သိုၵ်းလူင်ပွင်ၸိုင်ႈမၢၼ်ႈ 500 ပၢႆ ထႅမ်ႁႅင်းသိုၵ်း ဢိူမ်ႈၸမ်သိုၵ်းလွႆၵေႃႇဝၼ်းသေ ႁဵတ်းႁႂ်ႈၵူၼ်းပၢႆႈၽေး တိုၼ်ႇသၢၼ်ႈ တူၵ်းၸႂ်။

ဝၼ်းတီႈ 18/6/2020 ၼၼ်ႉ တပ်ႉသိုၵ်းလူင်ပွင်ၸိုင်ႈမၢၼ်ႈ တပ်ႉၶမယ 334၊ ၶမယ 571 လႄႈ ၶလယ 221 ႁူမ်ႈၵၼ် ဢဵၼ်ႁႅင်းသိုၵ်း 500 ပၢႆ တူင်ႉၼိုင် ဢိူမ်ႈၸမ်ဝႆႉ တီႈဝူဝ်ႇပၢင်ၵႂၢႆး လွႆၵေႃႇဝၼ်း ။ ႁဵတ်းႁႂ်ႈၵူၼ်းပၢႆႈၽေး သိုၵ်း တီႈပၢင်သဝ်း လွႆၵေႃႇဝၼ်း ၼၼ်ႉ တိုၼ်ႇသၢၼ်ႈ တူၵ်းၸႂ်ၵူဝ်ၵၼ် ဝႃႈၼႆ။

လုင်းၵၢင်ႉ ပၢင်သဝ်းၵူၼ်းပၢႆႈၽေး လွႆၵေႃႇဝၼ်း လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈဝၼ်းတီႈ 18 ၼၼ်ႉ ႁႅင်းသိုၵ်းမၢၼ်ႈၼႆႉ ဢမ်ႇယွမ်း 500 ။ လႆႈငိၼ်းဝႃႈပႃးတင်းသိုၵ်းဝႃႉ 171 ဢဵၼ်ႁႅင်းမွၵ်ႈ 40 ပၢႆ။ ၶဝ်ၸႅၵ်ႇပဵၼ်ငႃး သိုၵ်းတူင်ႉၼိုင်။ တႃႇ ဢဵၼ် ႁႅင်းၶဝ် 100 ပၢႆတႄႉ ၶိုၼ်ႈမႃးဢိူမ်ႈၸမ်ယူႇဝႆႉတီႈတၢင်းၼိူဝ်ဝူဝ်ႇပၢင်ၵႂၢႆး။ ဢွင်ႈတီႈ ၼၼ်ႉသမ်ႉ ပဵၼ်ဢွင်ႈ တီႈၵူၼ်းပၢႆႈ ၽေး ၵႂႃႇႁဵတ်းႁႆႈႁဵတ်းၼႃး ႁဵတ်းသူၼ်ၵၼ်ၶႃႈဢေႃႈ။ ၵွပ်ႈၼႆလႄႈယၢမ်းလဵဝ် ၵူၼ်း ပၢႆႈၽေး ဢမ်ႇႁတ်း ၵႂႃႇၽုၵ်ႇသွမ်ႈ ၵၼ်ၶႃႈ ” ဝႃႈၼႆ။

ယွၼ်ႉပိူဝ်ႈ ငႃးသိုၵ်းမၢၼ်ႈၶိုၼ်ႈမႃးလၢႆထႅဝ်လႄႈ ၾၢႆႇတၢင်းသိုၵ်းတႆး ယင်းလႆႈတူဝ်ႈတၼ်းၶဵင်ႈၶႅင်ဝႆႉယူႇ ဝႃႈၼႆ။

သိုပ်ႇလၢတ်ႈထႅင်ႈဝႃႈ “ သိုၵ်းဢၼ်လိူဝ်ထႅင်ႈ ၸိူဝ်းၼၼ်ႉသမ်ႉ ၸႅၵ်ႇၵၼ်ၵႂႃႇတၢင်း မႄႈၸူၵ်ႉ၊ ပႃႇၼႃးၵူဝ် ႁိမ်းတၢင်းလွႆ လမ် ၸိူဝ်းၼႆႉၵေႃႈ မီးၶႃႈယဝ်ႉ။ မိူဝ်ႈၶဝ် ၶိုၼ်းမႃးတင်းဝူဝ်ႇပၢင်ၵႂၢႆးၼၼ်ႉတႄႉ သိုၵ်းတႆးႁဝ်းၶႃႈ တင်းသိုၵ်းမၢၼ်ႈ ငႃၵၼ် ၶဵင်ႈၶႅင်ၵၼ်ၶႃႈဢေႃႈ။ သင်ဝႃႈ သိုၵ်းမၢၼ်ႈၶဝ် ၶဝ်ႈမႃးတႄႉ ပဵၼ်ပၢင်တိုၵ်းၵၼ်ၶႃႈယဝ်ႉ။ ၵူၺ်းၵႃႈ ၶဝ်ဢမ်ႇၶဝ်ႈမႃးသေ ထွႆဢွၵ်ႇၶိုၼ်း ဢွင်ႈတီႈၼၼ်ႉလႄႈ ၸင်ႇယဵၼ်ၵၼ်ဝႆႉၶႃႈယဝ်ႉ” ဝႃႈၼႆ။

ၵူၺ်းၵႃႈၵဵဝ်ႇၵပ်းလွင်ႈသိုၵ်းမၢၼ်ႈဢိူမ်ႈၸမ်ၶိုၼ်ႈမႃးတၢင်းတပ်ႉလွႆၵေႃႇဝၼ်းၼႆႉ ယူႇတီႈၸုမ်းၶၢဝ်ႇၽူႈတွႆႇႁွၵ်ႈတွင်ႈ ထၢမ်ၵႂႃႇတၢင်းၽူႈၶၢၼ်ပၢၵ်ႇ တပ်ႉသိုၵ်း RCSS/SSA တွပ်ႇလၢတ်ႈဝႃႈ ဢမ်ႇလႆႈႁူႉႁူဝ်ယွႆႈတႅတ်ႈတေႃး ဝႃႈၼႆ။

ထိုင်မႃး ဝၼ်းတီႈ 21/6/2020 ယၢမ်းၵၢင်ၼႂ် 7 မူင်းၼႆႉ သိုၵ်းလူင်ပွင်ၸိုင်မၢၼ်ႈ တပ်ႉၶလယ 571 ဢၼ်ထႅမ်ႁႅင်းသိုၵ်း ဢိူမ်ႈၸမ်ဝႆႉတီႈဝူဝ်ႇပၢင်ၵႂၢႆးၼၼ်ႉ လႆႈထွၼ်ႁႅင်းသိုၵ်းၶိုၼ်းယဝ်ႉသေ သိုပ်ႇၵႂႃႇတူင်းၼိုင်တၢင်းပွတ်းမႄႈၸူၵ်ႉ လႄႈပႃႇ ၼႃးၵူဝ်ဝႆႉ ဝႃႈၼႆ။

“ လွင်ႈဝႃႈၶဝ်ထွၼ်ႁႅင်းသိုၵ်းၶိုၼ်းၼႆၼၼ်ႉ ႁဝ်းၶႃႈၵူၼ်းပၢႆႈၽေးတႄႉ တိုၵ်ႉမႆႈၸႂ်ၵၼ်ယူႇၶႃႈ ပႆႇႁတ်းယုမ်ႇၶဝ် ဝႃႈၶဝ် ထွၼ်ယဝ်ႉၼႆ ဢၼ်ဝႃႈၼၼ်ႉ။ တေႃႈလဵဝ် သိုၵ်းတႆးႁဝ်းၶႃႈ ဢဝ်ႁူမ်ႇလူမ်ႈၶဵင်ႈၶႅင်ဝႆႉယူႇ” လုင်းၵၢင်ႉ လၢတ်ႈၼႄၼင်ႇၼႆ။

မိူဝ်ႈဝၼ်းတီႈ 18 ၼၼ်ႉ သိုၵ်းလူင်ပွင်ၸိုင်ႈမၢၼ်ႈ ထႅမ်ႁႅင်းသိုၵ်းၶဝ်ႈမႃး တင်းလွႆၵေႃႇဝၼ်း တင်းမႄႈၸူၵ်ႉ၊ ပႃႇၼႃးၵူဝ် တၢင်းသၢႆၼၼ်ႉ ၵႃးသိုၵ်း တေမီးမွၵ်ႈ 10 လမ်းပၢႆ၊ ထိုင်မႃး ယၢမ်းႁူဝ်ၶမ်းသမ်ႉ ၵႃးသိုၵ်း ထႅမ်မႃးထႅင်ႈ 2 လမ်း ၵူၼ်းပၢႆႈ ၽေး လၢတ်ႈၼႄၼင်ႇၼႆ။

ဢိင်ၼိူဝ်သိုၵ်းလူင်ပွင်ၸိုင်ႈမၢၼ်ႈ ထႅမ်ႁႅင်းသိုၵ်းဢိူမ်ႈၸမ် ၸိူဝ်းၼႆႉသေ ႁဵတ်းႁႂ်ႈ ၵူၼ်းပၢႆႈၽေးသိုၵ်း ဢွၼ်ၵၼ်တိုၼ်ႇ သၢၼ် တူၵ်းၸႂ် ၵူဝ်ၵၼ် ထိုင်တီႈပေႃးဢမ်ႇႁတ်းၵႂႃႇၽုၵ်ႈသွမ်ႈႁဵတ်းၼႃး/ သူၼ်ၵၼ် ဝႃႈၼႆ။

ၼၢင်းငိုၼ်းႁွမ် ၽူႈၵပ်းသၢၼ် ၵေႃႇမတီႇၵူၼ်းမိူင်းတႆးပၢႆႈၽေးလႅၼ်လိၼ်တႆး- ထႆး SSRC – TB လၢတ်ႈတီႈ ၽူႈတွႆႇႁွၵ်ႈဝႃႈ “ဢၼ်သိုၵ်းမၢၼ်ႈ ဢိူမ်ႈၸမ်ႁိမ်းဝူဝ်ႇပၢင်ၵႂၢႆးၼၼ်ႉ ဢွင်ႈတီႈၼၼ်ႈ မၼ်းပဵၼ်တီႈႁဵတ်းသူၼ်၊ ၼႃး လဵင်ႉတွင်ႉ ၵူၼ်းပၢႆႈၽေးႁဝ်းၶႃႈဢေႃႈ။ ႁဵတ်းႁႂ်ႈၵူၼ်းပၢႆႈၽေးဢမ်ႇႁတ်းၵႂႃႇႁဵတ်းၵၢၼ်သူၼ် ၵၢၼ်ၽုၵ်ႇသွမ်ႈ၊ ၾၢႆႇၼိုင်ႈၵေႃႈ ၵူၼ်းပၢႆႈၽေးသိုၵ်း ၸွမ်းလႅၼ်လိၼ်တႆး – ထႆးၼႆႉ ၺႃးၸဝ်ႈတႃႇၼ တတ်း ၶဝ်ႈၼမ်ႉတၢင်းၵိၼ်ပႅတ်ႈ၊ ယၢမ်းလဵဝ်ၼႆႉ ပဵၼ်ၶၢဝ်းတၢင်းပဵၼ်ၶူဝ်ႊဝိတ်ႉ 19 သေ ၽၵ်းတူ ၸွမ်းလႅၼ်လိၼ်တႆး – ထႆးၵေႃႈ ပိၵ်ႉဢိုတ်းဝႆႉ ဢမ်ႇၸၢင်ႈၶဝ်ႈဢွၵ်ႇၵႂႃႇမႃးႁဵတ်းၵၢၼ်လႆႈ၊ ယူႇတီႈၵူၼ်းပၢႆႈၽေႈႁဝ်းၶႃႈ ၸွမ်းလႅၼ်လိၼ် ထူပ်းတၢင်းယၢပ်ႇၽိုတ်ႇ ၵၼ်လိူဝ်ႁႅင်း ထိုင်တီႈပေႃးလႆႈဢဝ်ၶဝ်ႈၸိူဝ်ႉ/ ၸိူဝ်ႉၽၼ်းၶဝ်ႈ တမ်ၵိၼ်ၶိုၼ်းၵေႃႈမီး၊ ယွၼ်ႉဝႃႈ တေႃႈလဵဝ်ၼႆႉ ပဵၼ်ၶၢဝ်းၽုၵ်ႈသွမ်ႈလႄႈ ဢမ်ႇၸၢင်ႈၵႂႃႇၽုၵ်ႇသွမ်ႈၵၼ်” ဝႃႈၼႆ။

ၵဵဝ်ႇလူၺ်ႈလွင်ႈသိုၵ်းလူင်ပွင်ၸိုင်ႈမၢၼ်ႈ ဢိူမ်ႈၸမ် ၽိုတ်ႉၸူးႁိမ်းၸမ်ပၢင်သဝ်းၵူၼ်းပၢႆႈၽေး တီႈလွႆၵေႃႇဝၼ်းပွၵ်ႈၼႆႉ ဢမ်ႇၸႂ်ႈပွၵ်ႈၵမ်းႁႅၵ်ႈ၊ မိူဝ်ႈၵူႈပွၵ်ႈၵေႃႈ ၵၢၼ်ၽိုတ်ႉၸူးဢိူမ်ႈၸမ်ၸိူင်ႉၼႆၵေႃႈ မီးမႃးယူႇ – ၼႆယဝ်ႉ။