႉယူႇ ၊ ၵူၺ်းၵႃႈ ပၢင်တိုၵ်းတႄႉပႆႇပဵၼ်။ ႁူဝ်ယွႆႈၵေႃႈပႆႇလႆႈႁူႉၸွမ်း ဝႃႈၼႆဝႆႉ။

ၾၢႆႇသိုၵ်း TNLA ၵေႃႈတေႃႈၼင်ႇၼၼ်။ ၸဝ်ႈသိုၵ်းတႃးဢၢႆႈၵျေႃႇ ၽူႈၶၢၼ်ပၢၵ်ႇ လၢတ်ႈတီႈၽူႈတွႆႇႁွၵ်ႈဝႃႈ သဵင်ၵွင်ႈပႆႇတႅၵ်ႇ ဝႃႈၼႆ။

လုင်းပႃႉၺၢၼ်ႇ ၵႅမ်ၶွမ်ႊမတီႊၵူၼ်းပၢႆႈၽေးသိုၵ်း တီႈၼမ်ႉတူႈ လၢတ်ႈတီႈၽူႈတွႆႇႁွၵ်ႈဝႃႈ “ ၵူၼ်းဝၢၼ်ႈငိူင်ႉဝႄႈဢွၵ်ႇမႃးၸဵမ် မိူဝ်ႈသိုၼ်း ။ ပွၵ်ႈမိူဝ်းၶိုၼ်းမိူဝ်ႈဝႃး ဝၼ်းတီႈ 23 ယၢမ်းၵၢင်ၼႂ်သေ ယၢမ်းႁူဝ်ၶမ်ႈသမ်ႉ ၶိုၼ်းဢွၼ်ၵၼ်ပၢႆႈမႃးၶိုၼ်းၶႃႈ။ ယၢမ်းလဵဝ် ၶဝ်ႈၼမ်ႉတၢင်းၵိၼ်တႃႇ ၵူၼ်းပၢႆႈၽေး ယင်းပႆႇလႆႈမႆႈၸႂ်ၶႃႈ တႃႇၶၢဝ်းတၢင်း 3-4 ဝၼ်းတႄႉ။ ၶွင်ၵိၼ်ယႅမ်ႉ ဢၼ်ၵဵပ်းဝႆႉမိူဝ်ႈပူၼ်ႉမႃး တိုၵ်ႉလိူဝ်ဝႆႉယူႇလႄႈ ၶိုၼ်းဢဝ်ဢၼ်ၼၼ်ႉသေ ႁုင်လဵင်ႉၵၼ်ၶိုၼ်းၶႃႈ” ဝႃႈၼႆ။

ၵူၼ်းမိူင်းဢၼ်လႆႈပၢႆႈမႃးသွၼ်ႈဝႆႉတီႈဝတ်ႉဝိႁၢရ်လူင်ဝၢၼ်ႈၸၢမ်ၼႆႉ ပဵၼ်ၵူၼ်း ဝၢၼ်ႈပဵင်းလူင် တင်းမူတ်း15 လင်ႁိူၼ်း ၸၢႆး 22 ၵေႃႉ၊ ယိင်း 29 ၵေႃႉ ႁူမ်ႈ 51 ၵေႃႉ။ ဝၢၼ်ႈၼႃးၵေး လင်ႁိူၼ်း 29 လင်၊ ၸၢႆး 25 ၵေႃႉ၊ ယိင်း 57 ၵေႃႉ ႁူမ်ႈ 82 ၵေႃႉ။ ဝၢၼ်ႈၼႃးၵႅင်း လင်ႁိူၼ်း 23 လင်၊ ၸၢႆး 34 ၵေႃႉ၊ ယိင်း 57 ၵေႃႉ ႁူမ်ႈ 91 ၵေႃႉ။ ဝၢၼ်ႈၵုၼ်ၵျွင်း လင်ႁိူၼ်း 4 လင်၊ ၸၢႆး 7 ၵေႃႉ၊ ယိင်း 12 ႁူမ်ႈၵၼ် 19 ၵေႃႉ ၼႆယဝ်ႉ။

“လွင်ႈဢၼ်ၶဝ်ၶဵင်ႈၶႅင်ၵၼ်ၼႆႉ ႁဝ်းၶႃႈၵေႃႈပႆႇယိုၼ်ယၼ် လႆႈငိၼ်းဝႃႈသိုၵ်းလွႆၶဝ် မႃးယွၼ်းၵိၼ်ၶဝ်ႈသုၵ်း တႃႇသွင်ပၢၵ်ႇႁေႃႇ တီႈဝၢၼ်ႈၼႃးၵေးသေ သွင်ၾၢႆႇလႆၶဵင်ႈၶႅင်ၵၼ်၊ ပၢင်တိုၵ်းတႄႉ တေဢမ်ႇလႅပ်ႈလွတ်ႈ၊ သွင်ၾၢႆႇတိုၵ်ႉထႅမ်ႁႅင်းၵၼ်ယူႇ” ၵူၼ်းပိုၼ်ႉတီႈၼမ်ႉတူႈ သိုပ်ႇလၢတ်ႈၼႄၼင်ႇၼႆ။

ဝၢၼ်ႈၼႃးၵေး၊ ဝၢၼ်ႈပဵင်းလူင်၊ ဝၢၼ်ႈၵုၼ်ၵျွင်းလႄႈ ဝၢၼ်ႈၼႃးၵႅင်း ၸိူဝ်းၼႆႉ ယူႇၼႂ်းဢိူင်ႇဝၢၼ်ႈၸၢမ် မီးၼႂ်းၵႄႈၵၢင် လႃႈသဵဝ်ႈလႄႈ ဝၢၼ်ႈၸၢမ် ၸႄႈဝဵင်းၼမ်ႉတူႈ ယၢၼ်ဝၢၼ်ႈၸၢမ် မွၵ်ႈ 3-4 လၵ်း ၼႆယဝ်ႉ။